قازىرگى كەزدە قازاق ەستراداسىندا ءان سالىپ جۇرگەن جاس قىزداردىڭ كوبى كوكىرەگىن اشىپ بەينەلكيپكە تۇسۋگە اۋەس قوي. «قازاق قىزدارىن كليپكە ءتۇسىرۋ ءۇشىن ءبىر توسەك جەتكىلىكتى، ءوز وزدەرىن ايمالاپ اندەرىن ايتا بەرەدى» دەگەن وزبەك پروديۋسەرىنىڭ سوزىنە نامىستانامىز ارينە، بىراق بۇل ءسوزدىڭ ار جاعىندا شىندىقتىڭ جاتقانىن دا جاسىرا المايمىز. تەلەديداردان دەنە بىتىمىندە ءبىر ءمىن جوق قىزداردى كورگەن جىگىتتەردىڭ نە ويلايتىنىن بىزگە ءتۇسىنۋ قيىن شىعار، بىراق ءبىرازىمىز ارۋلارىمىزدىڭ قوس انارىن كورگەندە «ومىراۋى وزىنىكى مە ەكەن؟» دەپ كۇدىكتەنەتىنىمىز راس. ويتكەنى قازىرگى زاماندا اقشاڭ بولسا، ءمىنسىز ءمۇسىن يەسى بولىپ شىعا كەلەسىڭ. بۇگىن «الاش ايناسى» ءمىنسىز ءمۇسىن ءۇشىن قانشا اقشا كەرەك ەكەنىن ەسەپتەپ كورگەن ەدى.

 زاماننىڭ تالابىنا ساي دەيمىز بە، قازىرگى كەزدە ءبىزدىڭ ەلىمىزدە پلاستيكالىق حيرۋرگيا جاقسى دامىپ كەلەدى. ونىڭ ۇستىنە مەديتسينانىڭ وسى ءبىر سالاسى ماماندار ءۇشىن جاقسى تابىس كوزى. ادامنىڭ سىرت كەلبەتىندەگى، دەنەسىندەگى كەمشىلىكتەردى تۇزەپ، سۇلۋ بولۋىنا كومەكتەسەتىن مامانداردىڭ ايتۋىنشا، ادامنىڭ جانى دا، ءتانى دە، دەنە ءبىتىمى دە سۇلۋ بولۋى كەرەك. ادام ءوزىن سۇلۋ سەزىنگەندە عانا جانى جايلانىپ، ءوزىن ەرەكشە باقىتتى سەزىنەدى.

 بۇگىندە ەلىمىزدەگى ءىرى قالالاردىڭ ورتالىقتارىنان كوپتەگەن ەستەتيكالىق مەديتسينا ورتالىقتارى اشىلىپ جاتىر. ءمۇنداي كلينيكاعا، ارينە، نەگىزىنەن قالتاسىندا اقشاسى بار ادامدار بارادى جانە ەل الدىندا جۇرگەن ارتىستەر باراتىنى بەلگىلى.

 ساحناعا شىققان ارتىستەردىڭ ءبارى سۇلۋ، ۇلكەنى دە، كىشىسى دە، جاسى دا، كارىسى دە. ال ءانشى، اكتەر، اكتريسا، تەلەجۇرگىزۋشىلەردىڭ الەۋمەتتىك جەلىگە جارىسا سالاتىن سۋرەتتەرىن ايتساڭىزشى. الپىسقا تاياپ قالعان روزا رىمباەۆا 30 جاستاعى كەلىنشەكتەي، 50 جاستان اسىپ كەتكەن ماقپال ءجۇنىسوۆادان ءوز جاسىنان الدەقايدا جاس كورىنەدى. ال بايان ەسەنتاەۆا حانىمنىڭ سۇلۋلىعىنا ءتىپتى كوز تويمايدى. ايتپاقشى، ارتىستەردىڭ اراسىندا پلاستيكالىق وتا تۋرالى اڭگىمە قايدان شىقتى دەسەڭىز، ءبارى وسى باياننان باستالدى. جاقىندا الەۋمەتتىك جەلىدە تانىمال تەلەجۇرگىزۋشى جانە پروديۋسەر بايان ەسەنتاەۆا ءوزىن پلاستيكالىق وتا جاسادى دەپ سىناعاندارعا Instagram جەلىسى ارقىلى جاۋاپ بەرگەن ەدى. ءوزىنىڭ رەسمي پاراقشاسىندا پروديۋسەر “مۇرنىم دا، كوزىم دە، كىرپىكتەرىم دە وزىمدىكى” دەپ سەندىردى.

 “شىن ءسوزىم. مەن مۇرنىمنىڭ ءپىشىنىن وزگەرتكەن ەمەسپىن، لينزا دا تاقپايمىن، پلاستيكالىق وتا جاساتقان جوقپىن، كىرپىك جابىستىراتىن دا ادەتىم جوق، ەرىنىمدى ۇلكەيتكەن ەمەسپىن، مەڭ دە سالمايمىن، تاعى دا نە بار؟ فوتودا مەن 20 جاستامىن”، دەپ جازدى.

 بايان ەسەنتاەۆانىڭ سۇلۋلىعىنا كۇمان كەلتىرگىمىز كەلىپ وتىرعان جوق. الايدا شوۋ-بيزنەس الەمىندە جۇرگەن قىز-كەلىنشەكتەرىمىز وزدەرىنىڭ ەستەتيكالىق مەديتسينا كومەگىنە جۇگىنەتىندەرىن جاسىرىپ، ءبارى تابيعي سۇلۋمىز دەپ ماقتانىپ، اقتالعاندارىنا سەنۋ قيىن.

الەمدىك شوۋ-بيزنەس وكىلدەرى وزدەرىنىڭ پلاستيكالىق وتا جاساتاتىندارىن جاسىرمايدا دا، قايتا جارنامالايدى.

(بويانباعان بايان)

جاقىندا ءبىر قۇربىممەن اڭگىمەلەسىپ قالىپ ەدىم، ول ءوزىنىڭ كوكىرەگىن ۇلكەيتۋ ماقساتىندا وتا جاساتقانىن ايتتى. «بىلەسىڭ بە، وسى وتانى جاساتۋعا قانشا ۋاقىت باتىلىم جەتپەي ءجۇردى. بىراق ايتەۋىر شەشىم قابىلداپ، ومىراۋىمدى ۇلكەيتكەننەن كەيىن ءومىرىم وزگەردى. بۇرىن ومىراۋىم كىشكەنتاي بولعاندىقتان قاتتى قىسىلاتىنمىن. ونىڭ ۇستىنە بالا ەمىزگەننەن كەيىن كوكىرەگىم ءتىپتى كىشىرەيىپ كەتتى. كۇيەۋىم دە جاس قىزدارعا كوز سالىپ، ولاردىڭ مۇسىندەرىنە قاراپ تامسانىپ وتىراتىنىن كورگەندە ءوزىمدى قور سەزىنىپ كەتەتىنمىن. سوندىقتان ماقساتتى تۇردە اقشا جيناپ وتا جاساتتىم» دەيدى ول. قۇربىم الماتى قالاسىندا ورنالاسقان ەستەتيكالىق مەديتسينا ورتالىعىندا جاساتتى. ونىڭ ايتۋىنشا، وسى كلينيكادا جاسالاتىن وتانىڭ 70-80 پايىزى كوكىرەكتى ۇلكەيتۋ ءۇشىن جاسالادى ەكەن.

 قازىر الەۋمەتتىك جەلى ارقىلدى دا، عالامتورداعى قاپتاعان سايتتار ارقىلى دا ەستەتيكالىق مەديتسينا ورتالىقتارىنىڭ قىزمەتى تۋرالى وپ-وڭاي اقپارات الۋعا بولادى. ءبىز دە كلينيكالاردىڭ بىرىنە حابارلاسىپ كورگەن ەدىك. وتە مادەنيەتتى جاۋاپ بەرگەن مەدبيكە ورتالىقتا بارىنشا ساپالى قىزمەت كورسەتىلەتىنىن ايتتى. مەدبيكەنىڭ سوزىنەن تۇسىنگەنىمىز، ومىراۋىڭىزدى ۇلكەيتۋ ءۇشىن قالتاڭىزدا كەمىندە 600 مىڭ تەڭگەڭىز بولسا بولعانى.

 مامانداردىڭ ايتۋىنشا، جاساندى ومىراۋمەن بالا ەمىزۋگە دە بولادى ەكەن. ەڭ باستىسى وتا ءساتتى جاسالسا بولدى. وسى ۋاقىتقا دەيىن بىرنەشە بالا دۇنيەگە اكەلسە دە، ءمۇسىنى بۇزىلمايتىن ءارتىس كەلىنشەكتەرگە تاڭعالىپ قاراۋشى ەدىك. سويتسەك، ماماپلاستيكانىڭ قۇدىرەتى ەكەن عوي...

اۆتور: اينۇر نۇرسابەت

دەرەك كوزى: http://alashainasy.kz