الماتىداعى مەتروعا كىرىپ، ونىڭ يگىلىگىن كورۋ قيىن بولىپ تۇر. مەن باسىمنان وتكەن جايتتاردى باياندايىن.

مىنە، ەكى جىل بولدى (2013-2015 جىلدار) الماتى مەتروسىنداعى پوليتسەيلەر مەنى سەبەپسىزدەن سەبەپسىز بىرنەشە رەت توقتاتتى. نەگە ەكەندىگىن بىلمەدىم. كيىمىم تازا، قوعامدىق ءتارتىپتى بۇزعان جان ەمەسپىن. سودان ازاماتتىق قۇقىعىمدى العا سالىپ، 2014 جىلدىڭ قازان ايىندا قر ىشكى ىستەر مينيسترلىگى قوعامدىق كەڭەسىنىڭ مۇشەسى ءابىلدا ابدىكارىموۆپەن كەزدەسىپ، وسى جايدى ايتقان ەدىم، مەترو پوليتسەيلەرى زاڭسىز ارەكەتتەرىن ۋاقىتشا دوعاردى. الايدا، بيىل الگى پوليتسەيلەر وزدەرىنىڭ بۇرىنعى زاڭسىز ارەكەتتەرىنە قايتادان كىرىستى. مۇمكىن، بۇل مەكەمە قر ىشكى ىستەر مينيسترلىگىنە پىسقىرمايتىن، دەربەس اۆتونوميالىق قۇرىلىم شىعار؟ ونىسىن تۇسىنبەدىم...

ءبىزدىڭ كونستيتۋتسيامىز بويىنشا، كەز كەلگەن ديسكريميناتسياعا تىيىم سالىنعان. مەيلى، سەن افريكالىق بول، ازيات بول، ەشكىم سەبەپسىز توقتاتىپ، جولىڭدى كەسۋگە قاقىلى ەمەس. مەن تالاي شەتەلدە بولدىم، مەترولاردى پايدالاندىم: لوندون، كيەۆ، ريم، چيكاگو... ادەتتە شەتەلدە مەتروداعى پوليتسەيلەر جايدان-جاي ەشكىمدى توقتاتپايدى. نەگە بىزدەگى جەرگىلىكتى مەترو پوليتسەيلەرى ديسكريميناتسيا (الالاۋشىلىق) ساياساتىن جۇرگىزەدى؟

پوليتسيا قىزمەتكەرلەرى مەنىڭ ارىزىما ەشقانداي ناقتى جاۋاپ بەرمەي وتىر. مەملەكەتتىك ۇيىم بولعان سوڭ، ولار وسىنداي ارىزدارعا زاڭمەن بەلگىلەنگەن مەرزىم ىشىندە ناقتى جاۋاپ بەرۋگە مىندەتتى. پوليتسيا - ەشكىمنىڭ جەكە مەنشىگى ەمەس. الايدا، مەنىڭ ارىزىما جاۋاپ جوق. تەك قانا بيۋروكراتيالىق سىلتەمەلەرمەن شەكتەلەدى. سوڭعى ەكى جىل ىشىندە، شامامەن جيىرما رەت مەنى سەبەپسىز توقتاتتى. جارايدى، ادام تۇگىلى ەلەكتروندىق-ەسەپتەۋ ماشيناسى دا اندا-ساندا جاڭىلىپ كەتەر، بىراق، مەنى سەبەپسىز توقتاتقانى - قاتەلىك ەمەس. بۇل – بەلگىلى ءبىر ديسكريميناتسياسىنىڭ تاسىلىنە جاتادى، پسيحولوگيالىق قىسىم. 

ەگەر مەن بىردەڭە بۇلدىرگەن بولسام: «مىنا ازامات ىزدەۋدە جۇرگەن قىلىمىسكەر»، - دەپ نەگە ايىبىمدى موينىما سالمايدى؟ كىناسىز بولسام، نەگە كەشىرىم سۇرامايدى؟ الماتى مەتروسى – جەر استىنداعى كولىك قوزعالىسى بويىنشا ەڭ شاعىن مەتورپوليتەن. جولاۋشىسى دا از.

قازىرگى ەكونوميكالىق داعدارىستىڭ كەزىندە، بيۋدجەت شىعىندارىن قىسقارتقان ءجون. ءوز بەتىمەن كەتكەن الماتى مەتروسىنداعى ىشكى ىستەر باسقارماسىن تۇگەلىمەن جويساق، بيۋدجەتىمىزدىڭ ەلەۋلى بولىگىن ۇنەمدەيمىز. مەترو ستانتسيالارىندا اندا-ساندا قاراۋىل جاسايتىن پوليتسەيلەردى اۋداندىق باسقارمالاردان جىبەرۋگە تۋرا كەلەدى. ءسويتىپ، اسەم قالامىزدىڭ ورتالىعىندا ورنالاسقان مەترو پوليتسەيلەرىنىڭ كەرەمەت عيماراتىن بالاباقشا نەمەسە قوناق ءۇيى سەكىلدى ءتيىمدى كاسىپورىنعا بەرۋگە بولادى. ال، بولاشاقتا الماتى مەتروسى ۇلكەيگەن سوڭ مۇمكىن پوليتسەي باسقارماسى كەرەك بولار. ازىرشە، ونىڭ قاجەتتىلىگى شامالى. ونىڭ ۇستىنە تىرلىگى - اناۋ. جارتى عاسىرعا جۋىق ۋاقىتتىڭ شەگىندە ارەڭ ىسكە قوسىلعان مەترونى الماتىلىقتاردىڭ كادەسىنە جاراتقان قالا اكىمى احمەتجان ەسىموۆ مىنا اڭگىمەنى ەستىسە، قارەكەتسىز قالماس دەپ ويلايمىن.  

دانيار ناۋرىز

الماتى

Abai.kz