الدىمەن اتى-جوندەرىن، قايدا وقيتىندارىن ايتىپ، وزدەرىن جاقسىلاپ تانىستىرىپ العان رف-نىڭ وندىردەي جاستارى ياعني، «بىزگە قوسىلىڭدار!» دەگەن ۇراننىڭ اينالاسىنا توپتاسقان دارىسكەرلەرى ۋكرينا حالقىنان، ۋكرايناداعى قۇربى-قۇرداستارىنان كەشىرىم سۇراۋدا.
- ءبىز، - دەيدى ولار، - ۋكراينا جەرىن بولشەكتەۋگە كىرىسكەن ەلىمىزدىڭ ءىس-ارەكەتىنە ۇيالامىز. سول ءۇشىن كەشىرىڭىزدەر!
- ءبىز، - دەيدى جانە ولار، - ۋكراينا ازاماتتارىنىڭ رەسەي تۇرمەلەرىندە زاڭسىز جاتقانىنا ۇيالامىز. كەشىرىڭىزدەر.
- ءبىز سىزدەرمەن تاتۋ-ءتاتتى ىنتىماقتا ءومىر ءسۇرىپ، ۇرپاقتار جالعاستىعىنىڭ بىرلىگىن كورگىمىز كەلەدى.
وسىنداي سوزدەرىمەن بەينەكورىنىسكە ءتۇسىپ، ونى الەۋمەتتىك جەلىلەر ارقىلى تاراتىپ جاتقان رەسەي فەدەراتسياسىنىڭ بالعىن ازاماتتارى ۇلكەن ادامگەرشىلىك جۇرەكپەن الەمگە ءۇن قاتۋدا. رەسەيدىڭ يمپەريالىق ۇستەمدىگىن كوكسەيتىن، كورشىلەرىنە تىزە باتىراتىن تىرلىگىنە سەلت ەتپەستەن قارايتىن ساياساتكەرلەرى مەن ونەر قايراتكەرلەرىن مىنا ۇل-قىزدارمەن سالىستىرا المايسىز. «وتكرىتايا روسسيا. پريسوەدينيايتەس ك نام» دەپ جالىنداپ تۇرعان جاستاردىڭ تورتكۇل دۇنيەنىڭ بارىنەن تىلەۋلەس دوستار تابارىنا سەنىمدىمىز. بىزگە، بىزگە عانا ەمەس، الەمگە ىزگى نيەتتى، قارىم-قاتىناسقا ىڭعايلى، ادامزاتتىق مۇراتتاردى تۋ كوتەرگەن، جاڭاشىل، ازات رەسەي كەرەك.
Abai.kz