اقىن سارا تاستانبەكقىزىنىڭ كەسەنەسى

كامال ءابدىراحماننىڭ «اقىن سارا اتاۋسىز قالا ما؟» دەگەن ماقالاسى Abai.kz اقپاراتتىق پورتالىندا جاريالانعانىن وتكەن سەنبى كۇنى تويداعى جۇرتتىڭ اڭگىمەسىنەن ەستىدىم. قىزۋ تالقىلاپ تۇر ەكەن. ءار كىم وزىنشە وي تۇيەلى عوي. بىراق، بارلىعى ساراعا ارناپ عىلىمي-تانىمدىق كونفەرەنتسيا وتكىزۋدى قولداپ سويلەپ جاتتى.

قىزىعۋشىلىعىم ويانىپ، Abai.kz پورتالىنان الگى ماقالانى تاۋىپ الىپ وقىدىم. نەسىن جاسىرايىن، وسى ويلاردىڭ وزىمە كەلمەگەنىنە كادىمگىندەي  كەيىدىم. ءبارى دۇرىس. بىراق كامال اعانى وتكەن عاسىردىڭ توقسانىنشى جىلدارىنان بىلەمىن. اعامىزدىڭ ەموتسياسى ارناسىنان اسىپ جاتاتىنى بار. سول جىلدارى سارىوزەك پوليگونىن جابۋعا مۇرىندىق بولعانىن، سارقانتتىڭ، تالدىقورعاننىڭ باس كوتەرگەن كازاكتارىن كەۋدەدەن سوعىپ توقتاتقانداردى باستاعىنىن، وبلىستىڭ سول كەزدەگى اكىمىمەن الىسىپ ءجۇرىپ، تالدىقورعانداعى العاشقى قازاق  ورتا مەكتەبىن اشقىزعانىن جاقسى بىلەمىز. العان بەتىنەن قايتپايتىن، «نەفورمالداردىڭ» جەتەكشىسى ەدى، قاسىندا جۇردىك، بارلىق شارۋاعا ات سالىستىق. سوندا كامال اعانى تەجەپ وتىرماساق، سىرىڭكە شاقپاي-اق داۋدىڭ وتى تۇتانىپ كەتەتىن. وسىنداي مىنەزى ەسىمە ءتۇسىپ، ارتىق-اۋىس سويلەپ قويمادى ما ەكەن دەگەن وي مازالادى. ەلگە كۇندە كەلىپ جاتقان جوقپىز. سونى ويلاپ، جەكسەنبى كۇنى سارانىڭ مولاسىنا ارنايى باردىم.

جوق! كامال اعا، جاسى ۇلعايىپ، اپتىعى باسىلسا كەرەك، كەرىسىنشە، جەڭىلدەتە جازعان ەكەن. كۇرە جولدان كەسەنەگە اپاراتىن جول شۇرق تەسىك، ەكى جيەگىن بەلۋاردان ءشوپ باسىپ، مولانىڭ يەسىز ەكەنىن ءاپ دەگەننەن كورسەتتى. جەتە بەرىستەگى كوپىردەن كوكتەمدە سۋ اسىپ كەتسە كەرەك، كوپىر ءبۇلىنىپ قالعان. كەلەر جىلعى كوكتەمدە تۇگى قالمايتىنى انىق. كەسەنە قورشاۋىنان ءسال ارى الدەكىم شلاگباۋم قويىپتى. ونىسى ءبىر جاعىنا قيسايىپ، وسى ماڭنىڭ سيقىن الىپ تۇر. قورشاۋ ىشىندەگى جاعداي دا تۇپ-تۋرا جول ۇستىندەگىدەي. سوناۋ جىلدارى مولا الدىنا گۇل وتىرعىزاتىن استاۋلار قويىلعانىن بىلەتىنبىز. ولاردىڭ دا سىنعانى سىنىپ، سىنباعانىنىڭ بوياۋى وڭىپ سۇرىقسىزدانىپتى. مۇندا دا ءشوپ بەلۋاردان. نەشە جىل شالعى تيمەگەنى انىق. وبلىس باسشىلارى ات باسىن بۇرماعانى وسىدان-اق كورىندى.

مولا ىشىنە سۋ ءوتىپتى. تاس پەن بەتوننان سالىنعان كەسەنەنىڭ ەش جەرىنەن تەسىك كورىنبەيدى. سۋ ءۇش اشىق تەرەزەدەن كىرگەندەي. كەلەشەكتە شىنى  سالعان وڭدى سياقتى. توپىراعىنا بىرەۋلەر اق ماتا جاپقان ەكەن، ونىسىنا سۋ ءتيىپ، سارعايىپ، يىستەنە باستاپتى. ءۇيىندى توپىراقتىڭ ءوزىن دە الدەكىم تاسىپ كەتكەن سەكىلدى، جاقتاۋىنان تومەن ءتۇسىپ كەتىپتى. كوڭىلىمىز ءتۇسىپ، سارا اپامىزدىڭ ارۋاعىنا ارناپ قۇران وقىدىق. ءبىزدىڭ قولادان كەلەر وسى عانا عوي.

ءبىرجان سال مەن اقىن سارانىڭ ايتىسقان جەرىندەگى ەسكەرتكىش

سارا اقىننىڭ اۋىر تاعدىرى تۋرالى كوپ جازىلدى. ءتىپتى، ايتىس بولمادى دەۋشىلەر دە وقتىن-وقتىن شىعىپ قالادى. بۇل دا اقىن اپامىزدىڭ عۇمىرى بۇگىنگە دەيىن ورىنسىز تالاستىڭ تاقىرىبى بولىپ كەلە جاتقانىنىڭ دالەلى. سارا اقىننىڭ قالقاسىندا وزدەرىن كورسەتىپ قالعىسى كەلەتىندەر بارى راس. سولاردىڭ «شىندىق» ىزدەپ جۇرگەندەرىنە ۇلكەن كۇمانىم بار. ناق وسى سەبەپتەن دە سارا اقىن تۋرالى كامال اعا ايتىپ وتىرعان عىلىمي-تانىمدىق كونفەرەنتسيا وتە قاجەت. جاستار ۇمىتپاس ءۇشىن، وتكەنىمىزدى ەسكە الىپ وتىرعاننىڭ نەسى ارتىق؟

ەكىنشى ماسەلە، تولەگەن دوسماعانبەتوۆ قازاقتىڭ ءبىرتۋار ءمۇسىنشىسى ەدى. سارا اپامىزدىڭ ەسكەرتكىشىن جاساعان سول كىسى. قايتالانباس عاجاپ تۋىندى! راسىندا دا وسىنداي تاماشا دۇنيە كوپشىلىك مول جۇرەتىن جەردە تۇرۋى كەرەك-اق! بۇعان تويشىلداردىڭ ءبىر-جارى قارسى بولدى. سەبەبى، مۇقاعاليدىڭ ەسكەرتكىشى تۇر دەيدى. مەنىڭشە بۇل سىلتاۋ ەمەس. كەرىسىنشە، ەكى اقىن ءبىر-بىرىنە ءسان بەرەر ەدى.

الماتىعا ورالعان سوڭ زامانداستارىممەن اقىلداسىپ ەدىم، كورگەندەرىمدى جازۋعا كەڭەس ەتتى. ولار دا، وبلىس باسشىلىعى قولعا الماسا، وزدەرىمىز-اق قارجى جيناپ، ەڭ بولماسا اس بەرەيىك دەگەن پىكىر ايتتى. نەسى بار،  بيلىكتەگىلەرگە قارايلايتىن دانەڭە جوق. سارا اقىندى قادىرلەۋ پارىزىمىز عوي.

قادىرجان مۇساعۇلوۆ، الماتى

Abai.kz