جالپى، «سيني كيت» سياقتى ويىنداردان باستاپ، پورنوگرافياعا دا قاتىسى بار بۇكىل سايتتاردى بۇعاتتاپ تاستاۋعا بولادى. بۇل باستاما ءبىلىم مينيسترلىگى تاراپىنان دا قولداۋ تاۋىپتى. ال جوبانى جۇزەگە اسىرعان جەكە كومپانيا باعدارلامانى ءبىلىم وشاقتارىنا تەگىن ورناتۋعا كەلىسىپ وتىر.

ءار سايتتىڭ بۇرىشىندا جىلتىڭداپ تۇراتىن جىمىسقى سىلتەمەلەردەن بولەك، جاسوسپىرىمدەردى سۋيتسيدكە شاقىراتىن «سيني كيت» سياقتى ويىننىڭ دا كوپشىلىكتى ۋايىمعا سالىپ قويعانى بار. وقۋشىلاردى عالامتورداعى سونداي قاۋىپتى نارسەلەردەن ساقتاندىراتىن باعدارلامانى الماتىدا العاشقىلاردىڭ ءبىرى بولىپ №12 مەكتەپ-گيمنازيا ورناتقان. تيىمدىلىگىنە كوز جەتكەن سوڭ، باسقا مەكتەپتەر دە قولعا الىپتى.

“سيني كيت”، تاعى باسقا  ويىنداردىڭ جاسوسپىرىمدەر اراسىندا تارالۋىنا بايلانىستى، بۇل كومپانيامەن بايلانىسىمىزدى ارى قاراي جالعاستىردىق. مەدەۋ اۋدانىنداعى 28 مەكتەپتىڭ قازىر 20-سىنا وسى فيلتر قويىلىپ، جۇمىس ىستەپ تۇر”، – دەيدى مەدەۋ اۋداندىق ءبىلىم ءبولىمىنىڭ باسشىسى اقايشا ساپاروۆا.

جاڭا باعدارلاما بالالاردىڭ ومىرىنە قاۋىپ ءتوندىرىپ، ساناسىن ۋلايتىن سايتان سايتتاردى بۇعاتتاپ وتىرادى. ول ءۇشىن باعدارلامانىڭ قورىنا 6 ءتىل بويىنشا بەيادەپ سوزدەر مەن ادام ومىرىنە قاۋىپ توندىرەتىن تەرميندەر ەنگىزىلگەن. ونىڭ ىشىندە قازاق ءتىلى بويىنشا 3 مىڭعا تارتا ءسوز ءجۇر. كىمدە-كىم سولاردىڭ قايسىبىرىن جازا قالسا، ەكراندا ەسكەرتۋ شىعىپ، سايت اشىلماي قالادى.

“قازاق ءتىلىنىڭ مورفولوگياسىن قوستىق. قازاق ءتىلىنىڭ بوقاۋىز سوزدەرى كوپ ەكەن، سونىڭ ءبارىن قوستىق. قازاق تىلىندە  بالا پورنوگرافيا ارالاسقان سايتتاردى كورە المايدى. ءوز-وزىنە قول جۇمساتقىزاتىن سايتتاردى 100 پايىز كورە المايدى”، – دەيدى جوبا جەتەكشىسى ابىلايحان جاقانوۆ.

ءدال وسىنداي جوبا رەسەيدە 12 مىڭنان استام مەكتەپتە ورناتىلعان ەكەن. ال اتىشۋلى «سيني كيت» ويىنى تۋرالى كوپ ايتىلا باستاعالى بەرى وسى مەدەۋ اۋدانىندا ءبىر ءجاسوسپىرىمنىڭ سول ويىنعا تىركەلگەنى انىقتالىپتى. سوندىقتان بۇنداي عالامتور سۇزگىسىن مەكتەپ كومپيۋتەرلەرىنە ورناتۋعا جەرگىلىكتى باسشىلىق بىردەن كەلىسكەن.

اتا-انالار مەن مۇعالىمدەردىڭ كوڭىلىنەن شىققان بۇل باستامانى ەلىمىزدىڭ ءبىلىم مينيسترلىگى دە قولداپ وتىر. عالامتورداعى «سيني كيت» ويىنىنان بولەك، قاراپايىم بوقاۋىزعا دەيىن بۇعاتتاپ تاستايتىن باعدارلاما ازىرگە تەك مەكتەپ قابىرعاسىندا عانا تەگىن جۇمىس ىستەيدى. ال بالانى ۇيدەگى ينتەرنەت كەسەلىنەن تولىق قورعاۋ ءۇشىن اتا-انالارعا اقى تولەۋگە تۋرا كەلەدى.

شىڭعىس بەردىقوجا

Abai.kz