وڭتۇستىك قازاقستان وبلىسىنىڭ تۇلكىباس اۋدانى – 100 مىڭنان استام حالقى بار ورتاشا اۋدان. تاۋلى وڭىردە ورنالاسقان. تابيعاتى جاڭبىرلى. مۇندا باۋ-باقشا ونىمدەرى كوپ وندىرىلەدى. اسىرەسە، الماسىمەن تانىمال. مۇندا وسىرىلگەن المانىڭ ءدامى ءتىل ۇيىرەدى. دەگەنمەن، تەك قانا الما ءوندىرىپ قانا قويۋ از.

اۋداندا ءتۇرلى باۋ-باقشا داقىلدارىمەن قاتار، ارپا-بيداي دا ءوسىرىلۋى ءتيىس. وسى ولقىلىقتى جوندەۋ ءۇشىن تۇلكىباس اۋدانىنداعى شارۋا قوجالىقتارى مەن سەرىكتەستىكتەرگە «اگروبيزنەس-2020» باعدارلاماسى اياسىندا مول قاراجات ءبولىندى.

وسى قاراجاتتان اۋدانداعى تۇلكىباس پوسەلكەلىك وكرۋگىندە «التىن ءدان» جشس ءوز ۇلەسىن الىپ، جۇمىسىن قارقىندى تۇردە دامىپ كەلەدى. «التىن ءدان» جشس ءوز جەرىنەن جانە وزگە دە شارۋا قوجالىقتارى وسىرگەن ارپا-بيدايدان ءتۇرلى سورتتاعى ۇن مەن كەبەك شىعارادى.

زاۋىت ىرگەسى 1987 جىلى قۇرىلعان. زاۋىت اۋماعى 11,2 گەكتاردى قۇرايدى، 12 تسەحى بار. مۇندا ءار ماۋسىمدا 238 ادام جۇمىس اتقارادى. ۇندى وزبەكستان، تاجىكستان، قازاقستان رەسپۋبليكاسى تۇتىنادى. سەرىكتەستىك باسشىسى د.ايكەەۆ زاۋىتتىڭ تىنىس-تىرشىلىگىن ايتىپ بەردى. تۇلكىباس پوسەلكەلىك وكرۋگىندە 11 743 ادام تۇرادى ەكەن. ولار ءجيى جۇمىس سۇراپ كەلەتىن كورىنەدى. مۇمكىندىگىنشە، ولاردى جۇمىسپەن قامتىپ وتىرعانىن ايتتى.

قازىرگى تاڭدا «التىن ءدان» سەرىكتەستىگىنىڭ وندىرگەن ۇنى مەن كەبەگىنە تاپسىرىس ءجيى تۇسەدى. كوپتەگەن شارۋا قوجالىقتارى اتالعان سەرىكتەستىكتەن ۇزدىكسىز كەبەك الدىرىپ تۇرادى. ولار شارۋالارعا كەبەكتى جەڭىلدەتىلگەن باعامەن بەرىپ، شارۋالاردىڭ بيزنەسىن وركەندەتۋگە دە ءوز سەپتىكتەرىن تيگىزىپ جاتىر. ال، ۇندى شىمكەنت، تاراز قالالارىنىڭ تۇرعىندارى دا ارنايى تاپسىرىسپەن الدىرتىپ تۇرادى.

اباي-اقپارات