"مايقۇدىقتان ەمشى بالا شىعىپتى" دەگەندى ەستىپ، قۇر جاتا المادىق. سەنبى-جەكسەنبىنى پايدالانىپ استانادان ارنايى سۇحبات قۇرۋعا باردىق. "ەمشى بالا" دەپ جۇرگەنىمىز 30-دان اسقان ءدۇر جىگىت ەكەن. ءوزى اڭگىمەشىل ەكەن، سۇحباتتى كوپ كىدىرمەستەن باستاپ كەتتىك. 

– ءسىزدى ەمشى دەيدى؟ ءتىپتى "مايقۇدىقتان شىققان ەمشى بالا" دەپ جار ساپ جاتقاندار بار. ەستۋىمشە ءسىز ءالى ەشكىمدى دە جارىتىپ ەمدەمەگەنسىز، بىراق قالاي ەمشى بولدىڭىز؟
– ارعى اتالارىمنىڭ ەمشىلىگى دە بار ەدى. ىستىعى كوتەرىلىپ اۋىرعانداردى، كوزى سىرقاتتانعانداردى ەمدەيتىن. ادامنىڭ ۇستىنە شىققان بورتپەلەردى دە وڭاي كەتىرەتىن. مۇنىمەن قاتار، كورىپكەلدىگى دە بولدى. قانداي دا ءبىر وقيعانى كۇنى بۇرىن ءبىلىپ قوياتىن. سول اتالارىمنان مىسقالداي بولسا دا قاسيەتتەر جەتكەن. 
– ناقتى قانداي قاسيەتتەرى؟
– ونى ەندى ناقتى ايتا المايم، بۇل قايدا شىعاتىن سۇحبات ءوزى؟
– "ەل ءىشى – ەمشىلەر كەنىشى" گازەتىنە. بۇعان دەيىن سۇحبات العان باسىلىمدار بولدى ما؟
– مۇنداي كولەمدى سۇحباتتى العاش بوپ ءوزىڭ الىپ وتسىڭ.
– قىزىلوردادان شىققان 11 جاستاعى ەربوسىن سەرىكباەۆ كۇنىنە 5 مىڭنان استام ادامدى ەمدەيدى. جاس ەمشى ءتىپتى سال بولىپ قالعان ادامداردى اياعىنان تىك تۇرعىزاتىن كورىنەدى...
– جارنامام ءجۇرىپ كەتسە سول مەجەگە بارىپ قالارمىن. قىزىلورداعا بارۋ ەلىمىزدىڭ كوپ ايماقتارىنا ىڭعايسىز. كليەنتتەردىڭ ءبارى ماعان كەلەر دەگەن ءۇمىتىم بار، ەلىمىزدىڭ ورتالىعى قاراعاندىدامىن. استاناعا دا جاقىن دەگەندەي. 
– ەڭ بولماعاندا سۇندەتكە وتىرعىزاتىن بولارسىز؟
– ول ءسوز بوپ پا؟! كەيدە 2-3 سانتيمەتر قوسىپ بەرەم. 
– بۇرىن نەمەن اينالىستىڭىز؟ قانداي قىزمەتتە ءجۇردىڭىز؟
– ءار ءتۇرلى قىزمەتتەر. اسكەري سالادا ءجۇردىم. قازىر مادەنيەت سالاسىندامىن. حالىق اعىلىپ، ۇلگەرمەي جاتسام جۇمىستى تاستاپ قالارمىن. سەبەبى، جۇمىسقا شىعىندايتىن ەنەرگيامدى مۇقتاج جاندارعا جۇمساعىم كەلەدى.
– اقىڭىز قانشا، حالىقتىڭ قالتاسى كوتەرە مە؟
– بەرگەنىن الامىن، مىنشا تاستا دەپ ايتپايمىن. ءبىر اعامىز توقالىما ۇل تۋعىزتىپ بەرسەڭ رەسەيدەن ماشينا قۋىپ اكەلىپ بەرەمىن دەپ وتىر. ەندى، سول كىسىنىڭ توقالىمەن اينالىساتىن شىعارمىن.
– مىنا قولىڭىزداعى، باسىڭىزداعى نە؟ ونىڭ ەمشىلىككە قاتىسى قانشا؟
– قولىمداعى ەكى قامشى. بىرەۋى جىلقى مۇسىنىندە جاسالعان. قازاق ات ۇستىندە ۇيىقتاعان حالىق. سول تەكتىلىگىمىز قايتىپ كەلسىن دەگەن ءسوز. ەكىنشى قامشىم ويۋلانعان قامشى، ءتۇپ-تامىرىمىزدان اجىرامايىق دەگەن ءسوز. تاقيامداعى گۇل-گۇلدەي جايناپ جۇرەيىك دەگەن بەلگى.
– ەمشى دەگەننەن گورى اپەندىگە كەلەسىز، ەل قالاي قابىلداپ جاتىر؟
– سەنگەن ەل سەنەدى، كەلگەن ەل كەلەدى. بەتپەردە كيمەيمىن. ايتپەسە، ۇيدە تويدان كەلگەن شاپاندار بار، ءبىرىن كيىپ السام دا بولار ەد.
– اس ءمازىرىڭىز باسقالاردان وزگەشە مە؟ نە جەيسىز؟
– ادال تاماقتار. ءۇش رەت شايىلعان ىدىستارمەن تاماقتانامىن. سۋ تەك بۇلاقتان اكەلىنەدى. جوق دەگەندە اكۆافوردا ءسۇزىلۋى ءتيىس.
– ءسىز نەكە قياسىز با؟
– نەگىزى تۇساۋ كەسەمىن. ءوتىنىپ سۇراسا نەكەنى دە قيۋعا بولادى دەپ ويلايمىن.
– نەشە ايەلىڭىز بار؟
– بىرەۋ.
– نەگە از؟
– قۇداي بەرەم دەسە 10 بالانى 1 قاتىننان اق تۋدىرادى... تاااك، ەمدەلۋگە كىسىلەر كەپ تۇر، سوسىن سويلەسەيىك. 
– اڭگىمەڭىزگە راحمەت!

سۇحباتتاسقان – جاندوس ءبايدىلدا.

(جازبا اۆتوردىڭ facebookتەگى پاراقشاسىنان الىندى)