اباي قۇنانبايۇلىنىڭ 170 جىلدىق مەرەيتويىنا وراي، سەمەي قالاسىندا ورنالاسقان اباي اتىنداعى قازاق مۋزىكالى-دراما تەاترى وسىدان 35 جىل بۇرىن قويىلعان مۇحتار اۋەزوۆتىڭ «اباي» سپەكتاكلىن قايتا ساحنالاماق.

سپەكتاكل ءحىح-حح عاسىرداعى قازاق قوعامىنىڭ بەت بەينەسىن، ىشكى تراگەدياسىن سۋرەتتەيدى، اباي قۇنانبايۇلىنىڭ اقىندىق الەمىن قامتي وتىرىپ، الەۋمەتتىك كوزقاراسىن سيپاتتايدى. سونىمەن قاتار اقىننىڭ دۇنيەتانىمى كەڭىپ، ازاماتتىق پىكىرى قالىپتاسىپ، ەل ىسىنە ارالاسقان شاعى، تاپتىق، توپتىق تالاس-تارتىسقا وزىندىك ءۇن قوسۋى ايتىلعان. قويىلىمدا اباي ارقىلى زامانىنىڭ كەراعار تۇستارى اشىلىپ، شىندىق پەن ادىلدىك تۋراسىندا، وقۋ مەن ءبىلىم جايىندا پالساپالىق كوزقاراستار، تاعىلىمدى ويلار ايتىلادى، سول زاماننىڭ قيىنشىلىعى مەن ادىلەت جولىنداعى كۇرەس كورسەتىلگەن. سپەكتاكل اباي رۋحىنىڭ ۇلىلىعىن، تالانتىنىڭ سان قىرىن اشىپ كورسەتۋدى ماقسات ەتكەن. اتالعان قويىلىمعا تەاتردىڭ بارلىق شىعارماشىلىق ۇجىمى قاتىسادى. ارتىستەردىڭ بارلىعى وزدەرىنە تيەسىلى رولدەرگە تىڭعىلىقتى دايىندىق ۇستىندە. جاۋاپكەرشىلىك پەن مىندەتتى، ازاماتتىق پارىزدى ارقالاعان ءار اكتەر بەرىلگەن كەيىپكەرلەرىن جان-جاقتى زەرتتەۋدە. ايتا كەتۋ كەرەك، وتىز بەس جىل بۇرىن ساحنالانعان سپەكتاكلدە جاس ابايدىڭ رولىندە ويناعان حالىق ءارتىسى بەكەن يماحانوۆ ەندى جاسى ۇلعايعان ابايدىڭ ءرولىن سومداماق. قويىلىمنىڭ رەجيسسەرى ەربول جۋاسبەك ەكەنىن دە ايتا كەتكەن ءجون. سپەكتاكل پرەمەراسى ءساۋىردىڭ 18-19-ى كۇندەرى سەمەيدەگى اباي اتىنداعى قازاق مۋزىكالى-دراما تەاترىنىڭ ساحناسىندا قويىلادى.

مەرەي قارتوۆ،

اباي تەاترى ادەبيەت بولىمىنىڭ مەڭگەرۋشىسى. 

اباي-اقپارات