2015 جىلدىڭ مامىر ايىنىڭ 3-7-ءسى ارالىعىندا الماتى – تالدىقورعان – اياگوز – اقجار مارشرۋتتارى بويىنشا قازاق حاندىعىنىڭ قۇرىلۋىنىڭ 550 جىلدىعىنا ارنالعان «بىرلىگى مىقتى ەل وزادى» اتتى شەرۋ وتكىزىلەدى. بۇل تۋرالى استانادا وتكەن ءباسپاسوز ءماسليحاتىندا تالقىلاندى.

الماتىدان باستاۋ الاتىن شەرۋ ءتورت كۇن ىشىندە تۋ ۇستاپ، ەل قورعاعان ەر داۋلەتباي باتىرعا شىعىس قازاقستان وبلىسى، تارباعاتاي اۋدانىنىڭ ورتالىعى – اقجار كەنتىندە ەسكەرتكىش تۇرعىزۋمەن قورىتىندىلانباق. مادەني، رۋحاني ماڭىزى بار ءىس-شاراعا قازاق حاندىعىنىڭ 550 جىلدىعىن وتكىزۋگە ارنالعان مەملەكەتتىك كوميسسيانىڭ مۇشەلەرى، تانىمال تاريحشىلار جانە شەرۋدى ۇيىمداستىرۋشىلار قاتىسادى.

شارانىڭ باستى ۇيىمداستىرۋشىسى – «ۇلى دالا قىراندارى» رەسپۋبليكالىق قوعامدىق الەۋمەتتىك-مادەني قوزعالىسىنىڭ تەڭ توراعالارى  سادىبەك تۇگەل مەن مارات نابيەۆ. سونىمەن قاتار،  ەر-داۋلەتباي ەسكەرتكىشىن سالۋ يدەياسىنىڭ اۆتورى، «تۋ ۇستاپ ەل قورعاعان ەر-داۋلەتباي» قايىرىمدىلىق قورى، شقو تارباعاتاي اۋدانىنىڭ اكىمشىلىگى مەن  «ەل بىرلىگى» وداعى تاريحي شەرۋدى قولداۋشىلاردىڭ قاتارىندا.

سادىبەك تۇگەل، «ۇلى دالا قىراندارى» رەسپۋبليكالىق قوعامدىق الەۋمەتتىك-مادەني قوزعالىسىنىڭ توراعاسى:  

– ەلباسىنىڭ قازاق حاندىعىنىڭ 550 جىلدىعىن وتكىزۋ تۋرالى باستاماسىن تولىعىمەن قولدايمىز. ءبىزدىڭ ويىمىزشا، 550 جىلدىقتى تويلاۋ ۇلتتىق تاريحتى باعالاۋعا ۇلكەن سەرپىلىس تۋعىزادى. بۇل باعىتتا ءبىز قازاق حاندىعىنىڭ 550 جىلدىعىن وتكىزۋگە ارنالعان مەملەكەتتىك كوميسسيامەن بىرگە جۇمىس ىستەيمىز. بۇل شەرۋ – اتالعان باستاما اياسىندا  وتكىزىلىپ وتىرعان شارالاردىڭ العاشقىسى. ماقساتى – ۇلتتىق تاريحىمىزدى بايانداۋ. شەرۋ الداعى ۋاكىتتا جالعاسىن تابادى.

سونىمەن، ەر داۋلەتباي باتىردىڭ ەسكەرتكىشىن تارباعاتاي تورىنە ورناتۋشىلار، مامىردىڭ 3-ءى كۇنى الماتىدان الىس جولعا اتتانباق. ءتورت كۇندىك شەرۋدىڭ اياق الىسى مەن تىنىس-تىرشىلىگىنەن وقىرماندارىمىزدى الداعى ۋاقىتتا حاباردار ەتىپ وتىرامىز.

اقبوتا داۋلەتباق.

اباي-اقپارات.