ءپۋتيننىڭ وتكەندەگى استاناعا كەلىپ قايتقان ساپارىنان كەيىن رەسەيلىك ساراپشى-ماماندار: «الداعى ءساۋىر ايىنداعى سايلاۋدان سوڭ قازاقستاندا دەۆالۆاتسيا بولىپ، تەڭگە قۇنسىزدانادى»، - دەگەندى اشىق ايتۋدا. ال، الگىندەي بولجامنىڭ ارعى جاعىندا ۆۆپ-نىڭ اۋزىمەن ايتىلعان، رەسمي استانا دا قولداۋدان باس تارتپايتىن، ورتاق ۆاليۋتانى اينالىمعا ەنگىزىپ جىبەرۋدىڭ قارەكەتى جاتىر.

كەدەندىك وداق كۇشىنە ءمىنىپ، ەۋرازيالىق ەكونوميكالىق وداق جۇمىس ىستەي باستاعالى بەرى رف ساياساتكەرلەرىنىڭ ءجيى قوزعايتىن تاقىرىبى وسى – ورتاق ۆاليۋتانىڭ اڭگىمەسى بولىپ العان. ەكى تاراپ باس قوسا قالسا (قازاقستان-رف), نەمەسە «ۇشەمنىڭ» (قازاقستان-رەسەي-بەلارۋس) ادەپكى ءبىر جيىنى بولسا، ءبىتتى، رەسەيلىك بەلسەندىلەر دوللاردان كەتىپ ورتاق ۆاليۋتا اياساندا ءومىر ءسۇرۋدىڭ قاجەتتىلىگى ءپىسىپ-جەتىلگەنى تۋرالى ءسوز قىستىرىپ ۇلگەرەدى. رەسەيگە جاقىنداي تۇسكەن سايىن كارى كرەملدىڭ بۇرىنعى ىزبارىن بارىنشا سەزىنىپ، ساياسي ىقپالعا تۇسە باستاعان استانا قازىرگى جاعدايىندا ورتاق ۆاليۋتادان باس تارتا المايدى. الايدا، اراعا ۋاقىت سالىپ، بۇل ماسەلەدە اسىقپاۋدى جاقتايدى. رەسمي استانانىڭ ويىنشا، ورتاق اقشانى 2025 جىلدارعا قاراي قولعا الۋ كەرەك. ىلگەرىدە رف دا سونى قۇپ كورگەندەي سىڭاي تانىتاتىن. ەندى اسىعۋلى. پۋتين استانا باسقوسۋىنان سوڭ رف ۇكىمەتىنە قىركۇيەك ايىنا دەيىن ەاەو-عا مۇشە ەلدەردىڭ ءتول ۆاليۋتاسىن ءبىر جاقتى ەتىپ شەشۋ قاجەت ەكەنىن ەسكەرتتى.

ايتكەنمەن دە، رف ۇكىمەتى باسشىسىنىڭ ءبىرىنشى ورىنباسارى، ياعني ءبىرىنشى ۆيتسە-پرەمەرى يگور شۋۆالوۆ مىرزا «ورتاق ۆاليۋتاعا اسىعۋدىڭ، شۋ-شۇرقان بولۋدىڭ قاجەتتىگى جوق» دەپ وتىر. «ينفلياتسيانىڭ ولشەمدەرى مەن ەكونوميكاداعى تۇراقتىلىق ولشەمدەرى ءۇش ەلدىڭ اراسىندا، سودان سوڭ ەاوە-عا مۇشە بولۋعا ىنتالى ارمەنيا مەن قىرعىزستاننىڭ اراسىندا تەپە-تەڭدىك كۇيىن تاپپاي جاتىپ ءبىزدىڭ وداق كولەمىندە مونەتارلى-ۆاليۋتا نارىعىن قالىپتاستىرۋعا اسىعۋىمىز دۇرىس ەمەس. جاقسىلاپ ويلانىپ، ءبارىن ەسەپكە الۋىمىز كەرەك» دەدى ول رەسەيدىڭ 24-ءشى ارناسىنا بەرگەن سۇحباتىندا.

ەستەرىڭىزگە سالا كەتەيىك، ەكونوميكالىق سانكتسيالاردىڭ قىسپاعانداعى رف-دا رۋبل بارىنشا قۇنسىزدانعان. سوعان قاراماستان كرەمل ۋكرايناداعى سەپاراتيستىك كۇشتەردىڭ قولتىعىنا دىم بۇركۋدە. قازاقستاندا دا رەسەيگە سالىنعان سانكتسيالاردىڭ سالقىنى بايقالادى. راسىندا، پرەزيدەنت سايلاۋىنان كەيىن تەڭگە كەزەكتى رەت دەۆالۆاتسياعا ۇشىراۋى مۇمكىن. ەڭ باستى قاۋىپ، بىراق، بۇل ەمەس. ەڭ باستى قاۋىپ – دوللاردىڭ شەڭبەرىنەن شىعۋعا دەگەن ۇمتىلىس. ەكونوميكاسى زاماناۋي رەڭك تاۋىپ شالقىعان ەۋرووداقتىڭ دا قازىرگى باستى پروبلەماسى دوللاردان تىس ءومىر ءسۇرۋ بولىپ وتىر. ايتسە دە، كارى قۇرلىق ەو-عا ورتاق ۆاليۋتا – ەۋرونى كۇشەيتۋگە تىرىسقان سايىن دوللاردىڭ الدىنداعى دارمەنسىزدىگىن سەزىنە تۇسۋدە. ال، وسىنداي ورتاق ۆاليۋتا جاساۋعا ارەكەتتەنىپ كورگەن تاياۋ شىعىس ايماعىنداعى اراب ەلدەرى كوسەمدەرىنەن ايرىلىپ، ساياسي تۇراقسىزدىق جاعادايىندا ءومىر سۇرۋدە.

Abai.kz