اپتا باسىندا قازاقستاننىڭ پولشاداعى ەلشىسى التاي ابيبۋللاەۆ قىزمەتىنەن بوساتىلدى. مەملەكەتتىك حاتشى گۇلشارا ابدىقالىقوۆا ونىڭ مەملەكەتتىك قىزمەت تۋرالى زاڭنامانى بۇزدى دەپ ايىپتاپ، مەملەكەت باسشىسىنان شارا قولدانۋىن سۇراعان بولاتىن، – دەپ جازادى Skifnews.kz.

ارتىنشا، پرەزيدەنتتىڭ جارلىعىمەن ابيبۋللاەۆ ەلشى قىزمەتىنەن بوساتىلدى.

الايدا، گۇلشارا ابدىقالىقوۆا مەمقىزمەتكەر ەتيكاسى ناقتى قالاي بۇزىلعانىن سول كۇيى ايتقان جوق. ياعني، التاي ابيبۋللاەۆتىڭ ناقتى نە ءۇشىن جۇمىستان كەتكەنى حالىققا بەلگىسىز. جۇمىس ورنىنا ماس بوپ كەلدى مە، ەسىرتكى قولداندى ما، قۇمار ويىن وينادى ما، بالكىم استانادان كەلگەن جوعارى لاۋازىمدى ايەلدەردىڭ كوڭىلىن تابا الماعان بولار؟ بۇل جاعىن اقوردانىڭ بىردە-ءبىر وكىلى اشىپ ايتپاي وتىر، – دەپ جازادى باسىلىم.

رەسمي وكىلدەر اشىق مالىمدەمەسە دە، سول سىرتقى ىستەر مينيسترلىگىنىڭ ماڭايىندا جۇرگەن «ۇزىنقۇلاقتار» ماسەلەنىڭ ءمان-جايىن «سىبىرلاپ» ۇلگەردى. ەستۋىمىزشە، ابيبۋللاەۆتىڭ جاۋاپكەرشىلىككە تارتىلۋىنا ورىسشا سويلەمەۋى سەبەپ بولعان. تارقاتىپ ايتساق، پولشاداعى كاسىپكەرلەرمەن كەزدەسكەن قازاقستان ەلشىسى بايانداماسىن قازاق جانە پولياك تىلدەرىندە جاساعان ەكەن. الايدا، بۇعان شامدانعان ءورىستىلدى ورتا باياندامانى ورىسشا جاساۋىن تالاپ ەتكەن. ال، التاي يبراگيمۇلى بۇل تالاپتى ورىنداۋدان باس تارتىپتى. سودان ونىڭ ارتىنا «شام الىپ ءتۇسىپ»، اقىرى جۇمىستان كەتۋىنە قول جەتكىزگەن كورىنەدى.

ارينە، بۇل تەك سىبىس قانا. ماسەلەنىڭ ناقتى ءمان-جايىن قازاقستاننىڭ بيلىك وكىلدەرى رەسمي ايتىپ بەرەدى دەگەن ۇمىتتەمىز.

تانىمال ساياساتتانۋشى راسۋل جۇمالى دا ابيبۋللاەۆتىڭ مەمقىزمەتكەردىڭ ەتيكەتىن بۇزاتىنداي ساۋاتسىز ەمەس ەكەنىنە كۇماندانبايدى.

«التاي ابيبوللاەۆ ساۋاتتى دا مەملەكەتشىل، قولىنان ءىس كەلەتىن ەلشىلەردىڭ ءبىرى. نە ءۇشىن مانساپتان ايىردى؟ سەبەبى نەگە ايتىلمايدى؟ سونىسىنا قاراعاندا ارانداتۋ ارەكەتى سياقتى. كەزىندە ديپلومات بولعاندا مەنىڭ دە ارتىمنان تالاي ارىز جازىلعان بولاتىن «اگاشكالارعا» باس يمەگەنىم ءۇشىن. سوعان ۇقسايدى. قالاي بولعاندا وكىنىشتى جاعداي كاسىبي مامانداردىڭ قۋدالانىپ، ءپاتۋاسىز ىعاي-سىعايدىڭ سالتانات قۇرىپ وتىرعانى. كەرىسىنشە بولۋ كەرەك»، – دەپ جازدى ساياساتتانۋشى ءوزىنىڭ Facebook-پاراقشاسىندا.

ال، qazaquni.kz سايتى بولسا، جوعارىداعى جايتقا وراي  "التاي ابيبۋللاەۆ ورىسشا سويلەمەگەنى ءۇشىن قىزمەتىنەن قۋىلعان. ەندەشە ەڭ مەملەكەتشىل تۇلعا التاي ابيبۋللاەۆ ەكەن عوي! مۇنداي ۇلت نامىسىن ويلاعان ەردى ورنىنان الۋ ەمەس، سىرتقى ىستەر ءمينيسترى ەتىپ تاعايىنداۋ كەرەك!" دەپ جازدى.

Abai.kz