كوكتەمنىڭ العاشقى كۇنى «استانا-ارەنا» ستاديونىندا ەل چەمپيونى – «استانا» مەن ەل كۋبوگىنىڭ يەگەرى – «قايرات» كوماندالارى فۋتبولدان قازاقستان سۋپەركۋبوگىن ساراپقا سالادى. ويىندى «حابار» تەلەارناسى تىكەلەي ەفيردەن كورسەتپەك (ترانسلياتسيانىڭ باستالۋى – استانا ۋاقىتى بويىنشا 15.55-تە).

وسىدان ەكى اپتا بۇرىن قازاقستان فۋتبول فەدەراتسياسىنىڭ (قفف) سايتىندا مىناداي اقپارات جاريالاندى: «قازاقستان سۋپەركۋبوگى ساراپقا سالىناتىن بۇل ماتچتى رەسەيلىك «سپورت 1» تەلەارناسى دا كورسەتەتىن بولادى. قفف بۇكىلرەسەيلىك مەملەكەتتىك تەلە جانە راديو حابارلارىن تاراتۋ كومپانياسىمەن وسىنداي كەلىسىم-شارتقا وتىردى». فەدەراتسيانىڭ باس مەنەدجەرى اسقار ۇرانحاەۆ ءوز تۇسىندىرمەسىندە ءتىپتى «استانا» مەن «قايراتتىڭ» ويىنىن ۋكراينانىڭ «سپورت» ارناسى دا كورسەتەتىنىن، ال بۇل ارنانى اتالمىش ەل حالقىنان بولەك بەلارۋس، مولدوۆا، ليتۆا، لاتۆيا جانە ەستونيا ەلدەرىنىڭ دە تاماشالايتىنىن ايتقان-دى. ياعني، قازاقستان سۋپەركۋبوگى ءۇشىن ماتچتى بۇرىنعى كەڭەس وداعىنىڭ ءبىرتالاي ەلى كورەتىن بولدى دەپ جار سالدى. بۇل بۇل ما، «تۇركيا، قىتاي جانە ت.ب. ەلدەردىڭ تەلەارنالارىمەن دە كەلىسسوز جۇرگىزىلىپ جاتىر» دەگەنىن قايتەرسىز؟

جۇرتشىلىق بۇل حابارعا اسا قۋانا دا، تىم سەنە دە قويعان جوق. ويتكەنى، بىرىنشىدەن، «استانا» مەن «قايراتتىڭ» ويىنى، باسقانى بىلاي قويعاندا، قازاق جانكۇيەرلەرىنىڭ ءوزىن قانشالىقتى قىزىقتىرادى؟ جارايدى، 30 مىڭ ادام سىياتىن «استانا-ارەنا» ءۇش اي قىستا فۋتبولدى ساعىنىپ قالعان كورەرمەنگە لىق تولسىن-اق دەلىك. جانكۇيەرلىكتىڭ جازىلماس دەرتى قانىنا سىڭگەن قالىڭ جازعان تەلەەكرانعا تەلمىرسىن-اق. بۇكىل قازاقستان قارامايدى عوي ءبارىبىر.

ەكىنشىدەن، وسى ويىن رەسەي، ۋكراينا نەمەسە ليتۆاداعى فۋتبول اۋەسقويلارىنىڭ نازارىن اۋدارادى دەگەنگە قفف شىنىمەن يلانا ما؟ ماسەلەن، فۋتبولدى وتە جاقسى كورەتىن مەنىڭ ءوزىم جوعارىدا اتالعان ەلدەردىڭ كوماندالارىنىڭ ويىندارىن قاراي بەرمەيمىن. سەبەبى، ماعان قىزىق ەمەس. انگليا، يسپانيا نەمەسە گەرمانيا چەمپيوناتتارى، چەمپيوندار ليگاسى تۇرعاندا، قايداعى ءبىر «سپارتاك» پەن «زەنيتتىڭ»، «دنەپر» مەن «مەتالليستىڭ»، «ەكراناس» پەن «جالگيريستىڭ» ويىنىن قايتەمىن؟ سول سەكىلدى كەز كەلگەن ورىس، ۋكراين نەمەسە ليتۆان جانكۇيەرى «استانا» مەن «قايراتتىڭ» ويىنىن قارايدى دەگەنگە كىم سەنەدى؟

ۇشىنشىدەن، وسىنداي ەشكىمدى قىزىقتىرا قويۋى نەعايبىل، وزگەلەر ءۇشىن رەيتينگى ءنول ويىندى كورىڭدەر دەپ، جۇرتقا جالىنۋ – ىڭعايسىز ەمەس پە؟ قازاق فۋتبولىن سىرتقا تانىتۋدىڭ باسقا دا جولدارى بار شىعار (ماسەلەن، كوماندالارىمىزدىڭ ويىنىن جاقسارتۋ، دەڭگەيىن كوتەرۋ). ونىڭ ۇستىنە، سپورت تەلەارنالارى قازىر انگليا، گەرمانيا، يسپانيا چەمپيوناتتارىن كورسەتۋ ءۇشىن تالاسىپ، سول فەدەراتسيالارعا قىرۋار قاراجات تولەيدى. بۇلاردىڭ رەيتينگى وتە جوعارى ەكەنىن، ەل قىزىعۋشىلىعىنىڭ وراسان زور ەكەنىن بىلەدى. ال ءبىزدىڭ ماتچتى كورسەتكەننەن ولار نە تابادى؟ ەشتەڭە دە. ناشار فۋتبول كىمگە ءدارى؟ دەمەك، ولار تەك ءبىزدىڭ تاراپ اقشا تولەسە عانا كورسەتۋگە كەلىسىم بەرمەك. ءويتىپ ايدالاداعى بىرەۋلەرگە اقشا تولەپ جانىققانشا، ءوز فۋتبولىمىزدى ءوزىمىز-اق كورىپ وتىرا بەرمەيمىز بە؟

...كەشە «سپورت 1» (رەسەي), «سپورت» (ۋكراينا) جانە «ترت اۆاز» (تۇركيا) ارنالارىنىڭ 1 ناۋرىز كۇنگى تەلەباعدارلامالارىن شولىپ شىقتىم. «استانا» – «قايرات» ويىنى ەشقايسىسىنىڭ دا كەستەسىندە جوق ەكەن. باسە...

ساكەن سىبانباي

Abai.kz