قازاقتىڭ ۇلى عالىمى ەدىگە تۇرسىنوۆتى قر ۇلتتىق كىتاپحاناسىنان ەل-جۇرت بولىپ اقتىق ساپارعا ابرويمەن شىعارىپ سالدىق. قارالى جيىندى اسىلدىڭ سىنىعى، تۇلپاردىڭ تۇياعى، مادەنيەتتانۋشى مۇرات اۋەزوۆ جۇرگىزىپ وتىردى. الماتى قالاسى تىلدەردى دامىتۋ باسقارماسىنىڭ باسشىسى ماماي احەت الماتى قالاسى اكىمى باۋىرجان بايبەكتىڭ قازاقتىڭ قابىرعاسىن قايىستىرعان قازاعا ارنالعان كوڭىل ايتۋ حاتىن وقىپ بەردى. قارالى جيىننىڭ ۇيىمداستىرۋشىلىق جۇمىسىندا ۇلكەن قولداۋ كورسەتكەن الماتى قالاسى جاستار ساياساتى جونىندەگى باسقارما باسشىسى ەلنۇر بەيسەنباەۆ باستاعان جاستارعا دەگەن ريزاشىلىعىمىز شەكسىز. مارات سەمبين، مەرۋەرت ابۋسەيىتوۆا، كەنجەحان ماتىجان، ەسەنعالي راۋشانوۆ، ءالميرا ناۋرىزباەۆا، حاكىم ومار، قايرات جاناباەۆ جانە تاعى باسقا تانىمال تۇلعالار تەبىرەنە سويلەپ، مارقۇم ەدىگە تۇرسىنوۆتىڭ ادامگەرشىلىك بولمىسى، عالىمدىق عالامات دەڭگەيى، باسىنا تۇسكەن تاعدىر تاۋقىمەتى جونىندە ءسوز سويلەدى.

ەدىگە اعامىزدىڭ دەنەسى "كەڭساي-2" زيراتىندا جەر قويناۋىنا تاپسىرىلدى. ودان كەيىن ءتۇس مەزىگىلىندە "وتىرار" مەيرامحاناسىندا مارقۇمعا ارنالىپ اس بەرىلدى. ول استى ونەرتانۋشى ەرلان تولەۋتاي اعامىز ماعىنالى ەتىپ جۇرگىزە ءبىلدى. مۇندا دا كوز كورگەن جۇرت ەدىگە دارىعۇلۇلىنىڭ جاقسى قاسيەتتەرىن، ۇستازدىق مەيرىمىن، عالىمدىق سۇڭعىلالىعىن، تىنىمسىز ەڭبەكقورلىعىن ايتىپ تارقاستى.

كوپشىلىك ۇلى عالىمنىڭ ءتىرى كەزىندە ەلەنبەگەنىن، ءتىپتى تالانتتى بولعانى ءۇشىن اياعىنان شالۋشىلاردىڭ كوپ بولعانىن ايتىپ نالىدى. دارا تۇلعانىڭ قازاسىنىڭ ءوزى كوزى ءتىرى جاقسىلارىمىزدى باعالاۋدى ۇندەپ تۇرعانداي، تۇگە.

ەدىگە تۇرسىنوۆتىڭ قازاسى قازاق رۋحانياتى ءۇشىن ورنى تولماس قايعى. بىراق، ارتىندا ولمەيتۇعىن ءسوز قالدىرعان عالىمنىڭ ءىسى ءاردايىم بولاشاققا ساۋلە ءتۇسىرىپ، جول سىلتەپ تۇرماق.

ءسوز سوڭىندا ارۋاقتار ەلىنە سوڭعى ساپارىن سالتاناتتى ەتىپ وتكىزۋگە ەڭبەك سىڭىرگەن ەدىگە تۇرسىنوۆتىڭ (تۋعان قارىنداسىنىڭ قىزى) جيەنى سابيناعا، ونىڭ سۇيىكتى شاكىرتى قايرات جاناباەۆقا، قيىن ساتتە قول ۇشىن سوزعان مادەنيەتتانۋشى مۇرات اۋەزوۆكە، قر ۇلتتىق كىتاپحانا ديرەكتورى جانات سەيدۋمانوۆقا، الماتى قالاسى تىلدەردى دامىتۋ باسقارماسنىڭ باسشىسى ماماي احەتكە، الماتى قالاسى جاستار ساياساتى باسقارماسىنىڭ باسشىسى ەلنۇر بەيسەنباەۆقا، "تەمىرقازىق" تۇرىكتانۋ ورتالىعىنىڭ ديرەكتورى حاكىم ومارعا، جەرلەۋ شىعىندارى بويىنشا قارجى قوسقان كاكەن قامزاعا، ساكەن سەيفۋللينگە، داستان ەلدەسوۆكە، اسيا مۇحامەدوۆاعا، ەربول قۇرمانباەۆقا، مارال تومپيەۆكە، احات رازاققا، "داۋلەت" شارۋاقوجالىعىنىڭ ديرەكتورى وتەمىس ماحانوۆقا، مادەنيەتتانۋشى ءالميرا ناۋرىزباەۆاعا، ناعىز پاتريوت ازامات تەمىربە ىزدىباەۆقا، "تۇركى الەمى" گازەتىنىڭ قۇرىلتايشىسى داريعا جۇنىسكە جانە تاعى باسقا اتى اتالماعان جانى جومارت، كوڭىلى ءمارت كىسىلەرگە مارقۇمنىڭ ارۋاعى رازى بولسىن دەيمىز. "ارۋاق رازى بولماي، ءتىرى بايىمايدى".

ارمان اۋباكىر 

Abai.kz