ءبىزدىڭ ەجەلگى كورشىمىز رەسەي مەن ەكىنشى ەندىكتەگى ەۋروپانىڭ اراقاتىناسى ابدەن سۋىنىپ بولدى. ەكى تاراپ اراسىنداعى ەكونوميكالىق قىسىم كورسەتۋ شارىقتاۋ شەگىنە جەتىپ، ودان شەگەتىن زياندى ءۇشىنشى مەملەكەتتەر سەزىنىپ جاتىر.

كارى قۇرلىق پەن ورىس ورمانى اراسىنداعى قىرعي-قاباق قاتىناس ەندى ساياسي ديپلوماتيالىق ساتىعا تۇسكەن ءتارىزدى. بۇلاي دەۋىمىزگە تۇرتكى: ەۋروپا كەڭەسى پارلامەنتتىك اسسامبلەياسىنا قاتىسۋشى ەلدەر كوپشىلىك داۋىسپەن رەسەي مەملەكەتىن داۋىس بەرۋ قۇقىنان ايىردى. شەشىم بويىنشا رەسەي الداعى ءساۋىر ايىنا دەيىن اسسامبلەياعا قاتىسۋشى ەلدەرمەن تەڭ قۇقىلى بولا المايدى. بىلاي قارعاندا ۋاقىتشا شەكتەۋ سياقتى بولعانىمەن، شەشىمنىڭ سوڭىندا ءزىل جاتقانى انىق.

نەگىزى، الەمدىك گەوساياسي ولشەممەن العاندا ەۋروپا كەڭەسى پارلامەنتتىك اسسامبلەياسى دەگەن قۇرىلىمنىڭ تۇزى جەڭىلدەۋ بولىپ كورىنەتىنى راس. بىراق، ەۋروپا وداعىنىڭ ەلدەرىن بىرىكتىرەتىن ۇيىمنىڭ ەكونوميكالىق قاتىناستاردى رەتتەۋگە جانە مەملەكەتتەردەگى دەموكراتيالىق قۇقىقتىڭ ساقتالۋىن قاداعالاۋعا كەلگەندە قاتىپ قالعان قاعيداتتارى جانە بار. رەسەيگە كورسەتىلگەن دوڭايبات وسى تۇرعىدا، دونەتسك جانە لۋگانسكىدەگى «حالىقتىق رەسپۋبليكالار» دەگەن اتاۋمەن قۇرىلعان باسقارۋ جۇيەسىنە قاتىستى تۋىنداعان. رەسەي ءوز كەزەگىندە بۇل «رەسپۋبليكالاردى» مويىنداپ، مەملەكەت رەتىندە تانيتىندىعىن جاريالاعان بولاتىن. ال، ەۋروپا كەڭەسى دونەتسك جانە لۋگانسكىدەگى «حالىقتىق رەسپۋبليكالارىن» تەررورلىق ۇيىمدار قاتارىنا جاتقىزىپ وتىر.

اباي.kz