قاراعاندى مەملەكەتتىك تەحنيكالىق ۋنيۆەرسيتەتىنىڭ اۆتورلار ۇجىمى ۇسىنعان «وزدىگىنەن جۇرەتىن كەن ماشينالارىن ەسەپتەۋ ادىستەرى مەن كونسترۋكتسيالارىن جەتىلدىرۋ» اتتى عىلىمي جۇمىس تسيكلى قازاقستان رەسپۋبليكاسى ءبىلىم جانە عىلىم مينيسترلىگىندە وتكەن ق.ساتباەۆ اتىنداعى عىلىمي زەرتتەۋلەرگە ارنالعان رەسپۋبليكالىق كونكۋرستا ءبىرىنشى سىيلىققا لايىقتى دەپ تانىلدى. وسى بايقاۋعا ۇسىنعان جۇمىس تسيكلىن قارمتۋ-دىڭ عالىمدارىنىڭ اراسىندا بۇرىنعى قاراعاندى پوليتەحنيكالىق ينستيتۋتىنىڭ ونەركاسىپ ترانسپورتى كافەدراسىنىڭ مەڭگەرۋشىسى قىزمەتىن اتقارعان، تەحنيكا عىلىمدارىنىڭ دوكتورى، پروفەسسور اسىلحان دانياروۆ، تەحنيكا عىلىمدارىنىڭ دوكتورى، پروفەسسور ساكەن مالىباەۆ، تەحنيكا عىلىمدارىنىڭ كانديداتى سەرىكقازى ادەكەنوۆ، «گيپروۋگلەگورماش» عىلىمي-زەرتتەۋ ينستيتۋتىنىڭ باس كونسترۋكتورى مەرەكە شاكەنوۆ، تەحنيكا عىلىمدارىنىڭ كانديداتى، دوتسەنت نۇرلان دانياروۆتار بار. ەسىمدەرى اتالعان عالىمداردىڭ ىشىندە پروفەسسور اسىلحان دانياروۆ پەن عالىم سەرىكقازى ادەكەنوۆ قازىر بۇ دۇنيەلىك ەمەس ەكەندىگىن ەسكەرسەك، بۇل جۇمىستىڭ عۇمىرلىق ماڭىزى قانشالىقتى ەكەنىن دە سارالاۋعا بولاتىن سىڭايلى. ال عىلىمي تۇرعىدان قاراعان بايقاۋ ساراشىلارى كونكۋرسقا ۇسىنىلعان 17 جۇمىستىڭ ىشىنەن قاراعاندىلىقتار ەڭبەگىن ەرەكشە ەلەگەنى تەگىن ەمەس ەكەن. ويتكەنى، بۇل جۇمىس تسيكلى كەن وندىرەتىن كاسىپورىنداردىڭ جۇمىس پروتسەسىن ەداۋىر جەدەلدەتەتىن، شاحتا ىشىندە وزدىگىنەن جۇرەتىن ۆاگونداردىڭ جاڭا كونسترۋكتسيالارىن جاساۋ باعدارىندا تولىق زەرتتەلىپ، اياقتالعان عىلىمي ەڭبەك دەپ تانىلىپ وتىر. بۇل ەڭبەكتى «اياقتالعان» دەپ ساناۋعا دا نەگىز بار. سەبەبى، قاراعاندىلىق عالىمدار جاساعان شاحتا ىشىندە وزدىگىنەن جۇرەتىن ۆاگوندار قازىر قازاقستاننىڭ (قاراعاندى شاحتالارى), رەسەيدىڭ (كۋزباسس، سوليمانسك، بەرەزنياكي شاحتالارى) جانە بەلارۋس رەسپۋبليكاسىنىڭ (سوليگورسك) تاۋ-كەن كاسىپورىندارىندا كەڭىنەن قولدانىستا.

بىرنەشە جىلعا سوزىلعان زەرتتەۋلەر اياسىندا ۇزىن-ىرعاسى 90 عىلىمي ەڭبەك، ونىڭ ىشىندە 3 مونوگرافيا، 17 وقۋ قۇرالى، 50 وقۋ-ادىستەمەلىك نۇسقاۋلىقتارى جانە 7 ونەرتابىس پاتەنتى قورعالعان ەكەن.

ونەرتاپقىش عالىمداردىڭ وندىرىسكە ماڭىزى ەرەك، ادام ەڭبەگىن وڭتايلاندىرۋدا ورىنى وراسان ىزدەنىسى ەل ونەركاسىبىندە كەڭ ءورىس تاپسا، ءجون بولار-اق ەدى...