دەليدىڭ ءۇش تۇرعىنى قازاقستان ازاماتشاسىن توپ بولىپ زورلاعانى ءۇشىن ۇستالدى، دەپ حابارلايدى The Times of India. اقپارات قۇرالىنىڭ مالىمەتىنشە، 27 جاستاعى قىز ۇندىستانعا ىسكەرلىك ساپارمەن كەلگەن. ول بۇل ەلدە بۇعان دەيىن دە بىرنەشە رەت بولعان. 

وقيعا 12 ناۋرىز كۇنى بولعان. جابىرلەنۋشىنىڭ ايتۋىنشا، ول دەليگە سول كۇنى كەشكىسىن كەلىپ، كارول باگح اۋدانىنداعى وتەلگە ورنالاسادى. ساعات 22.00-دە ول كەشكى اس كەزىندە ەكى جىگىتپەن تانىسادى. جىگىتتەر قىزعا سول اۋدانداعى باسقا وتەلگە بارىپ، ىسكەرلىك ماسەلەلەرىن تالقىلاۋ ءۇشىن ءۇشىنشى سەرىكتەسپەن كەزدەسۋدى ۇسىنادى. قىز كەلىسەدى. ەكى ەر اداممەن باسقا وتەلدىڭ بولمەسىنە كەلگەننەن كەيىن قىزدىڭ ايقايلاعان داۋىسى ەستىلەدى. وتەل قىزمەتكەرى جۇگىرىپ كەلگەن كەزدە جابىرلەنۋشى ەر ادامداردى ءوزىن زورلاۋعا ارەكەتتەندى دەپ ايىپتادى. بۇل ءىس بويىنشا ءۇشىنشى كۇدىكتى رەتىندە تاكسيست جاۋاپكەرشىلىككە تارتىلىپ وتىر، قازاقستان ازاماتشاسى وعان دا كىنا ارتۋدا. بۇل وقيعا جونىندە قازاقستان ەلشىلىگىنە حابار بەرىلگەن. 

ايتا كەتەيىك، ءۇندىستاننىڭ اقپارات قۇرالدارى مۇنداي وقيعالار تۋرالى ءجيى حابارلاپ جاتادى. 2013 جىلدىڭ قىركۇيەگىندە ءتورت ەر ادام 23 جاستاعى ستۋدەنت قىزدى توپ بولىپ زورلاعانى ءۇشىن ايىپتالعان ەدى. وقيعانىڭ ءوزى 2012 جىلدىڭ جەلتوقسانىندا بولدى. تەرگەۋدىڭ مالىمەتىنشە، التى جىگىت اۆتوبۋستا ءبىر قىزدى زورلاعان. جابىرلەنۋشى اۋرۋحانادا قايتىس بولدى. ايىپتالۋشىلاردىڭ ءبىرى اسىلىپ قالعان كۇيى تابىلدى. تورتەۋى ءولىم جازاسىنا كەسىلدى، بىراق سوتتالۋشىلار ۇكىمگە قارسىلىق كەلتىرگەندىكتەن جازانى ورىنداۋ كەيىنگە قالدىرىلدى. التىنشى كۇدىكتى كامەلەتكە تولماعاندىقتان ونىڭ ءىسى بولەك قارالدى.

دەرەككوز: kaz.tengrinews.kz