- سوعىس جانە ەڭبەك ارداگەرى، شىڭعىرلاۋ اۋدانىنىڭ قۇرمەتتى ازاماتى اندرەي رۋد گەرمانيا ەلىنەن سوعىس تۇتقىنى رەتىندە وتەماقى الدى، دەپ حابارلايدى قازاقپارات.

بقو مەملەكەتتىك مۇراعاتىنىڭ ديرەكتورى ايجان ساۋعاباەۆانىڭ ايتۋىنشا، 2015 جىلى 21 مامىردا گەرمانيا بۋندەستاگى (فەدەرالدىق جينالىسى) بۇرىنعى كەڭەس اسكەري تۇتقىندارىنا اقشالاي وتەماقى تولەۋ تۋرالى شەشىم قابىلداعانى بەلگىلى. وتەماقى كولەمى از ەمەس، 2500 ەۋرونى قۇرايدى. وسىعان وراي بقو مەملەكەتتىك مۇراعاتى وڭىردە تۇراتىن سوعىس تۇتقىندارىن ىزدەستىردى. مۇراعات قۇجاتتارى زەرتتەلىپ، ەلەكتروندى بازا تەكسەرىلدى. سونىڭ ناتيجەسىندە سوعىس تۇتقىنى بولعان كوزى ءتىرى ءبىر ادام تابىلدى. ول - شىڭعىرلاۋ اۋىلىندا تۇراتىن اندرەي يوسيفوۆيچ رۋد.  

ا.ي.رۋد رەسەيدىڭ كراسنودار ولكەسى ەيسك قالاسىندا 1921 جىلى 12 قاراشادا دۇنيەگە كەلگەن. اسكەري قىزمەتكە 1940 جىلعى تامىزدا شاقىرىلعان ول ۇلى وتان سوعىسىنىڭ العاشقى كۇندەرىنەن-اق ۇرىسقا كىرىسەدى. 1941 جىلدىڭ ماۋسىمىندا ءبىر توپ قارۋلاستارىمەن بىرگە تۇتقىنعا تۇسكەن كەڭەس جاۋىنگەرى ازاپتى از تارتپايدى. تەك بۇدان 1945 جىلعى مامىردا جەڭىس ساعاتى سوققان كەزدە عانا قۇتىلىپ، اسكەري قىزمەتىن جالعاستىرىپ، 1946 جىلى ۇيىنە ورالادى. 1948 جىلى ەيسك اۋىل شارۋاشىلىعىن مەحانيكالاندىرۋ تەحنيكۋمىن بىتىرگەن جاس  مامان قازاقستانعا جولداما الىپ، «شىڭعىرلاۋ» كەڭشارىنا شەبەرحانا مەڭگەرۋشىسى بولىپ ورنالاسادى. وسىلايشا ەڭبەك جولىن باستاعان ول باس مەحانيك، باس ينجەنەر، كەيىن فۋرمانوۆ (جالپاقتال), شىڭعىرلاۋ اۋداندىق اۋىل شارۋاشىلىعى وندىرىستىك باسقارمالارىندا جانە «كازسەلحوزتەحنيكا» اۋداندىق بىرلەستىگىندە باس ينجەنەر قىزمەتىن اتقارادى. الپىس سەگىز جىل بويى قازاق ەلىندە تۇرىپ، اۋداننىڭ قۇرمەتتى ازاماتى اتانعان اندرەي رۋد تۋرا 95 جاسقا تولار كەزدە مۇنداي توسىن سىيعا كەزىگەمىن دەپ ويلاماعان شىعار، ءسىرا.

وبلىستىق مۇراعات ناقتى دەرەكتەردى جيناستىرعاننان كەيىن قۇجاتتاردى نەمىس تاراپىنا جىبەردى. سونىڭ ناتيجەسىندە قاراشا ايىنىڭ باسىندا گەرمانيادان وڭدى جاۋاپ كەلىپ، اتالعان كولەمدەگى اقشا مايدانگەردىڭ ەسەپشوتىنا اۋدارىلدى.  

جۋىردا، 12 قاراشا كۇنى اندرەي رۋد ءوزىنىڭ 95 جاسىن اتاپ ءوتتى. ونى اۋدان اكىمى البەرت ەساليەۆ باستاعان مەيماندار قۇتتىقتاپ، العىسحات پەن تارتۋ-تارالعى تابىس ەتتى. ال ءوزى سياقتى مايدانگەر، 93 جاستاعى شىڭعىرلاۋ اۋدانىنىڭ تاعى ءبىر قۇرمەتتى ازاماتى سۇيەۋ ىعىلمانوۆ دوسىنىڭ 100 جاسقا جەتۋىنە تىلەكتەستىگىن ءبىلدىردى. وتەماقى دا سوعىس تۇتقىنىنىڭ قولىنا ءتيدى.

«مەن قازاق جەرىندە باقىتتى ءومىر ءسۇرىپ، ۇرپاق ءوسىرىپ، تامىر جايدىم. ەندى، مىنە، تاۋەلسىزدىگىمىزدىڭ 25 جىلدىعىن دا تويلاعالى وتىرمىن. بۇدان ارتىق قانداي باقىت كەرەك! قازاق حالقىمەن بىتە قايناسىپ كەتكەنىم سونداي، قازاق اندەرىن وتە جاقسى كورەمىن. اسىرەسە، «قاماجايدى» ەستىسەم، جانىم سەرگىپ، كوڭىلىم كوتەرىلىپ قالادى. مەنىڭ ۇزاق جاساۋىمنىڭ سىرى دا وسىنداي شالت-شادىمان ورتادا جۇرگەندىگىمنەن بولار»، دەدى قازاقپارات تىلشىسىنە اندرەي رۋد.

Abai.kz