قازاقستاننىڭ حالىق جازۋشىسى، «تۇركىتىلدەس حالىقتار اراسىنداعى ەڭ ۇزدىك الەم اقىنى» سىيلىعىنىڭ يەگەرى مۇحتار شاحانوۆ پاكىستان يسلام رەسپۋبليكاسىنىڭ استاناسى يسلاماباد قالاسىندا عالامدىق دارا پاراسات يەلەرىنە بەرىلەتىن يسلام الەمىنىڭ "ىستانبۇل" سىيلىعىمەن ماراپاتتالدى. بۇل ماراپات اقىنعا 7 ناۋرىز كۇنى سالتاناتتى تۇردە تابىس ەتىلدى.

ماراپاتتاۋ سالتاناتى TASAM - تۇرىك ازيا ستراتەگيالىق زەرتتەۋ ورتالىعىنىڭ ۇيىمداستىرۋىمەن ءوتىپ جاتقان «6-شى يسلام الەمى ويشىل ۇيىمدارى پلاتفورماسىنىڭ» حالىقارالىق قۇرىلتايى اياسىندا مەملەكەت باسشىلارى، سەناتورلار، شەتەلدىك ەلشىلەر مەن ديپلوماتيالىق ميسسيا وكىلدەرىنىڭ قاتىسۋىمەن ءوتتى.

حالىقارالىق قاۋىمداستىقتا وزىندىك جوعارى بەدەلى بار TASAM باسقارماسىنىڭ ارنايى شەشىمىمەن بيىلدان باستاپ بەرىلگەن بۇل جوعارعى تۇڭعىش سىيلىقتى شىعارمالارى الەمنىڭ 60-قا جۋىق تىلدەرىنە اۋدارىلعان، 22 شەتەل ۋنيۆەرسيتەتىنىڭ، اكادەميالارىنىڭ قۇرمەتتى اكادەميگى، عىلىم دوكتورى، پروفەسسورى، 20-دان استام شەتەل قالالارىنىڭ قۇرمەتتى ازاماتى، نوبەل سىيلىعىنىڭ 100 جىلدىق مەرەكەسىنە وراي بەرىلگەن نوبەل التىن مەدالىنىڭ، كاليفورنيا (اقش) عىلىم اكادەمياسى تاعايىنداعان حالىقارالىق البەرت ەينشتەين التىن مەدالىنىڭ جانە 25-كە جۋىق ءارتۇرلى سىيلىقتاردىڭ يەگەرى، تۇرىك الەمى زيالىلار وداعىنىڭ توراعاسى مۇحتار شاحانوۆقا عالامدىق دارا پاراسات يەلەرىنە بەرىلەتىن «يسلام الەمىنىڭ ىستانبۇل» سىيلىعىن سالتاناتتى جيىندا پاكىستان يسلام رەسپۋبليكاسىنىڭ پرەزيدەنتى مامنۋن حۋسەين تابىس ەتتى (سۋرەتتە). پاكىستان پرەزيدەنتى مۇحتار شاحانوۆتىڭ بۇكىل مۇسىلمان ادەبيەتىندەگى ەرەكشە دارا تۇلعا ەكەنىن ايتا كەلىپ، اقىندى رۋحاني جەڭىسىمەن قۇتتىقتادى.

نۇرعالي ءجۇسىپباي.

Abai.kz