اكىمدەردىڭ رەيتينگىسى – ءاردايىم ەلدىڭ نازارىندا جۇرەتىن كورسەتكىشتەردىڭ ءبىرى.  ساياسات-Monitoring توبىنىڭ ساراپشىلارى ايماق باسشىلارىنىڭ جۇمىسىنا باعا بەرىپ، قاڭتار ايىنىڭ ناتيجەلەرى بويىنشا  رەيتينگ ازىرلەدى، - دەپ حابارلايدى "oinet.kz".

ءبىراز ايلاردان بەرى ءتىزىمدى الماتىنىڭ اكىمى باۋىرجان بايبەك باستاپ كەلەدى. بۇل جولى دا وڭتۇستىك استانانىڭ باسشىسى الدىنا جان سالمادى. البەتتە، الماتىنىڭ ۋنيۆەرسيادانى جوعارى دەڭگەيدە قابىلداي الۋى اكىمنىڭ دە ۇپايىن تۇگەندەي ءتۇستى. ەكىنشى ورىن اقتوبە وبلىسىنىڭ باسشىسى بەردىبەك ساپارباەۆقا بۇيىردى. بەردىبەك ماشبەكۇلىنىڭ شەتەلدىك ينۆەستورلاردىڭ الدىندا مايموڭكەلەمەي، ماسەلەنى توتەسىنەن قوياتىن قاسيەتى بار. بۇل جولى دا قىتاي كومپانياسىن سىنعا العان ساپارباەۆ شەتەلدىكتەردەن الەۋمەتتىك جاۋاپكەرشىلىكتى سەزىنۋىن تالاپ ەتتى.

 قىزىلوردا وبلىسىنىڭ اكىمى قىرىمبەك كوشەرباەۆ ۇزدىك ۇشتىككە ەنە ءبىلدى. بۇعان بەلگىلى دەڭگەيدە ءوڭىر باسشىسىنىڭ وزبەكستانعا جۇمىس ساپارىمەن بارۋى اسەر ەتكەنگە ۇقسايدى.  الدىڭعى ايدىڭ قورىتىندىسى بويىنشا ەكىنشى ورىن العان ەلوردانىڭ مەرى اسەت يسەكەشەۆ بۇل جولى ءتورتىنشى ورىنعا سىرعىدى. جالپى، استانا اكىمى قىزمەتىنە تاعايىندالعالى بەرى يسەكەشەۆ رەيتينگتىڭ ءبىرىنشى ورنىنا ءبىر رەت تە بولسىن شىعا الماپتى. 

بەسىنشى ورىن جامبىل ءوڭىرىن باسقارىپ تۇرعان كارىم كوكىرەكباەۆقا بۇيىردى. بايبەك، كوشەرباەۆ، ساپارباەۆتاي اۋىر سالماقتاعى ساياساتكەرلەرمەن يىق تىرەستىرە الماسا دا كوكىرەباەۆتىڭ اكىمدەر كورپۋسىنداعى جاعدايى ازىرشە جامان ەمەس.

وڭتۇستىكتەگىلەر بولسا جانسەيىت تۇيمەباەۆتىڭ رەيتينگتەگى جاعدايىنا الاڭداپ وتىراتىنى ايتپاسا دا تۇسىنىكتى. جالپى، قىزمەتكە جاڭادان تاعايىندالعان اكىمنىڭ ادەتتە رەيتينگتىڭ تومەنگى ساتىسىنا ورنالاساتىنى زاڭدىلىق. تۇيمەباەۆقا دەيىن ءوڭىردى باسقارعان بەيبىت اتامقۇلوۆ تا العاشىندا اۋتسايدەرلەردىڭ قاتارىندا ءجۇرىپ، قىزمەتىنەن كەتەر ۋاعىندا 6-ورىنعا كوتەرىلىپ ۇلگەرگەن ەدى. ال وڭتۇستىكتى التى جىل باسقارعان اسقار مىرزاحمەتوۆ باستاپقىدا رەيتينگتىڭ بەل ورتاسىندا جۇرسە، كەيىنگى كەزدەرى ۇزدىك ۇشتىككە ءجيى كىرەتىن بولدى.  

جانسەيىت قانسەيىتۇلى اكىمدەر رەيتىنگىسىندەگى «مارافونىن» بىلتىر قاراشا ايىندا 13-ورىننان باستادى. جەلتوقساننىڭ قورىتىندىسى بويىنشا ءبىر ساتى جوعارىلاعان ول سوڭعى ايدىڭ ناتيجەسىمەن 9-شى ورىنعا تابان تىرەدى. اكىمدەر كورپۋسىنا جاڭادان كىرگەن شەنەۋنىك ءۇشىن جامان كورسەتكىش ەمەس. ەندىگى ماسەلە، اۋتسايدەرلەر توبىنان مەيلىنشە الىستاپ، ۇزدىكتەر قاتارىنا كىرۋ. بۇعان تۇيمەباەۆتىڭ بەدەلى مەن ىسكەرلىگى جەتەتىنە ەل ۇلكەن ءۇمىت ارتىپ وتىر.

ءتىزىمنىڭ سوڭىندا بۇل جولى دا پاۆلوداردىڭ اكىمى بولات باقاۋوۆ تۇر.  

اباي اقپارات