سىنشىلار تاراپىنان بۇگىندە ادەبي-كوركەمدىك ولشەمنىڭ قاراپايىم تالاپتارىنىڭ ءوزى ءتۇسىندىرىلىپ جاتقان جوق. ونىڭ ەكى ءتۇرلى سەبەبى بار سەكىلدى.

بىرىنشىدەن، بۇگىنگى كۇنگە دەيىنگى 80-گە جۋىق جىلدىق تاريحىمىزدا يدەولوگيالانعان ناسيحاتتىق ادەبيەت بىزدە گۇلدەنىپ دامىدى. ونىڭ سارىنىنان ءالى ارىلىپ كەتە قويعان جوقپىز. وقىرماننىڭ دا، جازۋشىنىڭ دا ساناسىنان ەسكى كوزقاراس ءوشىپ كەتتى دەۋگە اۋىز بارمايدى. ءتىپتى، ساتيرا سەكىلدى كەيبىر جانرلاردا 1930 جىلدارداعى بولشەۆيكتىك ۇگىت-ناسيحاتتىڭ تۇرپايى ءتاسىلىنىڭ ءوزى ەرەكشە قاتتى ساقتالعان. ونى ساحنادا تۇرىپ الىپ ۇرانداتىپ، جۇرتقا اقىل ايتىپ، باتا بەرىپ جۇرگەن «تەاتر» اتىن جامىلعان «تامادالىق» ارتىستەردىڭ ارەكەتىنەن انىق اڭعارۋعا بولادى. 

ەكىنشىدەن، وتكەن شيرەك عاسىردا قۇندىلىقتار الماسىپ، دۇنيەتانىمىمىزدا وزگەرىس پايدا بولدى دەپ جاتامىز. بىراق، ونىڭ قالاي وزگەرىپ، قانشالىقتى قالىپتاسىپ جاتقانىن انىقتاپ كورسەتىپ جاتقان زەرتتەۋشىلەر مەن سىنشىلاردىڭ قاراسى كورىنبەيدى. تۇرمىس اۋىر، الەۋمەتتىك جاعداي تومەن، ەكونوميكالىق داعدارىس تەرەڭدەدى دەگەندەي سان سىلتاۋمەن ادەبي پروتسەستىڭ توقىراۋىن اقتاپ الا المايسىڭ. قازاق بالاسى «ورازا-ناماز توقتىقتا» دەپ ايتقانىمەن، ءدال مۇنى ادەبيەتپەن بايلانىستىرۋعا ەش نەگىز جوق. الەمدى ءدۇر سىلكىندىرگەن رومان جازعان، وقىرمانىن تاڭداي قاقتىرعان اتاقتى جازۋشىلار باي-قۋاتتى ەلدەردەن شىعىپ جاتقان جوق.

قۋاندىق شاماحاي

Facebook-تەگى پاراقشاسىنان