ۋكرايناعا قاراستى قىرىم اۆتونومياسى جانە سەۆاستوپول قالاسىن رەسەيدىڭ باسىپ العانىنا جىل تولدى.

وتكەن جىلى ۋكراينانىڭ سول تۇستاعى ساياسي بيلىگىنە قاتىستى حالىق نارازىلىعى شەرۋگە ۇلاسىپ، ونىڭ سوڭى يانۋكوۆيچتىڭ بيلىكتى تاستاپ، رەسەيگە قاشىپ كەتۋىمەن اياقتالعان ەدى. وسى تۇستا رەسەي "ورىس ۇلتى وكىلدەرىن" قورعاۋ دەگەن جەلەۋمەن قىرىمعا اسكەر كىرگىزىپ، اقىرى رەفەرەندۋم وتكىزىپ، "حالىق تاڭداۋى - وسى قىرىمدىقتار رەسەيگە قوسىلۋدى قالايدى" دەگەن قورىتىندى شىعارىپ، قىرىمدى باسىپ العان ەدى. الەمدىك قاۋىمداستىق رەسەيدىڭ بۇل ءىسىن ۋكراينانىڭ تەرريتوريالىق تۇتاستىعىنا قول سۇقتى دەپ ءالى كۇنگە دەيىن ايىپتايدى. الايدا، رەسەيدىڭ رەسمي بيلىگى قىرىمنىڭ رەسەيگە قوسىلۋى تاريحي ادىلەتتىلىك دەپ ەسەپتەيدى. جانە سولاي ەكەنىن مالىمدەۋمەن كەلەدى.

«روسسيا 1» تەلەارناسىنان كورسەتىلگەن اندرەي كوندراشوۆتىڭ «قىرىم. وتانعا ورالۋ جولى» دەپ اتالاتىن دەرەكتى فيلمدە رف پرەزيدەنتى پۋتين قىرىمدى باسىپ الۋ وپەراتسياسىن تىكەلەي ءوزى باقىلاپ، جۇزەگە اسىرعانىن ايتا كەلىپ، قىرىمدى باسىپ الۋعا اسكەري كۇش قولدانعانىن، ۋكراينا تەرريتورياسىنا باسىپ كىرۋ ءۇشىن فەدەراتسيا كەڭەسىنىڭ كەلىسىمىن الۋدىڭ دا قاجەتى بولماعانىن ايتادى. بۇل تۋرالى bbc.co.uk جازادى.

وسىلايشا، XXI عاسىردا رەسەي وزگە ەلدىڭ تەرريتوريالىق تۇتاستىعىن "ورىس ۇلتى وكىلدەرىن قورعاۋ" دەگەن جەلەۋمەن وپ-وڭاي بۇزىپ، بەتپەردە كيگەن اسكەري كۇشپەن باسىپ الا الاتىنىن كورسەتتى.

رەسەيدىڭ بۇل ارەكەتى سوۆەت وكىمەتىنەن تاۋەلسىزدىك العان كوپتەگەن ەلدەردى شوشىتىپ، الەمدىك قاۋىمداستىقتى تىكسىندىردى.

Abai.kz