«ماڭگىلىك ەل: ءبىر ەل – ءبىر تاعدىر» اتتى تاقىرىپ اياسىندا ءوتىپ جاتقان قازاقستان حالقى اسسامبلەياسىنىڭ ءححىى سەسسياسى بارىسىندا پرەزيدەنت نۇرسۇلتان نازارباەۆ حح عاسىردا قازاق حالقى باستان كەشكەن قايعى-قاسىرەتتى ايتا كەلىپ: «وتكەن عاسىردا الەم بويىنشا ەشبىر ۇلت نەمەسە ەشبىر ەل قازاق حالقى باستان كەشكەن قايعى-قاسىرەتتى كورگەن جوق. ۇلتتىق ءدىلىنىڭ مىقتىلىعىنىڭ، توزىمدىلىك قاسيەتىنىڭ بەرىكتىگى ارقاسىندا ءبىزدىڭ ۇلتىمىز سونداي قيىندىقتارعا مويىمادى»، - دەدى. «سوندىقتان، - دەدى ەلباسى ءسوزىن ارى قاراي جالعاپ، - ءبىز قازاق حالقىنىڭ الدىندا قاي كەزدە قالاي تاعزىم ەتسەك تە جاراسىمدى بولماق».

ءوز جەرىندە، بايىرعى بابا قونىسىندا وزگە ۇلتتاردىڭ قاسىندا ازشىلىققا اينالعان قازاقتىڭ بۇگىن قاراسى مولايىپ، قارا ورمان قالىڭ ەل بولىپ جاتقانىن ەسكەرتكەن پرەزيدەنت نازارباەۆ قازاقستان حالقىنىڭ ەندىگى تاعدىرى قازاق حالقىنىڭ قولىندا ەكەندىگىنە ەكپىن ءتۇسىردى.

ء«بىزدىڭ حالقىمىزدىڭ سانى كۇننەن كۇنگە كوبەيىپ كەلە جاتىر. تيىسىنشە، جالپىقازاقستاندىق بىرلىك دەگەنىمىز بوس ءسوز ەمەس. ەڭ الدىمەن، بولاشاق ءۇشىن قازاقتىڭ ءوزىنىڭ بىرلىگى كەرەك. مەن مۇنى ىلعي ايتىپ ءجۇرمىن. ەلدىڭ تاعدىرى مەن بولاشاعى مەملەكەتقۇرۋشى ۇلت رەتىندە قازاقتىڭ قولىندا عانا بولادى. حالىقتى ۇلى ىستەرگە ۇيىستىرۋداعى باستى جاۋاپكەرشىلىك تە قازاقتارعا جۇكتەلەدى. وسىنى ءاردايىم ەستە ۇستايىق، اعايىن»، – دەدى نازارباەۆ.

الايدا، قازاق حالقى ءوزىنىڭ باۋىرمالدىق داستۇرىنەن جاڭىلماۋى كەرەك. ستاليندىك قۋعىن-سۇرگىنگە ۇشىراپ، جەر اۋىپ كەلگەن جانداردى جانى جارالى، كوڭىلى قارالى قازاق قيىن-قىستاۋ زاماندا قاناتىنىڭ استىنا الىپ ەدى، بۇگىن دە قازاق بالاسى ءوزىن قازاقستان ازاماتى سانايتىن ۇلتتىڭ وكىلدەرىن وگەيسىتپەۋى كەرەك.

«دەپورتاتسيالانعان جانداردى قۋعىنداۋ ءىسى بۇل جاقتا دا جالعاسىن تاپتى. سول زامانداعى بيلىكتىڭ ءتارتىپ، تالابىنا سايكەس قازاقستاندا ساياسي قۋعىن-سۇرگىنگە ۇشىراعان ازاماتتىڭ ايەل، بالا-شاعاسىنا ارنالعان 11 تۇرمە دە ولاردىڭ تاعدىرىنىڭ كۇردەلەنۋىنە سەپ بولدى. سوندىقتان دا ءبىز وزگە ءوز جەرىمىزدەگى وزگە ۇلت وكىلدەرىن ءوز باۋىرىمىزداي كورىپ، مامىراجاي عۇمىر كەشكەنىمىز ابزال. كارى تاريحتىڭ قويناۋىنا تەرەڭىرەك ءۇڭىلىپ ۇيرەنەيىك. بولماشىنى سىلتاۋ ەتىپ ءبىر ءتۇننىڭ ىشىندە قازاقستانعا دەپورتاتسيالانعان وزگە ۇلت وكىلدەرىنىڭ ەشبىرىن دە قۇقىقتىق تۇرعىدان كەمسىتپەۋىمىز كەرەك. ويتكەنى، ولاردى ءبىزدىڭ اتالارىمىزدىڭ ءوزى قيىن-قىستاۋ زاماندا تاماعىن ءبولىپ بەرىپ، تورىنەن ورىن بەرگەن. بۇل ءبىزدىڭ اتادان بالاعا بەرىلگەن ۇلتتىق قۇندىلىعىمىزعا ءتان ەرەكشە قاسيەتىمىز. وسى ءۇردىس ۇرپاقتان ۇرپاققا جالعاسىپ جاتۋى ءتيىس»، — دەدى ەلباسى.

Abai.kz