وڭتۇستىك قازاقستان وبلىسى اۋىلشارۋاشىلىق باسقارماسىنىڭ مالىمەتتەرىنە سۇيەنسەك، ءوڭىر بويىنشا سۋارمالى جەر كولەمى 566 مىڭ گەكتاردى قامتيدى ەكەن. بۇل كۇندەرى ونىڭ 462 مىڭ گەكتارىن ەگىن شارۋاشىلىعى ماقساتىندا پايدالانادى.

ال، 123 مىڭ گەكتار جەر بوس قاراۋسىز جاتىر. وبلىستاعى اۋىل شارۋاشىلىعى ماماندارى بوس جاتقان جەرلەردى ءتيىمدى پايدالانۋ، اسىرەسە تۇزدانعان جەرلەردى قايتا قالپىنا كەلتىرۋ ماقساتىندا تىڭ جوبالار ازىرلەۋدە. جاقىندا وتىرار اۋدانىندا جۇگەرى ەگۋگە كەدەرگى كەلتىرەتىن جانە توپىراق ەروزياسىنا شالدىققان جەرلەردى قۇنارلاندىرۋ ءۇشىن ماسەلە كوتەرىلدى. اۋىل شارۋاشىلىعى ماماندارى مەن جەر ەمىپ، جان باعىپ وتىرعان شارۋالار سەميناردا كەزدەستى.

وتىرار اۋدانى و باستان ەگىننەن باس الماي، كورسەتكىشتەرى الدىڭعى قاتاردان كورىنگەن اۋدان. باستىسى بيداي، جۇرەگى جانە باسقا دا ءداندى داقىلداردى وسىرۋگە جەتەتىن سۋ تاپشىلىعىن وڭتايلى شەشۋ جولدارى قاراستىرىلسا، جەردىڭ قۇنارى ارتسا دەپ كەلگەن ديحانشىلار بۇل سۇراقتارىنىڭ جاۋابىن جيىن سوڭىندا تاپقانداي. وتىرار اۋدانىنىڭ اكىمى ەرلان ايتاحانوۆ: - كۇرمەۋى قيىن ماسەلەگە اينالعان سۋ تاپشىلىعى ارىس-سىرداريا سۋ قويماسى ىسكە قوسىلسا تۇبەگەيلى شەشىلەدى، - دەپ، شارۋالاردى ءبىر سەرپىلتىپ قويدى.

قازىرگى تاڭدا اتالعان سۋ قويماسىن ىسكە قوسۋ باستى تالاپتاردىڭ بىرىندە تۇر. سونىمەن قاتار، بۇگىندە وتىراردا 1000 گەكتار جەرگە جاڭا تەحنولوگيانى يگەرۋ ارقىلى جۇگەرى ەگىلگەن. ءونىم كولەمى بىلتىرعىعا قاراعاندا بيىل تومەن. ەڭبەك ونىمدىلىگى مەن ساپانى ارتتىرۋ ءۇشىن درەناجدى جۇيەنى ەنگىزۋ كەرەك. ول ءۇشىن 368 شاقىرىم جەردى يگەرۋدىڭ وزىنە 2,2 ميلليارد قارجى قاجەت. وقو اۋىل شارۋاشىلىعى باسقارماسىنىڭ باسشىسى سەرىك تۇربەكوۆتىڭ ايتۋىنشا سۋارمالى جەرلەردى يگەرۋ ءۇشىن يرريگاتسياسىز جۇيەگە كەلتىرۋىمىز كەرەك. ياعني، كانالداردى بەتونداپ، سۋدى جۇيەلى جەتكىزەتىن جاعدايعا كوشىپ، ءبىر جاعىنان سۋدى ۇنەمدەپ، ەكىنشى جاعىنان درەناجدى قوسۋ قاجەت. ماماندار قالايدا وبلىسىمىزداعى ەگىن شارۋاشىلىعىنداعى سۋارمالى جەرلەردىڭ ماسەلەسى وڭ شەشىلەتىنىنە سەنىمدى.

اباي اقپارات