NYT قازاقستاندى 2017 جىلدىڭ تۋريستىك مەكەندەرى تىزىمىنە قوستى
امەريكالىق New York Times (NYT) گازەتى قازاقستاندى الەمنىڭ تۋريستىك تۇرعىدا قىزىقتى مەكەندەرىنە ارنالعان جىل سايىنعى تىزىمىنە قوستى. بيىل بۇل تىزىمگە 52 مەكەن ەنگىزىلگەن.
باسىلىم قازاقستاندى بيىل حالىقارالىق EXPO-2017 كورمەسى وتكىزىلەتىن مۇناي ءوندىرۋشى ەل رەتىندە سيپاتتادى. قازاقستان اۋماعى ارقىلى وتەتىن باتىس تيان-شان تاۋ سىلەمدەرىندە يۋنەسكو-نىڭ الەمدىك مۇرالار تىزىمىنە ەنگىزىلگەن نىساندار كوپ ەكەنى جازىلعان.
گازەت قازاقستاننىڭ تۋريستىك كەستەگە ىلىگۋىنە بريتان اكتەرى ساشا بارون كوەننىڭ ويدان قۇراستىرعان پەرسوناجى بورات ساعديەۆتىڭ دە ۇلەسى بارىن اتاپ ءوتتى. دەگەنمەن باسىلىم استاناداعى قىمبات قوناق ۇيلەردى تىلگە تيەك ەتە وتىرىپ، قازاقستاننىڭ "جىبەك جولىنداعى سالتاناتتى مەكەنگە" اينالعىسى كەلەتىنىن جازدى.
بۇل تىزىمدە كانادا ءبىرىنشى تۇر. چيليدەگى اتاكاما ءشولى، ۇندىستانداعى اگرا قالاسى، شۆەيتسارياداعى تسەرماتت شيپاجايى جانە بوتسۆانا العاشقى بەستىككە ەنگىزىلگەن.
اباي-اقپارات
