بۇگىندە قازاق قىزدارى ءتۇرلى سالادا كاسىبي مامان ەكەنىن دالەلدەپ ءجۇر. سولاردىڭ ءبىرى - ءبيبى ءشارىپوۆا. ول بۇگىنگى تاڭدا الەمدىڭ ديزاينەرلەر اراسىندا سۇرانىسقا يە. ال ماماندار بولسا، ونىڭ جوعارى دەڭگەيدەگى ءسان الەمىن باعىندىرۋعا قاۋقارى تولىعىمەن جەتەدى دەپ بولجاپ وتىر.

ونىڭ سۋرەتتەرى الەمگە ايگىلى Vogue, Elle جانە Harper's Bazaar دەپ اتالاتىن جۋرنالداردىڭ بەتىنە شىعىپ جۇرگەلى بىرنەشە جىل بولدى.ەكى جىل بۇرىن ول جاپوندىق Uniqlo كومپانياسىنىڭ وكىلىنە اينالدى.وسى كۇنى نيۋ-يوركتە ءوتىپ جاتقان جوعارى دەڭگەيدەگى ءسان اپتالىعىنا قاتىسۋدا.

ءبيبىنىڭ ايرىقشا ءمۇسىنى الەمدىك ماڭىزى بار ديزاينەرلەردىڭ نازارىن اۋدارىپ وتىرعانى جايدان جاي ەمەس. ونىڭ دەنە بىتىمىنە ماماندار ءنولىنشى ولشەمدەگى ءمۇسىن دەگەن باعا بەرگەن ەكەن. ياعني، بويى 180 سم بولا تۇرا، سالماعى 54 كەلىدەن اسپايتىن كورىنەدى.بۇل تۇستا مودەلدىڭ ءوزىن تاماقتان ەش شەكتەمەيتىنىن ايتا كەتۋ كەرەك.ال ساراپشىلاردىڭ ايتۋىنشا، ونىڭ تانىمالدىلىعى جىل وتكەن سايىن ارتا تۇسپەك. ول Malaymail Online بەرگەن سۇحباتىندا وتە جاقسى تاماقتاناتىنىن دا تىلگە تيەك ەتكەن.

 "كاستينگكە ەكى-ءۇش كۇن قالعاندا از تاماق ىشۋگە تىرىسام، بىراق باسقا ۋاقىتتا دۇرىس تاماقتانام. ءبىر كۇنمەن عانا ءومىر سۇرەمىن", - دەدى ول.

نۇرسۇلۋ نايمانوۆا

Abai.kz