بارلىعى دا ويلاماعان جەردەن باستالدى. تۇستەنىپ الايىق دەگەن ويمەن ارىپتەسىم اسقار ەكەۋمىز پۋشكين كوشەسىنىڭ بويىمەن «ساياحات» اۆتوبەكەتىنىڭ جانىنداعى اسحاناعا قاراي اياڭداپ كەلە جاتقانبىز. رايىمبەك بابامىزدىڭ ەسكەرتكىشىنىڭ تۇسىنا جەتە بەرگەندە جارناما قاعازىن تاراتىپ تۇرعان ءبىر بويجەتكەن اسقاردىڭ قولىنا الگىسىن ۇستا سالدى. ارىپتەسىم قاعازعا ءبىر قارادى دا، تاستاۋعا ىڭعايلانا بەرگەندە، نەگە ەكەنىن قايدام (ادەتتە مۇنداي ءتۇرلى بۋكلەتتەردى، باسقا دا جارنامالىق ۇلگىدەگى گازەتتەر تاراتىپ تۇرعانداردان اينالىپ وتەتىنمىن), اسقاردان الگى ۆيزيتكانى سۇراپ الىپ، كوز جۇگىرتتىم. سويتسەم، ول جاڭادان اشىلعان «پريما-دەنت» اتتى ستوماتولوگيالىق كلينيكانىڭ جارنامالىق ۆيزيتكاسى بولىپ شىقتى (الماتى قالاسى، ابىلايحان مەن م.مامەتوۆا كوشەلەرىنىڭ قيىلىسىندا). بارلىق قىزمەتتەرىنە 50 پايىزدىق جەڭىلدىك بار، 24 ساعات جۇمىس ىستەيدى ەكەن. «تاۋلىك بويى قىزمەت كورسەتەتىن بولسا وتە ىڭعايلى ەكەن، ءبىر كەرەگىمە جاراپ قالار»، – دەگەن ويمەن الگى جارنامالىق ۆيزيتكانى ءتوس قالتاما سۇڭگىتە سالدىم.

اراعا بىرنەشە كۇن سالىپ، 28 ناۋرىز كۇنى ۇيگە قارىنداسىم گۇلجانات كەلدى. ءتىسى اۋىرىپ، قينالىپ ءجۇر ەكەن. «ىزدەگەنگە - سۇراعان» دەگەن، ءاي-شايعا قاراماي تۇندەلەتىپ، كەلىنشەگىمدى دە قوساقتاپ، ابىلايحان مەن مامەتوۆا كوشەلەرىنىڭ قيىلىسىنداعى ستوماتولوگيا قايداسىڭ دەپ تارتىپ تۇردىق. ءبىزدى ورىنباسار عۇلانبايۇلى تۇرعىنباەۆ (ورينباسار گۋلانباەۆيچ تۋرگينباەۆ) دەگەن جىگىت جىلى قارسى الدى. ول بىزگە: «سىزدەرگە ارىپتەسىم قىزمەت كورسەتەدى، ءسال كۇتە تۇرىڭىزدار» دەگەن سوڭ ول نۇسقاعان ورىندىققا جايعاسا بەرگەنىمىزدە، سىرتتان ءبىر جاس جىگىت كىرىپ كەلدى. ء«داۋ دە بولسا وسى دارىگەر شىعار» دەپ توپشىلادىم. جورامالىم دۇرىس شىقتى. ء«وزى ارزان ءارى تاۋلىك بويى جۇمىس ىستەسە، ۇشەۋمىز دە تىستەرىمىزدى ءبىر ەمدەتىپ الايىق» دەگەن ويمەن قارالا باستادىق. الگى رۋسلان بوروۆسكي ەسىمدى دارىگەر كەلىنشەگىم ەكەۋىمىزدى ءبىر قاراپ شىققاننان سوڭ، كەزەك قارىنداسىما كەلدى. قارىنداسىمنىڭ ەڭ سوڭعى ازۋ ءتىسى اۋىرىپ جاتقانى ايقىندالعان سوڭ، نە ىستەۋگە بولاتىنىن سۇرادىق. ورىنباسار ەكەۋى ءبىراز اقىلداستى دا، بىزگە قاراپ: «بۇل ءتىس مەديتسينا تىلىندە سەگىزدىك (ۆوسمەركا) دەپ اتالادى. ونى ەمدەۋگە كەلمەيدى. سوندىقتان جۇلىپ الىپ تاستاۋ كەرەك» دەگەن سوڭ قارىنداسىمنىڭ جانى قينالىپ تۇرعاندىقتان، امالسىزدان كەلىستىك. جۇلار الدىندا ءتىستىڭ جاعدايىن انىقتاپ الۋ ءۇشىن ەشقانداي رەنتگەن قوندىرعىسىنا دا تۇسىرگەن جوق. «ە، ءوز كاسىبىن جەتىك مەڭگەرگەن ماماندار عوي» دەپ ويلاپ، زايىبىم ەكەۋمىز كابينەتتەن شىقتىق. ءبىر ۋاقىتتا قارىنداسىم گۇلجاناتتىڭ جانۇشىرا ايقايلاپ، جىلاعان داۋىسى شىقتى. باۋىرىما جانىم اشىپ، كابينەتتەرىنىڭ ەسىگىن جايلاپ سىعالاپ اشسام، ەكەۋلەپ (ورىنباسار مەن رۋسلان) ءتىستى سۋىرىپ جاتىر ەكەن. جۇمىستارىن اياقتاعان سوڭ، بولمەسىنە قايتا كىردىك. سۋىرىلعان ءتىستى كورىپ، جۇرەگىم زىرك ەتە قالدى. ءتىستىڭ تەك بەت جاعى ازداپ شىرىگەنى بولماسا، قالعان بولىگى، تۇقىلى ءدىن امان! قارىنداسىمنىڭ ءتىسى قاتتى اۋىرىپ تۇرعان سوڭ، ونىڭ رۋسلاندى تىڭداۋعا زاۋقى سوقپادى بىلەم، ول قانداي ەم قولدانۋ كەرەكتىگىن تاپتىشتەپ، تۇسىرگەندەي بولدى. سونىمەن نە كەرەك، بارلىعى جاقسى بولار دەگەن ويمەن ۇيىمىزگە ورالدىق. بىراق «قىزىقتىڭ» ءبارى ۇيگە كەلگەننەن كەيىن باستالدى. قارىنداسىم تۇنىمەن اھ ۇرىپ دوڭبەكشىپ (وسىلايشا ءۇش كۇن اۋىردى), تاڭعا دەيىن كوز ىلمەي، جانى قينالدى. ونى كورىپ، مەنىڭ دە جانىم جاي تاپپاي، كورەر تاڭدى كوزبەن اتىردىق. ەرتەڭىنە ەرتەمەن ءوزىمىز بۇرىننان بارىپ جۇرگەن «اقساي-1» ىقشاماۋدانىندا ورنالاسقان «ميرومەد» ستوماتولوگياسىنا بارىپ، ءمان-جايدى باياندادىق. ونداعى بىلىكتى دارىگەرلەردىڭ سوزىنەن ۇققانىمىز: سەگىزىنشى (قازاقتار ونى اقىل ءتىسى دەپ اتايدى) ازۋ ءتىستى ەمدەۋگە ابدەن بولادى ەكەن. الدىن الا ءتىستى رەنتگەن جاساماعانىنا ولار دا تۇسىنبەي قايران قالدى. دەرەۋ الماتى قالاسىنداعى 5-ءشى كلينيكالىق قالالىق اۋرۋحانانىڭ بەت-جاق بولىمىنە جولداما بەرىپ، تەزدەتىپ سوندا بارۋىمىزدى ءوتىندى. جول جونەكەي رۋسلان بوروۆسكيگە سوعىپ، بولعان وقيعانى بايانداپ، اۋرۋحاناعا بارا جاتقانىمىزدى: «بولار ءىستىڭ بولىپ، بوياۋى سىڭگەنىن، ەگەر ەمدەلۋگە كەتكەن بۇكىل شىعىندارىن وتەپ بەرسە ەشقانداي داۋىمىز جوق» ەكەنىن ەسكەرتتىك. ول كەلىسىپ، بار ماتەريالدىق جاۋاپكەرشىىلىكتى موينىنا الاتىنىنا سەندىردى. قۇدايعا شۇكىر، 5-ءشى كلينيكالىق اۋرۋحاناداعى بىلىكتى دارىگەرلەردىڭ كومەگىمەن (ولاردىڭ ايتۋىنشا، مۇنداي ۇلكەن تىستەردى ادامعا ناركوز بەرىپ، وپەراتسيالىق جولمەن عانا الۋعا رۇقسات ەتىلەدى ەكەن. ءتىپتى، ەڭ بولماعاندا پلومبىسىن اشىپ كورۋگە دارىگەر مىندەتتى ەكەن. رۋسلان مۇنىڭ ءبىرىن دە ىستەگەن جوق ) ناۋقاستىڭ بەتى بەرى قارادى.

قارىنداسىمدى ۇيگە اپارىپ تاستاعان سوڭ، كەشقۇرىم جۇمىستان كەيىن، رۋسلانعا قايتا سوقتىم. بۇكىل كەتكەن شىعىندى (قارىنداسىمنىڭ ءبىر اپتا بويى جۇمىستان قالعانىن، ءتۇرلى ءدارى-دارمەكتەر مەن انتيبيوتيكتەر، جۇلىنعان ساۋ ءتىستىڭ ورنىنا جاساندى ءتىس ورناتۋ، ت.ب.) ايتىپ، ءتۇسىندىردىم دە، وتەۋىن تالاپ ەتتىم. ول كەشكە دەيىن مۇرسات بەرۋىمدى سۇراعان سوڭ، كەلىسكەندەي سىڭاي تانىتىپ، شىعىپ كەتتىم. مىنە، سودان بەرى ارنارسەنى جەلەۋ ەتىپ، بەرگەن ۋادەسىن ۇمىتىپ، سوزباقتاپ كەلەدى. ءوزىم ەمدەتىپ، باسقا ءتىس دارىگەرلەرىنە قاراتامىن دەيدى. بىراق، مەنىڭ بۇعان ەشقانداي زاۋقىم جوق. ءوز ماماندىعىن جەتىك مەڭگەرگەن بولسا، ءاۋ باستا نەگە ولاي جاسامادى؟ اي-كۇننىڭ امانىندا قاراپ وتىرىپ، رۋسلان سياقتى ساۋاتسىز دارىگەرلەردىڭ كەسىرىنەن (اق حالاتتى ابزال جان دەۋگە اۋزىم بارمايدى) ساۋ تىسىمىزدەن ايىرىرىل قالدىق...

كەۋلىمجاي قۇتتى.

Abai.kz