اتىراۋدا ماكس بوقاەۆ پەن تالعات ايانوۆتىڭ ءىسى بويىنشا باستى سوت وتىرىسى جالعاسۋدا. بۇگىن №2 قالالىق سوتتا تالعات ايانوۆ پەن ماكس بوقاەۆتان جاۋاپ الىنىپ، قورعاۋشىلاردىڭ بىرنەشە ءوتىنىشى قارالدى.

بۇگىنگى پروتسەستە م.بوقاەۆتان جاۋاپ الىندى. سوتتالۋشى ءوز سوزىندە قازاقستان كونستيتۋتسياسىن عانا باسشىلىققا الۋ كەرەك، كونستيتۋتسيانىڭ 32-بابىندا بەيبىت شەرۋگە رۇقسات ەتىلگەن دەگەن پىكىرىن قايتالاۋمەن بولدى. پروكۋروردىڭ «كونستيتۋتسيادان باسقا زاڭدار سوندا زاڭ ەمەس پە؟» دەگەن سۇراعىنا بوقاەۆ ناقتى جاۋاپ بەرە المادى.

«ت.ايانوۆ ايتقانداي، ميتينگ وتكىزۋ يدەياسى تالعاتتىكى بولدى. دەگەنمەن، ميتينگتى وتكىزۋ داتاسىن، ياعني 24 ءساۋىردى بىرگە بەلگىلەدىك. بىزگە يساتاي-ماحامبەت الاڭىندا ميتينگ وتكىزۋگە رۇقسات بەرمەدى. مەن ميتينگكە ءوز نارازىلىعىمدى ءبىلدىرۋ ءۇشىن عانا شىقتىم»، - دەدى م.بوقاەۆ.

دەگەنمەن پروكۋرور م.بوقاەۆتىڭ قاتىسۋ ءۇشىن عانا بارماعانىن، ونىڭ ميتينگ رەزوليۋتسياسىنىڭ جوباسىن ازىرلەگەنىن ايتتى. ياعني، ايىپتاۋشى تاراپ بوقاەۆتىڭ ميتينگ بىتكەننەن كەيىن حالىق اتىنان ولارمەن تالقىلاماي-اق، رەزوليۋتسيا جازعانىن جەتكىزدى. بوقاەۆ ءتىپتى بىرقاتار تالاپ بەلگىلەنگەن رەزوليۋتسيانى Facebook الەۋمەتتىك جەلىسىندە جاريالاعان بولىپ شىقتى. ياعني، بۇل بوقاەۆتىڭ ميتينكە قاتىسىپ قانا قويماي، الدىنا الا رەزوليۋتسيا دايىنداپ، شەرۋگە دايىندالعانىن دالەلدەيدى. سونداي-اق، پروكۋرور بوقاەۆتىڭ قوعام بەلسەندىسى ەكەنىن اتاپ، ونىڭ قايدان قارجىلاندىرىلىپ وتىرعانىن سۇرادى. دەگەنمەن، سوتتالۋشى بۇل سۇراققا ناقتى جاۋاپ بەرۋدەن باس تارتتى. بالكىم، جاسىراتىنى بار بولعانى عوي...

ەسكە سالا كەتسەك، م.بوقاەۆ پەن ت.ايانوۆقا قر قىلمىستىق كودەكسىنىڭ ءۇش بابى بويىنشا ايىپتار تاعىلۋدا. اتاپ ايتساق، ولار: 174 باپتىڭ 2 تارماعى، ياعني، الەۋمەتتىك جانە ۇلتتىق الاۋىزدىق تۋعىزۋعا باعىتتالعان قاساقانا ءىس-ارەكەتتەر جاساۋ، ازاماتتاردىڭ ۇلتتىق نامىسى مەن قادىر قاسيەتىنە ءتىل تيگىزۋ; 274 باپتىڭ 4 تارماعى، ياعني، قوعامدىق ءتارتىپتى بۇزۋعا قاۋىپ توندىرەتىن كوپە-كورىنەۋ جالعان اقپارات تاراتۋ; 400 باپ، ياعني، زاڭسىز شەرۋلەردى ۇيىمداستىرۋ، وتكىزۋ جانە وعان قاتىسۋ.

abai.kz