- 50 ميلليارد تەڭگە اقشانى وندىرىسكە سالامىن دەگەن ادامعا بەرەمىن، تەگىن، ەشقانداي...

- 50 ميلليارد تەڭگە ءسىزدىڭ اقشاڭىز با؟

- ءيا.

- ءسىزدى قايدان بۇرىننان بىلمەيمىز.

- مەجدۋنارودنىي فەدەرالنىي سلۋجبادان 200 ميلليارد تەڭگە الۋعا كەلىسىم الىپ وتىرمىن.

- بۇكىل وبلىس سىزگە ريزا بولادى عوي وندا.

- قازاقستان دەڭىز. بۇل تۋرالى باۋىرجان بايبەك تە بىلەدى، ءبىرىنشى وڭتۇستىكتىڭ اۋداندارىن دامىتايىق دەگەن وي مەنىكى.

- ۇسىنىستارىڭىزدى ايتىڭىز...

بۇل وڭتۇستىك قازاقستان وبلىسىنىڭ اكىمى جانسەيىت تۇيمەباەۆ پەن بايدىبەك اۋدانى اقتاس اۋىلىنىڭ تۇرعىنى، زەينەتكەر بايبەك شىمىربەكوۆتىڭ اراسىندا بولعان اڭگىمە. وبلىس اكىمىنىڭ ازاماتتاردى قابىلداۋ بارىسىندا.

ارينە، بۇل كەز-كەلگەن ادامعا ەرتەك سەكىلدى ەستىلەرى ءسوزسىز. «50 ميلليارد تەڭگەسى بار ادام ول اقشانى نە ىستەرىن بىلمەي ءجۇر» دەگەنگە كىم سەنەدى؟ دەسەك تە، مۇنىڭ قانشالىقتا راس-وتىرىك ەكەنىن بىلگىمىز كەلگەنىن نەسىنە جاسىرايىق. بۇل تۋرالى وسى اڭگىمەنى ايتقان ادامنىڭ وزىنەن سۇراۋدىڭ ماڭىزى جوق، ويتكەنى، بۇل ءسوزدى وبلىس اكىمىنە وزگە بىرەۋ ەمەس، ءوز اۋزىمەن ايتىپ وتىر. سول سەبەپتى شىنايى اقپاراتتى وزگە جاقتان ىزدەۋگە تۋرا كەلەدى. جان-جاقتان سۇراستىرىپ، بىلگەنىمىزدەي «50 ميلليارد اقشام بار» دەگەن ازاماتتىڭ ءسوزى قانشالىقتى شىندىققا جاناساتىنى ازىرگە زەرتتەلىپ جاتقانعا ۇقسايدى. بالكىم، قاريا راس ايتىپ وتىرعان دا بولار، مۇمكىن جالعان شىعار؟ ونىڭ انىق-قانىعىنا ۋاقىت تورەشى. ءبىز بۇل تاقىرىپقا قايتا ورالاتىن بولامىز.

Abai.kz