اتىراۋدا ءوتىپ جاتقان اتىشۋلى ايانوۆ پەن بوقاەۆ ءىسى بويىنشا پروكۋرورلار باس كەيىپكەرلەردى سەگىز جىلعا باس بوستاندىعىنان ايىرۋدى سۇراپ جاتىر.

پروكۋرور قاسىم سىدىقوۆ «تالعاتتىڭ دا، ماكستىڭ دا ايىبى تولىق دالەلدەندى» دەپ مالىمدەدى. ونىڭ ايتۋىنشا، 24 ساۋىردەگى جاعدايدىڭ سوڭى جاپپاي تارتىپسىزدىككە اكەلۋى مۇمكىن ەدى. «تولقۋ كەزىندە الاڭ جانىنان ءوتىپ بارا جاتقاندار مەن كوشەگە سەرۋەندەۋگە شىققان ازاماتتارعا قاۋىپ ءتونىپ،  بيزنەس نىساندار دا زارداپ شەگۋى مۇمكىن ەدى. اتالعان ەكەۋدىڭ الدىن الا ۇيىمداسقان تۇردە ارەكەت ەتكەندەرى دە تولىق دالەلدەندى» دەپ اتاپ ءوتتى ول.

مەملەكەتتىك ايىپتاۋشى مارات حابيبۋللين دا «سوتتالۋشىلاردىڭ كىناسى تولىق دالەلدەندى» دەگەن پىكىرىن ءبىلدىردى. بۇعان دەيىن سوتتا «سىرا كورولى» تولەشوۆ جەر ماسەلەسىن جەلەۋ ەتكەن ميتينگ سىندى شارالار ۇيىمداستىرۋ ءۇشىن ايانوۆقا 100 مىڭ دوللار كولەمىندە «سىياقى» بەرگەنىن، الدىن-الا كەلىسىم كەزىندە تالعاتتىڭ ءوز قىزمەتىن 150 مىڭ دوللارعا باعالاعانىن كۋاگەرلەر ايتىپ بەرگەن بولاتىن.

ايانوۆتىڭ «جاقىن دوسىمىن» دەپ، انت-سۋ ىشكەن كيبراەۆ تا، باس كەيىپكەر تالعاتتىڭ اتىراۋداعى ميتينگكە الدىن الا دايىندالعانىن، ءتىپتى ونىڭ جوسپارى بويىنشا حالىقتى الاڭدا بىرنەشە كۇن ۇستاۋعا ارەكەتتەنگەنىن مالىمدەگەن ەدى. «قاراجات جاعىنان دەمەۋشىلەرىم بار» دەپ ماقتانعان ايانوۆ ارنايى قىزمەت وكىلدەرىنىڭ قىراعىلىعىنان قۋىستانىپ، 50 مىڭ دوللاردى الماتىعا ساپارى كەزىندە ەسىلباەۆقا «ساقتاي تۇر» دەپ، تاستاپ كەتكەن بولاتىن.

مىنە، بىرنەشە ساعات بويى وسىنداي دالەلدى فاكتىلەردى سانامالاپ وتكەن ايىپتاۋشى تاراپ بوقاەۆ پەن ايانوۆتى تاعىلىپ وتىرعان بارلىق ايىپتار بويىنشا 8 جىلعا باس بوستاندىعىنان ايىرۋدى سۇرادى.

ارينە، قورعاۋشى تاراپ جاعى پروكۋرورلارمەن كەلىسپەي جاتىر، دەگەنمەن ناقتى دالەلدەر ايتپادى. بۇل تۇسىنىكتى دە. سەبەبى، ەكى ايعا جۋىق ۋاقىت ىشىندە سوتتالۋشىلاردان كىنانى تولىق جۋىپ-شاياتىنداي بىردە ءبىر ناقتى دالەل كەلتىرە الماعان ادۆوكاتتاردىڭ ارەكەتى ولاردىڭ ىسكە دايىندىقسىز كىرىسكەنىن كورسەتىپ وتىر.

قالاي دەسەك تە، ءبىر جارىم ايدان بەرى اتىراۋدا ءوتىپ جاتقان سوت پروتسەسى فينالدىق شەشىمگە كەلە جاتىر. بىزگە بەلگىلىسى، ايانوۆ پەن بوقاەۆ بۇل ىسكە تەكتەن تەك بارماعان. مۋلتيميلليونەر تولەشوۆتىڭ ءوزى ايتپاقشى، اقشانىڭ بۋى ءبارىبىر اسەر ەتپەي قويمايدى. جەلكەدەن شىققان ءجۇز مىڭ دوللاردى ادۆوكاتتار قانشا جەردەن جاسىرىپ باقسا دا، اتام قازاقتىڭ «جەل بولماسا، ءشوپتىڭ باسى قيمىلدامايدى» دەگەن ءتامسىلى ءبارىبىر ويلاندىرماي قويمايدى...

Abai.kz