«بايتەرەك» حولدينگى ناۋرىز مەيرامى قارساڭىندا، ياعني، 20 ناۋرىز كۇنى «نۇرلى جول» باعدارلاماسى اياسىندا تۇرعىندارعا جاڭا پاتەرلەردىڭ كىلتىن تاپسىرۋدى جوسپارلاپ وتىر»، - دەپ اتاپ ءوتتى حولدينگ باسشىسى ق.بيشىمباەۆ.

بۇگىنگى تاڭدا حولدينگتىڭ ەنشىلەس قۇرىلىمدارى – قازاقستاننىڭ يپوتەكالىق كومپانياسى جەرگىلىكتى اكىمشىلىكتەرمەن بىرلەسە كەزەكتە تۇرعان حالىق اراسىندا تۇرعىن-ءۇيدى ءبولۋ ۇردىستەرىن جۇرگىزىپ جاتىر. ماسەلەن، قازىردىڭ وزىندە تاپسىرىلۋعا ءتيىس 1 357 پاتەردىڭ، 516 قاتىسۋشىسىنا اكىمشىلىك جولداما بەرگەن، ال ونىڭ 210-ىن قازاقستاننىڭ يپوتەكالىق كومپانياسى ماقۇلداعان. ء«وز كەزەگىندە، قالعان ۇمىتكەرلەر بويىنشا جۇمىس جۇرگىزىلۋ ۇستىندە. اتالعان ساندار ءار ءۇش ساعات سايىن جاڭارۋ ۇستىندە جانە جولدامالار جەدەلدەتىلگەن ۇردىستە 1-2 كۇن ىشىندە قارالۋدا»، - دەپ مالىمدەدى حولدينگ توراعاسى.

سونىمەن قاتار، ۇستىمىزدەگى جىلعى ءساۋىر مەن جەلتوقسان ايلارى اراسىندا كولەمى 165,5 مىڭ شارشى مەترگە تەڭ 1 511 پاتەر استانا، اقتوبە، قوستاناي، تاراز، قىزىلوردا قالالارىندا تاپسىرىلماق.

«بايتەرەك» حولدينگىنىڭ باسقارما توراعاسى ق.بيشىمباەۆتىڭ سوزىنە قاراعاندا، حولدينگ دايىن نىسانداردى ساتىپ الۋمەن قاتار، كەزەكتە تۇرعانداردى پاتەرمەن قامتاماسىز ەتۋ ماقساتىندا تۇرعىن-ءۇي نىساندارىن سالۋمەن قاتار اينالىسۋدا. «حولدينگتىڭ ەنشىلەس قۇرىلىمى – قازاقستاننىڭ يپوتەكالىق كومپانياسىنىڭ جەلىسى بويىنشا 2015 جىلعى ءساۋىر ايىندا شىمكەنت قالاسىندا جالپى كولەمى 56,2 مىڭ شارشى مەتر 1 080 پاتەر جالعا تاپسىرىلماق. ال تامىز ايىندا سەمەي قالاسىندا جالپى كولەمى 4 200 شارشى مەتر 72 پاتەرلى تۇرعىن-ءۇيدىڭ قۇرىلىسى اياقتالماق. استانا، تاراز، سەمەي، قاراعاندى، قىزىلوردا جانە پاۆلودار قالالارىنداعى قالعان تۇرعىن-ۇيلەردىڭ قۇرىلىسى ۇستىمىزدەگى جىلدىڭ جەلتوقسان ايىندا اياقتالادى. بۇل – جالپى كولەمى 94,1 مىڭ شارشى مەترلى 1 700 پاتەر»، - دەپ حابارلادى ول.

تۇرعىن-ءۇي قۇرىلىس جۇمىستارىنىڭ دەر كەزىندە اياقتالۋىن قامتاماسىز ەتۋ ماقساتىندا جوبالاردى ىرىكتەۋ ەرەجەسى بەكىتىلگەن. ماسەلەن، ەرەجەگە سايكەس، بانك كەپىلدىگى بەرىلگەن جاعدايدا عانا اۆانستىق تولەم قاراستىرىلعان، ال كەلەسى قارجىلاندىرۋ تەك جۇمىس تولىعىمەن ورىندالعاننان كەيىن عانا جۇرگىزىلەدى. سونداي-اق، تۇرعىن-ءۇي نىساندارىن سالۋ مەن ساتۋ بويىنشا باقىلاۋ جۇرگىزەتىن بىرنەشە ورگاندار قۇرىلعان.

باعدارلاما اياسىنداعى جاڭا جۇمىس ورىندارىن قولداۋ بويىنشا حولدينگ باسشىسى بيىلعى جىلدىڭ وزىندە 5 مىڭ جاڭا جۇمىس ورنىنىڭ اشىلعانىن اتاپ ءوتتى. «جىل بارىسىندا جۇمىس ورىندارىمەن 20 مىڭعا جۋىق ادام قامتاماسىز ەتىلمەك. تاعى 650 مامان سالىنىپ جاتقان نىسانداردا جۇمىس ىستەيدى. جالپى باعدارلامانىڭ ىسكە اسۋى بارىسىندا 49 مىڭ ادام قوسىمشا جۇمىس ورنىمەن قاماتاماسىز ەتىلمەك»، - دەپ مالىمدەدى قۋاندىق بيشىمباەۆ.

الدىن-الا دەرەكتەر بويىنشا، باعدارلاما ەلدەگى قۇرىلىس سالاسىنا مۋلتيپليكاتيۆتىك اسەر كورسەتپەك. ءسويتىپ، باعدارلاماعا قاتىسۋشى – قۇرىلىس كومپانيالارى مەملەكەت تاراپىنان كەپىلدەندىرىلگەن ۇزاقمەرزىمدى تاپسىرىسقا قول جەتكىزە الادى. ال تۇرعىن-ءۇي ينفراقۇرىلىمىنىڭ نىعايۋى حيميا مەن مەتاللۋرگيا، ەلەكتروتەحنيكا مەن قۇرىلىس ماتەريالدارى ءوندىرىسى ونىمدەرىنىڭ ۇلعايۋى ەسەبىنەن ارالاس سالالاردىڭ دامۋىنا دا جول اشپاق.

اباي-اقپارات.