«نۇر وتان» پارتياسى ساياسي كەڭەسى بيۋروسىنىڭ قازاقستان حالقى اسسامبلەياسى كەڭەسىنىڭ قازاقستان رەسپۋبليكاسى پرەزيدەنتىنىڭ سايلاۋىن وتكىزۋ تۋرالى باستاماسىنا قاتىستى وتىرىسى ءوتتى. پارتيا جارعىسىنىڭ 9.5 پۋنكتىنە سايكەس ساياسي كەڭەس بيۋروسى قازاقستان حالقى اسسامبلەياسى كەڭەسىنىڭ 2015 جىلى پرەزيدەنتتىك سايلاۋ وتكىزۋ تۋرالى باستاماسىن قولداۋ تۋرالى مالىمدەمەنى ءبىراۋىزدان ماقۇلدادى.

سونداي-اق، قازاقستان حالقى اسسامبلەياسىنىڭ قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن وتكىزۋ تۋرالى باستاماسىنا قاتىستى «نۇر وتان» پارتياسىنىڭ مالىمدەمەسى جاريالاندى. مالىمدەمە ءماتىنى تومەندەگىدەي:

14 اقپاندا قازاقستان حالقى اسسامبلەياسىنىڭ كەڭەسى 2015 جىلى قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن وتكىزۋ تۋرالى باستاما كوتەردى.

«نۇر وتان» پارتياسى ەلدەگى جەتەكشى ساياسي كۇش رەتىندە اتالعان باستامانى تولىقتاي قولدايدى.

بۇگىندە الەمدە قارجى-ەكونوميكالىق داعدارىستىڭ جاڭا تولقىنى تارالىپ، كۇردەلى گەوساياسي قىسىمنىڭ سالدارىنان جاعداي شيەلەنىسە تۇسۋدە.

ءدال وسى كەزەڭدە ءتىپتى الەمنىڭ ەڭ دامىعان ەلدەردىڭ وزىندە دە كسەنوفوبيا، ءدىني توزىمسىزدىك ءورشىپ، راديكالدىق قوزعالىستار كۇش الۋعا اينالدى.

ەلباسى «نۇر وتان» پارتياسى ساياسي كەڭەسىندە اتاپ ايتقانداي، «تاياۋداعى جىلدار جاھاندىق سىناقتاردىڭ ۋاقىتى بولادى. بارلىق ەلدەر وسى كۇردەلى كەزەڭنەن ويداعىداي وتە المايدى. بۇدان تەك مىقتى مەملەكەتتەر، جۇدىرىقتاي جۇمىلعان حالىقتار عانا وتەتىن بولادى».

قازاقستان جاھاندىق دۇنيەنىڭ ءبىر بولشەگى بولعاندىقتان، سىرتقى تەرىس ىقپالداردان تىس قالا المايدى.

سوندىقتان، مەملەكەت باسشىسى «نۇرلى جول» باعدارلاماسىن ۇسىندى، ەكونوميكا ءوسىمىن قامتاماسىز ەتۋدىڭ بارلىق شارالارى قابىلداندى.

«نۇرلى جول» باعدارلاماسى – بۇل تەك ناقتى، جەتە ەسەپتەلگەن ءىس-قيمىل جوسپارى عانا ەمەس، بۇل - كەلەشەكتىڭ ينفراقۇرىلىمىنا سالىنعان اسا اۋقىمدى ينۆەستيتسيا، بۇل - جۇمىس ورىندارى، قاراپايىم قازاقستاندىقتاردىڭ جايلى تۇرمىسىن ساقتاپ قالۋ، ولاردىڭ كەمەل كەلەشەككە دەگەن سەنىمى.

بۇگىنگى تاڭدا بىرلىك پەن كەلىسىمدى، تۇراقتىلىقتى نىعايتۋدىڭ، قوعام مەن مەملەكەتتىڭ، ەلىمىزدىڭ بارشا ازاماتتارىنىڭ كۇش-جىگەرىن جۇمىلدىرۋدىڭ ماڭىزى وراسان.

وسىعان بايلانىستى، قازاقستان حالقى اسسامبلەياسىن قولداي وتىرا، كەزەكتەن تىس پرەزيدەنتتىك سايلاۋ وتكىزۋ باستاماسىن حالىق مۇددەسىنە ساي كەلەتىن ەڭ دۇرىس شەشىم دەپ سانايمىز.

مۇنداي قادامنىڭ قازىردىڭ وزىندە-اق پارلامەنتتى، ۇكىمەتتى، ورتالىق جانە جەرگىلىكتى باسقارۋ ورگاندارىن ءتاستۇيىن جۇمىلدىرىپ، حالىقتىڭ ومىرشەڭ ەنەرگياسىن باستى ماقسات – وتانىمىز قازاقستان رەسپۋبليكاسىنىڭ گۇلدەنۋى مەن وركەندەۋىنە باعىتتاۋعا جول اشادى.

ءبىزدىڭ حالقىمىز ەل تاريحىنىڭ ەڭ ءبىر شەشۋشى ساتتەرىندە بولاشاق ۇرپاق قامى ءۇشىن دانالىق تانىتا وتىرىپ، ءوز ليدەرىنىڭ توڭىرەگىنە توپتاسۋ مەن بىرىگۋدىڭ اسا بيىك دەڭگەيىن كورسەتتى.

«نۇر وتان» پارتياسى بارشا ەل ازاماتتارىن، بارلىق ساياسي پارتيالار مەن قوعامدىق كۇشتەردى كەزەكتەن تىس پرەزيدەنت سايلاۋىن وتكىزۋ باستاماسىن قولداۋعا شاقىرادى.

بۇل ءبىزدىڭ ۇزاقمەرزىمدى «قازاقستان-2050» ستراتەگياسى مەن ماڭگىلىك ەل يدەياسىنىڭ جۇزەگە اسىرىلۋىن قامتاماسىز ەتە وتىرىپ، بۇدان دا قۋاتتى، بۇدان دا ءتاستۇيىن بولا ءتۇسۋىمىزدىڭ تاريحي مۇمكىندىگى.

استانا ق.

2015 جىلدىڭ 16 اقپانى

اباي-اقپارات.