دزيۋدو جانە سامبو كۇرەستەرىنەن ەل نامىسىن قورعاپ جۇرگەن، 2 دۇركىن ازيا چەمپيونى، تۇركيا، گەرمانيا مەملەكەتتەرىندە وتكەن حالىقارالىق سايىستاردىڭ جەڭىمپازى، وڭتۇستىك قازاقستان وبلىستىق بەكزات ساتتارحانوۆ اتىنداعى دارىندى بالالاردىڭ سپورت مەكتەپ-ينتەرناتىنىڭ جاتتىقتىرۋشىسى  وتارباەۆ ايدوسپەن  سۇحبات.

-         وزىڭىزگە بەلگىلى كەز كەلگەن ماماندىققا ادامنىڭ بالا كۇنىنەن قىزىعۋشىلىعى بولۋ كەرەك دەپ جاتامىز. ءسىزدىڭ سپورتقا دەگەن قىزىعۋشىلىعىڭىز قاي كەزدەن باستالدى؟

-         مەن 1988 جىلى وڭتۇستىك قازاقستان وبلىسى تولە بي اۋدانىندا دۇنيەگە كەلگەنمىن. بارلىعى سياقتى مەن دە بالا كۇنىمنەن اتاقتى سپورتشى، چەمپيون بولۋدى ارمانداپ ءوستىم. مەن بۇل ارمانىمدى قازىرگى بەكزات ساتتارحانوۆ اتىنداعى دارىندى بالالارعا ارنالعان سپورت مەكتەبىندە جالعاستىردىم. ول ۋاقىتتا بەسىنشى سىنىپ وقىپ جۇرگەن كەزىم بولسا كەرەك. جالپى ومىرىمدەگى سپورتقا دەگەن قىزىعۋشىلىعىمدى اكەم وياتتى دەسەم دە بولادى. سەبەبى  اكەم دە سپورتتان الىس ەمەس. كەڭەس وكىمەتى تۇسىندا ەركىن كۇرەسپەن اينالىسىپ، بىرنەشە ۇلكەن جەتىستىكتەرگە جەتكەن ادام.

-         سپورتتىڭ قاي تۇرمەن اينالىسساڭ سول سپورتقا ءتان مىنەز قالىپتاسادى دەيدى بىلەتىندەر. دزيۋدو قانداي سپورت ءتۇرى؟ باسقا سپورت تۇرلەرىنەن ول نەسىمەن وزگەشەلەنەدى؟

-         مەنىڭ ويىمشا ادام قانداي سپورت تۇرىمەن اينالىسسا دا ول ونى تەك جاقسىلىققا تاربيەلەيدى. باۋىرجان مومىشۇلى اتامىزدىڭ جاقسى ءسوزى بار «تارتىپكە باعىنعان قۇل بولمايدى» دەگەن، سپورتتا دا ادامدى قاتاڭ ءتارتىپ تاربيەلەيدى. سوندىقتان سپورتتىڭ جامان ءتۇرى بولمايدى. ونى ادام جان دۇنيەسىمەن قالاۋى كەرەك. ال دزيۋدو ادامعا ۇستامدى بولۋدى، اينالاسىنداعى ادامدارعا دوستىق كوزقاراسپەن، ادامگەرشىلىك تۇرعىسىنان قاراۋدى ۇيرەتەدى. قانشا قارسىلاس بولىپ تۇرساق تا ءبىر-بىرىمىزگە دەگەن سىيلاستىعىمىزدى ەشقاشان بۇزباۋدى دا وسى سپورت سانامىزعا ءسىڭىردى.

-         سپورت سالاسىندا ۇلگى تۇتاتىن تۇلعاڭىز بار ما؟

-         سپورت سالاسىندا وزىمە ۇلگى تۇتاتىن ەكى ادام بار. ونىڭ ءبىرى دزيۋدو كۇرەسىنەن ۇلكەن جەتىستىكتەرگە جەتكەن بازاربەك دونباي دەگەن اعامىز. بازاربەك اعامىز وليمپيادا ويىندارىنا قاتىسقان وتە ەڭبەكقور سپورتشى. ودان بولەك ريو وليمپياداسىندا جۇلدەلى ورىنعا يە بولعان ءىنىمىز ەلدوس سمەتوۆ. ەلدوستى جاسى كىشى بولسا دا اتقارعان جۇمىسى مەن توككەن تەرىنە بولا قاتتى قۇرمەتتەيمىن. بۇگىنگى جاستارعا ناعىز ۇلگى بولاتىن ازامات دەپ ايتار ەدىم ونى.

-         ال ساياساتتا شە؟

-         سپورتتاعى ەڭ بيىك جەتىستىك چەمپيون بولۋ. ال مەن ساياساتتاعى چەمپيون دەپ ەلباسىمىزدى ايتار ەدىم. سەبەبى ءبىزدىڭ ەلىمىز ءۇشىن، جاستاردىڭ بولاشاعى ءۇشىن جاساپ جاتقان جۇمىستارى وتە كوپ ءارى وتە ماڭىزدى. قازىرگى ۋاقىتتىڭ وزىندە ەل سپورتشىلارىنا ۇلكەن مۇمكىندىك پەن جاعداي جاساپ بەرىپ وتىر. سول ءۇشىن دە سپورتىڭ جاناشىرى ەلباسىمىز نۇرسۇلتان ءابىشۇلى نازارباەۆ پەن وڭتۇستىك قازاقستان وبلىسىنىڭ اكىمى جانسەيىت تۇيمەباەۆقا ايتار العىسىم شەكسىز.

-         قازىرگى ۋاقىتتا نەمەن اينالىسىپ ءجۇرسىز؟ الداعى ۋاقىتتا قانداي جوسپارىڭىز بار؟

-         قازىرگى ۋاقىتتا جوعارىدا اتاپ وتكەن بەكزات ساتتارحانوۆ اتىنداعى دارىندى بالالارعا ارنالعان مەكتەپتە ءبىرىنشى دارەجەلى جاتتىقتىرۋشىمىن. شاكىرتتەرىم بىرنەشە رەسپۋبليكالىق، حالىقارالىق سايىستاردا جۇلدەلى ورىندارعا يە بولىپ ۇلگەردى. الداعى ۋاقىتتا ەلىمىزدىڭ نامىسىن قوعايتىن، كوك تۋىمىزدى جەلبىرەتەتىن سپورتشىلار دايارلاپ شىعارسام دەگەن ۇلكەن جوسپارىم بار. ال ءوزىم ءالى دە جارىستارعا قاتىسىپ تۇرامىن. سپورتپەن قازىر قوشتاسپايمىن. الدا بولاتىن قازاقستان چەمپيوناتىنا دايىندىق ۇستىندەمىن. بۇيىرتسا جۇلدەدەن ءۇمىتتىمىن.

-         بولاشاقتا سپورتتان ءۇمىتى بار جاس جەتكىنشەكتەرگە ايتار اقىل كەڭەسىڭىز؟

-         جاس سپورتشىلارعا تەك قانا العا ۇمتىلىڭدار دەگىم كەلەدى. ماقساتقا جەتۋ جولىندا ەرىنبەي ەڭبەك ەتسەڭدەر ول ءوز ناتيجەسىن مىندەتتى تۇردە بەرەدى. قازىر ەلىمىزدە قانشاما مىقتى سپورتشى اعالارىمىز بەن اپكەلەرىمىز بار سولاردىڭ ورنىن باساتىن، ەلىمىزدىڭ مارتەبەسىن وزگە ەلدە قورعايتىن ازاماتتار مەن ازاماتشالار سەندەر  بولۋلارىڭ كەرەك. سوندىقتان سپورتقا قادام باسسام دەپ جۇرگەن بارلىق جاس دوستارىما تەك قانا ساتتىلىك دەگىم كەلەدى. ەلىمىزدىڭ ەرتەڭى سىزدەر مەن بىزدەر ەكەنىن ۇمىتپايىق.

سۇحباتىڭىزعا ۇلكەن العىس بىلدىرەمىز!!!

سۇحباتتاسقان - سايلاۋحان ابىلاي

Abai.kz