بۇگىنگى قوعام اۋزى دۋالى، كورگەنى مەن تۇيگەنى كوپ ازاماتتارعا ءزارۋ. سونداي بويىندا قاراپايىمدىلىعى، دارحان دانالىعى مەن قازاقى قاعيداسى بار، كورەرمەن قاۋىمعا اقىلباي اقساقال رەتىندە كەڭىنەن تانىلعان اكتەر، قازاقستاننىڭ ەڭبەك سىڭىرگەن قايراتكەرى بەكجان تۇرىس مىرزامەن سۇحباتتاسقان ەدىك.

–بەكجان مىرزا، ءسىزدى «نامازعا جىعىلدى» دەگەن ءسوز بار عوي: وسى قانشالىقتى شىندىق؟

– شىندىق ەكەنى راس. بىلەسىز، قازاق دالاسىنا يسلام كەلگەلى پايعامبارىمىزدىڭ سۇننەتىن سالتقا، ءدىنىن داستۇرگە اينالدىرعان حالىقپىز. الەۋمەتتىك-تۇرمىستىق سالتىمىز، ءبىتىم-بولمىسىمىز يسلاممەن بىتە قايناسىپ، جاقسىلىقتىڭ تۇسىندا جاعالاسپاي، جاماندىقتىڭ تۇسىندا تابالاسپاي، وركەنيەتكە قادام باسقان ەلمىز عوي. كەزىندە، قىزىل يمپەريانىڭ تۇسىندا ءتىلىمىز تۇساۋلى، قيالعا كىسەن سالىپ تاستاپ، الدىمىز ور، جولىمىز تار بولعان كۇندە دە قازاق ءوزىنىڭ ءدىنىن جوعالتقان جوق. ايتەۋىر اۋىلدىق جەردە اتالارىمىز تىعىلىپ وقىسا دا، نامازىن وقيتىن. ادامدى اقىرەت پەن دۇنيەدە ناعىز باقىتتى ەتەتىن «يللاھي» جۇيە ەكەنىن بىلگەننەن كەيىن، مۇسىلمان ەكەنىمىزدى ءبىلىپ، نامازعا كەلگەنىمىز بار. اللاعا شۇكىر!

– بۇنى سۇراعان سەبەبىم – «نامازعا جىعىلعان» تالاي تالانتتى جىگىتتەر «سايتانعا سەرىك بولمايمىز» دەپ، ونەردەن، عىلىمنان جىراقتاپ كەتكەنىن بىلەمىز (بەكبولات تىلەۋحان، بەيبىت ساپارالى، مۇحامەتجان تازابەكوۆ، ساكەن قالىموۆ، ت.ت.). بىزدەگى يسلامدىق يماننىڭ پروگرەسسكە قارسى بولۋ ءۇردىسىن قالاي تۇسىنەسىز؟

– اركىمنىڭ قۇدايى ءوزىنىڭ جۇرەگىندە. كەيدە ەشتەڭەنىڭ بايىبىنا بارماي، «مىناۋ اناداي-مىناداي» دەپ، بىرەۋدىڭ ارتىنان ءسوز ايتقىشپىز عوي. ونىڭ قانداي ەكەنىن حاق تاعالا بىلەدى. مەن جاڭا تىلگە تيەك ەتتىم عوي، كەشەگى اباي مەن بۇقاردان قالعان، دالانىڭ يسلامىن ۇستانعان حالىقپىز. راس، ءتۇرلى-ءتۇرلى ناماز وقيتىندار بار. قاراپ وتىرساڭىز، ءار جەردە ءارتۇرلى ۋاعىز ايتىلىپ جاتادى. سول ايتىلىپ جاتقان ۋاعىزدارمەن كەلىسپەيتىن تۇستار دا بولادى. پايعامبارىمىزدىڭ (س.ا.ۋ.) حاديسىندە دە ايتىلعان: «ەگەر ايتىلىپ جاتقان ۋاعىز سەنىڭ جۇرەگىڭە قونىمدى، اقىلىڭا سىيىمدى بولسا – مەنىكى، ەگەر جۇرەككە قونىمسىز، اقىلعا سىيىمسىز بولسا، وندا ول – مەنىكى ەمەس».

نەگىزىندە ۇلتتى ۇيىتقى ەتەتىن – پاراسات، ادامدى ابزال ەتەتىن – يمان. ماحاتما گانديدىڭ ءبىر ءسوزى بار: «قۇداي – اش ادامعا نان بولىپ كورىنۋى مۇمكىن» دەگەن. سول سياقتى اركىمدىكى – ارقالاي. مەن ءوزى شىنايى، تازا قازاقپىن. وسى كۇنگە دەيىن بىرەۋدىڭ ۋاعىزىمەن ەمەس، كەشەگى بابالار ۇستانعان دىنمەن جۇرەمىن.

ءبىز كەڭ دالانى جايلاپ، كوشىپ-قونىپ ءومىر سۇرگەن ساۋىقشىل حالىقپىز. كونەدەن كەلگەن دۇنيەنى، اسىل مۇرامىز بەن مادەنيەتىمىزدى، ادەبيەتىمىزدى سىپىرىپ تاستاماۋىمىز كەرەك. قازىر بارلىق جەردە جاڭاشىلدىق قوي. مەن ۇنەمى ايتىپ وتىرامىن، جاڭاعا ۇمتىلۋ ءۇشىن، وتكەننەن ونەگە الۋ كەرەك. ءدىن – قازاقپەن ەمەس، قازاق – دىنمەن سۋسىندايدى عوي.

– بۇگىنگى قانداي دا ساحنادا بولسىن، قوعامدىق ومىردەگى تاقىرىپتىڭ ءبارى بار: جوعى بىرەۋ – ساياسات قانا. بۇل پىكىرمەن كەلىسەسىز بە؟

– كەلىسپەيمىن! ەلباسىنىڭ ءبىر جاقسى ءسوزى بار: «ساياسات كۇندە وزگەرەدى، ال ءدىن – ماڭگىلىك» دەگەن. ساياساتتى ەستىگىڭىز كەلسە، «قوجاناسىر ءتىرى ەكەن» دەگەن قويىلىمعا كەلىڭىز، سوندا ساياساتتىڭ كوكەسىن ايتىپ بەرەمىن.

ال ەندى ساياساتقا كەلگەندە ونەر ادامدارىنىڭ ءۇنى شىقپاي جاتاتىنى راس. قىزمەتى مەن بالالارىنا زيانى تيمەسىن دەپ، ءبارىمىز ءبىر شىرماۋدا وتىرمىز. ادىلدىك ايتۋعا، اقيقاتتىڭ الدىندا بۇگەجەكتەپ قالامىز. بەتكە ايتا المايمىز، بەتكە ايتۋ – وكپە ايتۋ ەمەس قوي.

بىراق تۋرا وسى نارسەگە كەلگەندە، ونەر ادامدارى وسال بولاتىنى راس. ءوزىڭ ءومىر ءسۇرىپ جاتقان ورتاڭا ءوز ويىڭ، پىكىرىڭ بولماسا، ادامسىڭ با؟ كەيدە قوعامعا بەلسەنە ارالاسقىڭ-اق كەلەدى، بىراق الدىڭدى وراپ تۇراتىن ادامدار بولادى...

مەن ورايى كەلگەندە ساياساتى ارالاس سوزدەن ەشقاشان جالتارعان ەمەسپىن. ەشقاشان اقيقاتتىڭ الدىندا بۇگىلگەن ەمەسپىن، ايتاتىن ويىمدى جازىپ، ءتىپتى ساحناداعى قويىلىمداردا پايدالانىپ ءجۇرمىن.

– رەسەيدىڭ كەز كەلگەن ونەر ادامى ءوز ەلىنىڭ بولاشاعى ءۇشىن الاڭداپ، ءبىرى – ءپۋتيننىڭ يمپەريالىق ساياساتىن جاقتاپ، ەكىنشىسى – قارسى بولىپ جۇرگەنىن ەستيمىز. نەگە ءبىزدىڭ ونەر ادامدارىندا وسىنداي بەلسەندىلىك جوق دەپ ويلايسىز?

– وسى جونىندە جاقىندا «ايقىن» گازەتىنە سۇحباتتاسقاندا ايتقان ەدىم. قايتالاپ ايتامىن، ۇلت ءۇشىن، ءتىل ءۇشىن كەلگەندە، ونەر ادامىنىڭ ءۇنى شىقپايدى. نەگە ەكەنىن ءوزىم دە تۇسىنبەيمىن. داستارحان باسىندا – دانىشپان، كوشەگە شىقسا – كوسەم، جيىنعا تۇسسە – شەشەن، ال نەگە سول شەشەندىگى مەن كوسەمدىگىن ۇلتتىڭ جولىنا سالماسقا؟ كەيدە جوعارى جاققا سىن ايتساڭ، ولار سىن ەمەس، سەنى قارسى كۇش رەتىندە قابىلدايدى.

دۇرىس ايتاسىز، رەسەيدىڭ كەز كەلگەن ءانشىسى رەسەيدىڭ بولاشاعى ءۇشىن الاڭدايدى. ولاردىڭ بەلسەندىلىگى سۇمدىق، ءتىپتى كەز كەلگەن مۇجىعىنا دەيىن: «و، گوسپودي، سپاسي مويۋ روسسيۋ!» دەپ تۇرادى. بىزگە كەلسەك، ىلعي سول – پرەزيدەنتتىك ستيپەنديا الا الماي قالعانىن، مەملەكەتتىك سىيلىققا ىلىنبەي، ءبىر كونتسەرتكە شىقپاي قالاتىنىن ايتادى. قاراپ وتىرساڭىز، ايقاي-شۋدان قۇرالعان جالعان پاتريوتيزم جاستاردىڭ ساناسىن ۋلادى، قازاقى مىنەزىنەن ايىردى. كوپتىڭ كوڭىلى كوڭىلشەك شوۋدىڭ جەتەگىندە كەتىپ جاتىر. سونى وياتاتىن، تۇرتەتىن يدەولوگيامىز ءبىراز السىزدەۋ بولىپ تۇر.

تالاي زوبالاڭ كورىپ، تالاي تارىعىپ تا، تورىعىپ تا وسكەن ۇلتىمىز ءبىرجولا ۇمىتسىزدىككە بوي الدىرماي، كەرىسىنشە، رۋحاني، ىشتەي مەدەت ىزدەگەن ۇرپاقتىڭ وكىلىمىز عوي. جاۋگەرشىلىك زاماندا دا، اشارشىلىق كەزدە دە ءبىزدىڭ رۋحىمىز قۇلدىراماعان ەدى. قازىر، شىنى كەرەك، ءبىزدىڭ رۋحىمىز قۇلدىراپ كەتكەندەي. ۇلت پەن ۇرپاقتىڭ نامىسىن وياتۋىمىز كەرەك. تاريحىن، تەگىن بىلمەيتىن ۇرپاق جەتىلىپ شىقتى. مىنە، سولار قاۋىپتى. ال ءتىلىن، ءدىنىن، ءدىلىن بىلمەيتىن، ۇلتىن سىيلامايتىن ادامنان جاقسىلىق كۇتۋگە بولمايدى. ولار تۋعان جەرىن ەمەس، تويعان جەرىن عانا سىيلايتىن «كوسموپوليت ۇرپاق».

– الدە بىزدەگى قازاقي مەنتاليتەت بويىنشا ۇلكەنگە، ۇلىققا قارسى بولماۋ كەرەك دەگەن ساياساتتىڭ سالقىنى جاعىمپازدىققا ۇلاسقان سياقتى ما، قالاي ويلايسىز؟

– ۇلىقتىق پەن كىشىلىك ءبىر بولەك، جاعىمپازدىق پەن جالتاقتىق ءبىر بولەك. مەن ءبىر تانىس اعامنان: «ايتىڭىزشى، ءبىز قانداي ۇلتپىز؟» – دەپ سۇرادىم. سوندا ول: «ساتقىندارىڭ ساتىمەن كوتەرىلىپ، جانتىقتارىڭ ءالى ولمەگەن ەلسىڭدەر!» – دەگەن ەدى. جانتىقتارىمىز سول جاعىمپازدىڭ جاراپازانىن ايتىپ ءجۇر. قازاندى قاسپاعىمەن، سيىردى باسپاعىمەن جۇتىپ جاتقان بالەقورلار مەن جالاقورلار ەلدىڭ ىرگەسىن سوگىپ ءبىتتى دەسەك، وتىرىك ەمەس. ۇلتىن شىن سۇيەتىن، تەرەڭ ويلايتىن تەكتى ۇرپاق قانا ەل قامىن ويلايدى.

– وركەنيەتتى ەۋروپادا مادەنيەت تەاترمەن ولشەنەتىنى انىق نارسە. بىزدە ەل باسقاراتىن، قوعامعا بيلىك جۇرگىزەتىن شەنەۋنىكتەر تەاتردا بوي كورسەتپەيدى. بىراق ولار وزدەرىن قوعامنىڭ قايماعى سانايدى. ەگەر ولار «قايماق» بولعاندا، ءبىزدىڭ مادەنيەتىمىزدىڭ قانداي بولعانى؟ وسىنى ويلانىپ كوردىڭىز بە؟

– بۇل تۋرالى ىلعي ايتىلىپ ءجۇر. راس، ەۋروپادا مادەنيەت تەاترمەن ولشەنەدى. ءار ۇلتتىڭ ءوزىنىڭ بولمىسى بار، كەلبەتى بار. مىسالى، كەز كەلگەن ۇلتتىڭ كەلبەتىن تانىتاتىن 3 قازىعى بار: ءتىلى، ءدىنى، ءدىلى. ءاربىر ازاماتتىڭ پارىزى وسى ۇشەۋىنە قىزمەت ەتۋ. قازاققا ۇلتتىق سانا مەن ۇلتتىق رۋح كەرەك. ۇلتتىق سانا مەن ۇلتتىق رۋحتىڭ اماندىعى - وركەنيەتكە ەندى قادام باسقان ەلدىڭ اماندىعى.

ءبىزدىڭ مادەنيەتىمىز – قانمەن كەلگەن مادەنيەت. قازاقتاي تەكتىلىكتى ساقتاعان حالىق جوق. ءبىزدىڭ قانىمىز تازا، بىراق جانىمىز تازارماي جاتىر. كەشەگى تاتتىمبەت، قۇرمانعازى، دينا اپالارىمىز ءبىر عانا قازاق ەلىن ەمەس، بۇكىل الەمدىك وركەنيەت پەن مادەنيەتتىڭ اسىل قازىناسىن قۇرادى. ال باتىستىڭ مادەنيەتى قازاققا مادەنيەت بولا المايدى. قازاقتىڭ مادەنيەتى دارا، بولەك. مەن كەشەگى كۇنگى قازاقتىڭ مادەنيەتىن جوعارى قويار ەدىم. كەشەگى كەز كەلگەن قازاقتىڭ بالالارىن قاراساڭىز، اكە-شەشەسىن مۇلتىكسىز تىڭداپ وسكەن. ال بۇگىن ءوسىپ كەلە جاتقان جاس ۇرپاق ەۋروپاعا ەلىكتەي مە، الدە ەكراننان كورگەنى مە – ايتەۋىر قاتىگەز بولىپ وسۋدە. ءبىز ەسەيگەنشە، 8–9 جاسقا كەلگەنشە اپالارىمىزدىڭ قوينىندا جاتتىق. انانىڭ قوينىندا جاتقان بالا مەيىرىمدى بولماعاندا، قانداي بولار ەدى؟ بۇگىندە سول مەيىرىمنەن ايىرىلىپ بارا جاتقاندايمىز. ءبارى وزىمىزگە، اسىرەسە انالارىمىزعا تىكەلەي بايلانىستى. ۇلتتىڭ ۇلت بولۋى – اناعا قاتىستى.

– ينتەرنەتتەگى ءبىر جازبادان «ەگەر بەكجان جازۋشى بولسا، تىنىمباي نۇرماعامبەتوۆ سياقتى جازار ەدى» دەگەن پىكىردى وقىعان ەدىم. بۇل – ءسىزدىڭ جازۋشىلىق قىرىڭىزدى بىلەتىن ادامنىڭ پىكىرى بولعانى عوي؟

– جازۋشىلىقپەن اينالىسپاسام دا، تىنىمباي اعانىڭ كوپ دۇنيەلەرىن ساحنالادىم. تىنىمباي اعانىڭ سول دۇنيەلەرىن جاقسى جەتكىزدىم، ول كىسى ءوز باعاسىن بەرگەن. سوعان قاراپ، سالىستىرىپ ايتقان شىعار. جازۋشى بولماسام دا، الەۋمەتتىك جەلىلەردە كەلىسپەي جاتقان كەمشىن تۇستاردى، ەلىمىزدە بولىپ جاتقان جاقسى نارسەلەردى جازىپ تۇرامىن. مەنىڭ و باستاعى كاسىبىم – اكتەر، اللانىڭ بەرگەن ريزىق-نەسىبەسى – تەاتر. ءوزىمدى تەك تەاتردىڭ ادامىمىن دەپ سانايمىن. ءانشى بولىپ كەتۋگە بولار ەدى، بىراق اللا ماعان تالانت بەردى، سول تالانتتى ادال كۇزەتۋىم كەرەك.

– ايتپاقشى، باسقالار سياقتى انشىلىكتى ءبىر كاسىپ قىلماۋىڭىزدىڭ سەبەبى نەدە؟

– ءاۋ دەمەيتىن قازاق جوق. قازاق دالاسى الىمساقتان بەرى، قاي وڭىرىنە بارساڭ دا، ءان مەن جىردىڭ، كوسەمدىك پەن شەشەندىكتىڭ قاينار كوزى. ءاربىر قازاق ءاندى جانىنا سەرىك ەتكەن. كەشەگى ءاندى ءبىز دە جانىمىزعا سەرىك ەتتىك. مۇحتار اۋەزوۆتىڭ سوزىمەن ايتساق: «انگە اۋەس، كۇيگە قۇمار بالا جانى سۇلۋ، تازا بولىپ وسەدى»، – دەگەن. مەنى دە تازا بولسىن دەپ، انگە اۋەس ەتىپ ءوسىردى. اقساقالدار مەن اتالارىمىزدىڭ اراسىندا جۇرگەن كەزدە: «ال، بالام، قولىڭا دومبىرانى الىپ، مايلىقوجانىڭ ءبىر تەرمەسىن ايت»، – دەيتىن سول اتالارىمىزدىڭ ىقىلاسى مەن باتاسىن الىپ وسكەن بالامىز. بارى – سول عانا.

– مارقۇم اشىربەك اعا سىعاي: ء«انشى-اكتەردىڭ دەنى تويدا ءجۇر. ماساڭ ورتادا جىلتىڭداپ جۇرگەن ءارتىس ساحنادا دا سۇرىنەدى. بىزدە توي جاعالاماي، ءوزىن-ءوزى ساقتايتىن جىگىتتەر از» دەگەن ەدى. اشەكەڭنىڭ سونداعى ايتپاعى – ءانشى مەن ءارتىستىڭ اسابالىق ونەرى ەدى. ال ءسىز سول اسابالىقتى قويىپتى دەپ ەستىدىك...

– اسابالىقتى تاستادىم دەپ، وتىرىك ايتپايمىن. اسابالىققا بۇرىننان قىزمەت ەتىپ كەلەمىن. اسابا بولعان كۇننىڭ وزىندە ىلتىڭ-جىلتىڭنىڭ اساباسى ەمەسپىن، سالماقتى اسابامىن. بىراق قازىر ەشكىمگە سالماقتى ءسوزدىڭ قاجەتى جوق، كەرىسىنشە، ارزان ءسوز، انەكدوت ايتاتىن جىگىتتەردى جاقسى كورەدى. مۇزافار اعامىز الىمباەۆ: «توي – تاربيەنىڭ مەكتەبى» دەگەن ەدى.

ءبىر شەتىنەن تويدا اكتەر وزىنە كوپ وبراز جيناپ قايتادى. سول ماقساتپەن دە تويدا جۇرەمىز. اشىربەك اعا سولاي ايتتى دەپ، اسابانى تاستاي المايمىن. مەنىڭ جالاقىمدى كوتەرگەن كۇنى اسابالىقتى مۇلدە قوياتىن شىعارمىن. تويعا كۇندە بارىپ جاتقان جوقپىن، ايىنا ءبىر رەت بارسام – باردىم، بارماسام 2–3 ايدا ءبىر رەت بارامىن.

– سىزبەن وسى سۇحباتتاسۋعا دايىندىق بارىسىندا ءوز اۋىلىڭىزدىڭ تىنىس-تىرشىلىگىنە، ونىڭ الەۋمەتتىك جاعدايىنا ءجىتى قارايتىنىڭىزدى، شاماڭىز كەلسە، ەلدەگى اعايىنعا جاردەم جاساپ تۇراتىنىڭىزدى ءبىلدىم. بۇل پەرزەنتتىك قانا پارىز با، جوق الدە الىس قويناۋدا قامالىپ قالعان اۋىلعا اراشا ءتۇسۋدىڭ امالى ما؟

– ءبىر جاعىنان، پەرزەنتتىك پارىز، ەندىگى ءبىر جاعىنان – اۋىلدىڭ تۇرمىس-تىرشىلىگىنە رۋحاني كومەكتەسۋ. اركىم ءوزىنىڭ وسكەن جەرى – تەمىر قازىعى دەسە بولادى. كىم ءوزىنىڭ تۋعان جەرىن جەك كورسىن؟ مەنىڭ اۋىلىم كەزىندە كولحوزدىڭ ءبىر بولىگى بولدى. شەتتە، قاراۋسىز، اۋىز سۋسىز قالعاندا، جۇگىرگەنىم راس. ۇمبەتوۆ اعامىزدىڭ الدىنا بارىپ اۋىلدىڭ جاعدايىن ايتقانىمدا، ول كىسى رازى بولىپ: «مەنىڭ الدىما كەلگەندەر ءۇي، جەر سۇراۋشى ەدى، بەكجان، سەنىكى ازاماتتىق ەكەن» دەگەن ەدى. ءاربىر ازاماتتىڭ اسىل پارىزى – ەلىنە، جەرىنە قىزمەت ەتۋ.

– بۇگىنگى سۇحباتتا ءبارىن ايتساق تا، تەاتر تاقىرىبىن كەندە قالدىرعان سياقتىمىز. ايتپاقشى، تەاترعا دەگەن كەندەلىك كىمنەن: كورەرمەننەن بە، ۇكىمەتتەن بە، رۋحانياتتىڭ توزىپ بارا جاتقانىنان با؟

– ارينە، ۇكىمەتتەن! ۇلتتىق ستاتۋس الا الماي جۇرگەنىمىزگە قانشا جىل بولدى؟! باسشىلىقتىڭ جۇمىسىنا ارالاسپايمىن، ءوز كاسىبىمدى بىلەتىن اداممىن. كەندەلىك بولىپ جاتسا، ول ءبىزدىڭ جالاقىمىز. سوسىن جانىم اشيتىن ءبىر جاعداي – جاستاردىڭ باسپانا ماسەلەسى. ءبىزدىڭ كەزىمىزدە ءۇي كەزەگىندە تۇراتىنبىز، ولاردا بۇگىن ونداي ءۇمىت تە جوق. «باسىڭدا باسپاناڭ جوق بولسا، باسىم بار دەپ ايتۋعا ۇيالادى ەكەنسىڭ» دەگەن ءسوزدى ءجيى ايتامىن. جاستار تاڭنان كەشكە دەيىن وسىندا جۇرسە دە، الاتىن جالاقىسى ماردىمسىز. سولارعا قاراپ، جانىڭ اشيدى. كەيبىرەۋلەر «اكتەر» بولۋ وڭاي ەكەن، جىلتىراپ تەلەديداردا جۇرەدى دەپ ويلاۋى مۇمكىن. ولاي ەمەس – قيىنداۋ...

– ال اقىلباي اقساقال سياقتى تەلەجوبالارعا ورالۋ جاعى ويدا بار ما؟

– ونى قايتىپ جاساي قويماس. بىراق سول اقساقالدىڭ تىلىمەن كوپ نارسە ايتقىڭ كەلەدى. شىركىن-اي، كەشەگى قارتتارىمىز قانداي ەدى؟ ايتقان ءسوزى وتەتىن، ەلدىڭ ارعى-بەرگىسىن بىلەتىن، زامانىن ويلاپ، دايەك ءسوزى – ارعىسى قۇراننان، بەرگىسى – قيسسالاردان باستالاتىن، ۇستەرىنەن دالانىڭ ءيىسى اڭقىعان قارتتار قايدا قازىر؟ كەزىندە بۇكىل ءبىر ايماقتى اقساقال باسقاراتىن. ءتىپتى اۋىلدىڭ اكىمى اقساقالدىڭ الدىنان ءوتىپ، باتاسىن الىپ، بىرگە اقىلداساتىن. بۇگىندە اقساقالدار اكىمدەردىڭ الدىنا قول قۋسىرىپ بارادى. وسىنداي اقساقالدار تاقىرىبىندا ءبىر تەلەجوبا بولسا دەپ ارماندايمىن...

قازىرگى اجەلەرىمىزدىڭ ءتۇرىن كورىپ جۇرسىزدەر. كەشەگى اردىڭ سۇتىمەن اۋىزدانعان، كيمەشەگى كىرلەمەگەن انالارىمىز قاي كەزەڭدە دە ەرىنە سەرىك، ۋادەسىنە بەرىك بولعان. ال بۇگىن شە؟ بۇگىندە ءبىزدىڭ جاسىمىزداعى كەلىنشەكتەر، اجە بولاتىن اپالارىمىز ەرىندەرىن بوياپ، شولتيعان شورتيىن كيىپ، باسىندا ءبوزى جوق، مۇرا قىلاتىن ءسوزى جوق. وسىعان دا جانىڭ اۋىرادى.

ۇلتىمىزدى ىلگەرى جەتەكتەۋ – يمانعا بايلانىستى. سوعان قاراعاندا، يمانىمىز السىزدەۋ مە دەپ ويلايمىن.

سۇحباتتاسقان جانسايا ەرتاي.

اباي.kz

دەرەككوز: «وبششەستۆەننايا پوزيتسيا»  گازەتى (پروەكت «DAT» №05 (276) وت 05 فەۆراليا 2015 گ.)

تۇپنۇسقاداعى تاقىرىپ: «بەكجان تۇرىس: مەن ەشقاشان اقيقاتتىڭ الدىندا بۇگىلگەن ەمەسپىن»