كۇن مەن ءتۇننىڭ تەڭەلۋى تابيعاتتىڭ تاڭعاجايىپ كۇيىن عانا ەمەس، توسىن سيىن دا قوسا تارتۋ ەتكەندەي. كۇن رايىنىڭ كۇرت قۇبىلۋى ەلىمىزدىڭ بىرقاتار ايماقتارىندا توتەنشە جاعداي تۋدىرىپ وتىر.

قاراعاندى وبلىسى، شەت اۋدانى، اعادىر اۋىلى تۇرعىندارىنىڭ قىزىل سۋدىڭ قۇرساۋىندا قالعانىنا بىرنەشە كۇن بولدى. توپەلەپ جاۋعان جاڭبىر مەن ەرىگەن قار سۋىنىڭ قوسىلۋىنان ىلعال كولەمى ارتىپ، اۋىلداعى تۇرعىن ۇيلەر مەن قورا-قوپسىلار كولكىگەن لايدىڭ استىندا قالعان. توسىن اپاتتان ۇيلەر تۇرۋعا جارامسىز بولىپ، ۋاق مال باسى شىعىنعا ۇشىرادى.

ەلىمىزدىڭ توتەنشە جاعدايلار قىزمەتىننىڭ رەسمي مالىمدەۋىنشە قىزىل سۋ قۇرساۋىندا قالعان تەك اعادىرلىقتار عانا ەمەس ەكەن. كولكىگەن سۋدان زارداپ شەككەندەر قاتارىندا قاراعاندى وبلىسىنىڭ قارقارالى، قاراجال، اقتوعاي، جاڭاارقا، بۇقار جىراۋ اۋداندارىنىڭ جەكەلەگەن اۋىلدارى بار كورىنەدى. قازىرگى كۇنى تج قىزمەتىنىڭ ارناۋلى توبى اپات ايماعىندا قۇتقارۋ جۇمىستارىن جۇرگىزۋدە. تۇرعىن ۇيلەرىن سۋ شايعان ادامداردى جەرگىلىكتى مەكتەپتەرگە ورنالاستىرۋ قولعا الىنعان. قىزىل سۋدان كەلگەن شىعىن ەسەپتەلۋدە.

اباي-اقپارات.

(سۋرەتتەر قاراعاندى وبلىسى، قارقارالى اۋدانىنىڭ تۇرعىنى بولاتبەك توقمىرزانىڭ facebookتەگى پاراقشاسىنان الىندى)