ءابليازوۆ تاعى دا استاناعا "تەرگەۋگە" شاقىرتىلدى
قازاقستاندىق بانكير جانە وپوزيتسيونەر مۇحتار ءابليازوۆتى تاعى دا "تەرگەۋگە" استاناعا شاقىردى. رەسپۋبليكالىق سىبايلاسقان جەمقورلىققا قارسى قىزمەت مالىمەتى بويىنشا، قىزمەت ءابليازوۆتى تەرگەۋ الدىندا جاۋاپ بەرۋ ءۇشىن 15 اقپانعا استاناعا كەلۋىن سۇراعان.
سىبايلاسقان جەمقورلىقپەن كۇرەسۋ جونىندەگى ۇلتتىق بيۋرونىڭ مالىمدەمەسىندە بتا بانكتىڭ ديرەكتورلار كەڭەسىنىڭ بۇرىنعى توراعاسى مۇحتار ءابليازوۆ "قۇرعان قىلمىستىق توپتىڭ جەتى ميلليارد دوللاردان استام قاراجاتتى جىمقىرۋىن" تەرگەۋ جالعاسىپ جاتىر" دەلىنگەن.
ءابليازوۆ "قىلمىستىق توپ قۇرۋ جانە ونى باسقارۋ", "قىلمىستىق جولمەن الىنعان قاراجاتتى زاڭداستىرۋ", "بانكتىڭ قاراجاتىن زاڭسىز جولمەن پايدالانۋ", سونداي-اق وزگەنىڭ مۇلكىن يەمدەنۋ جانە قىزمەت بابىن اسىرا پايدالانۋ باپتارى بويىنشا كۇدىكتى اتانىپ وتىر.
وتكەن جىلدىڭ جەلتوقسانىندا مۇحتار ءابليازوۆ فرانتسۋز تۇرمەسىنەن بوساپ شىقتى. مۇندا ول 2013 جىلدىڭ جازىنان بەرى وتىردى. فرانتسيانىڭ مەملەكەتتىك كەڭەسى ءابليازوۆتى رەسەيگە بەرۋ جونىندەگى ۇكىمەتتىك شەشىمنىڭ كۇشىن جويىپ، ءىستىڭ ساياسي استارى بارىن مويىندادى.
بۇعان دەيىن ءابليازوۆتى سىبايلاسقان جەمقورلىققا قارسى قىزمەتكە 10 اقپاندا "تەرگەۋگە" شاقىرتقان ەدى، "بىراق ول بەلگىلەنگەن ۋاقىتتا كەلمەدى، ونىڭ سەبەبىن تۇسىندىرمەدى", دەلىنگەن بيۋرو مالىمدەمەسىندە.
اباي-اقپارات
