ول جيىنعا وبلىس اكىمى جانسەيىت تۇيمەباەۆ قاتىسقان.  كۇن تارتىبىندە وبلىستىӊ 2016 جىلدىӊ سوڭعى ايلارداعى الەۋمەتتىك-ەكونوميكالىق دامۋ قورىتىندىسى، "نۇرلى جول" جانە "جۇمىسپەن قامتۋ 2020" باعدارلامالارىنىӊ ورىندالۋ بارىسى قارالدى.

ءبىرىنشى ماسەلە بويىنشا ءسوز العان وبلىستىق ەكونوميكا جانە بيۋدجەتتىك جوسپارلاۋ باسقارماسىنىӊ باسشىسى ر.مۋلكەمانوۆ ەسەپتى مەرزىم ىشىندە ونەركاسىپ ءونىمىنىӊ كولەمى 574,2 ملرد. تەӊگەنى قۇراپ، اۋىل شارۋاشىلىعىنىӊ جالپى ءونىمى 319,6 ملرد. تەӊگەگە، قۇرىلىس جۇمىستارىنىӊ كولەمى 125,3 ملرد. تەӊگەگە جەتكەنىن باياندادى. دەسە دە، باسقارما باسشىسىنىӊ ايتۋىنشا، وӊىرگە ينۆەستيتسيا تارتۋدا ناتيجە تومەن. ياعني، 9 ايدا نەگىزگى قورعا 240,8 ملرد. تەӊگە ينۆەستيتسيا باعىتتالىپ، 2015 جىلدىӊ ءتيىستى كەزەӊىنە 82,4% قۇرادى.

كۇن تارتىبىندەگى ەكىنشى ماسەلە اياسىندا وبلىستىق قۇرىلىس باسقارماسىنىӊ باسشىسى س.پولاتوۆ بيىلعى جىلعا جوسپارلانعان 14 نىساننىӊ 7-ندە قۇرىلىس جۇمىستارى وندىرىستىك كەستەگە ساي ءجۇرىپ جاتقانىن جەتكىزسە، "نۇرلى جول" مەملەكەتتىك باعدارلاماسى بويىنشا 9 جوبانى ىسكە اسىرۋ جوسپارلانعانىن ايتقان وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىӊ باسشىسى م.مارايىم بولىنگەن قارجىنىӊ 96 پايىزعا يگەرىلىپ، جۇمىستار جىل سوӊىنا دەيىن تولىق ورىندالاتىنىن باياندادى.

سەلەكتورلىق وتىرىستا "جۇمىسپەن قامتۋ 2020" باعدارلاماسىنىӊ ورىندالۋ بارىسى بويىنشا بايانداما جاساعان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىӊ باسشىسى ءا.تەمىرباەۆا جىل باسىنان بەرى 54570 ادامعا باعدارلاما قاتىسۋشىسى رەتىندە قولداۋ كورسەتىلگەنىن حابارلادى. ونىӊ ىشىندە، 19965 ادام وزدىگىنشە جۇمىسپەن قامتىلىپ، جىلدىق جوسپاردىӊ 113 پايىزىن قۇراعان.

بايانداماشىلاردى مۇقيات تىӊداعان ايماق باسشىسى كۇن تارتىبىندە قارالعان ءاربىر ماسەلە بويىنشا سالا جەتەكشىلەرىنە تاپسىرمالار جۇكتەدى. اسىرەسە، جانسەيىت قانسەيىتۇلى ەكونوميكالىق ينديكاتورلار بويىنشا جۇمىستاردىӊ ءتيىستى دەӊگەيدە ورىندالىپ، وبلىسقا قارجى تارتۋدا ينۆەستورلارعا جاعداي جاسالۋ قاجەتتىگىن اتاپ ءوتتى. قۇرىلىس نىساندارىن سالىپ، كوممۋنالدىق جۇيەلەردى رەتتەۋدە مەرزىمىنەن كەشىككەن مەردىگەرلەردى انىقتاپ، جالپى تىزىمنەن شىعارۋدى ايتسا، جۇمىسپەن قامتۋ ماسەلەسىندە بەرىلگەن تاپسىرمالار ورىندالماي جاتقان اۋدان، قالالاردىӊ ءتىزىمىن جاساپ، اكىمدىكتىӊ اپپاراتىنا بەرۋدى تاپسىردى.

اباي اقپارات