شاردارا ساپارىندا ءوڭىر باسشىسى الدىمەن ء«يىرجار اگرو» جشس-ءنىڭ تامشىلاتىپ سۋارۋ ءادىسى ەنگىزىلگەن ماقتا شارۋاشىلىعى جوباسىمەن تانىستى. ەگىستىك كولەمى 220 گەكتار بولعان بۇل شارۋاشىلىقتا 10 ادام جۇمىسپەن قامتىلعان. وبلىس اكىمى سونداي-اق يننوۆاتسيالىق تەحنولوگيانى قولدانۋ ارقىلى ەگىلگەن جۋا القابىندا دا بولدى. 

مۇنداعى ديقاندار پياز ەگۋدىڭ سونى ءادىسىن مەڭگەرىپتى. گوللانديالىق تەحنولوگيا بويىنشا ءوسىرىلىپ جاتقان جۋالار ەكى ەسەگە دەيىن ارتىق ءونىم بەرەدى ەكەن. قولى كەتپەننەن بوساپ، پايداعا قارىق بولىپ جاتقان شارۋالار جاڭا ءادىستىڭ ءتيىمدى تۇسى كوپ ەكەنىن ايتادى.

پياز ەگۋمەن اتى شىققان «جاۋشىقۇم» شارۋا قوجالىعىنىڭ توراعاسى اسحانباي بەكپەنبەت گوللانديالىق ءتاسىلدىڭ كەرەمەتىن وسى كۇندە-اق كورە باستاپتى. بۇيىرتسا، 25 گەكتار جەرىنەن ەڭ كەمى 100 توننا جۋا الماق. شەتەلدىك ءادىستىڭ ارتىقشىلىعى سول، ەككەن پيازىڭىز ۇلكەن نە ۇساق بولىپ كەتپەي، بىرقالىپتى وسەدى. نەگىزگى قۇپياسى ونى ەگۋ تەحنولوگياسىندا دەيدى شارۋا. ايتۋىنشا ارالارى 4 سم جيىلىكپەن جۇيەكتىڭ ۇستىنە عانا ەگىلەدى. بۇرىندارى جاپپاي سەۋىپ تاس­تاي سالاتىن بولسا كەرەك. ول ءۇيىلىپ قالاتىن كورىنەدى. 

شاردارا اۋدانى بويىنشا سونى ءادىستى ازىرگە وسى «جاۋشىقۇم» شارۋا قوجالىعى عانا پايدالانىپ وتىر. ءبىرىنشى رەت قولعا الىنعان شارۋانىڭ بارىسىنا وبلىس باسشىلىعى ابدەن قانىقتى. پىسكەن ءونىمدى ءتيىمدى باعامەن وتكىزۋ جاعى دا ويلاستىرىلعان. وزگە اۋداندارعا جىلىنا مىڭ توننا جۋا جىبەرۋ جوسپارلانسا، رەسەيمەن دە كەلىسىم-شارت جاسالىنىپ قويىپتى.

Abai.kz