قازاقتىڭ سوڭعى حانى، الاش بالاسىنىڭ ازاتتىعى ءۇشىن اقتىق دەمى شىققانشا رەسەيمەن ارپالىسىپ وتكەن كەنەسارى قاسىمۇلىنىڭ باس سۇيەگىن ىزدەۋگە  قاتىستى تاريحي دەرەكتەردە بىرىزدىلىك جوق ەكەنى انىق. سۇلتاننىڭ باس سۇيەگى رەسەي مۇراجايلارىندا جاسىرىن تۇردە ساقتالىپ  وتىرعانى جايلى اقپارات بولعانىمەن، ونى ىزدەپ تابۋعا قاتىستى جۇمىستار ۇنەمى ءساتسىز اياقتالىپ كەلەدى.

پاتشالىق رەسەيدىڭ جازالاۋشى وتريادتارىنىڭ قۋعىنداۋىمەن قىرعىز جەرىنە ءوتىپ كەتكەن كەنەسارى حاننىڭ اجالى ايىر قالپاقتى ماناپتاردان كەلگەنى بەلگىلى. ەل اۋزىندا قىرعىز ماناپتارى سۇلتاندى ءولتىرىپ، ونىڭ باسىن ورىس پاتشاسىنا تارتۋ-تارالعى رەتىندە بەرگەنى جايلى اڭىز بار.  بۇل دەرەكتەر تاريحي دايەكتەرمەن دالەلدەنگەن دە. الايدا، باس سۇيەكتىڭ ناقتى قانداي مۇراجايدا ساقتالىپ تۇرعاندىعى نەمەسە جەكە ادامنىڭ قولىندا جۇرگەندىگى جايلى جۇمباققا تولى سىر اشىلماي-اق قويدى…

مىنە، قازاقتىڭ سوڭعى حانىنا قاتىستى تاعى ءبىر تاريحي دەرەكتىڭ حابارى شىقتى. قر ۇعا كوررەسپوندەنت-مۇشەسى، تاريح عىلىمدارىنىڭ دوقتورى، پروفەسسور، ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى حانگەلدى ءابجانوۆتىڭ مالىمدەۋىنشە، كەنەسارىنىڭ باس ۇيەگى رەسەيدىڭ ومبى وبلىسىنىڭ مۇرجايىندا ساقتالۋى مۇمكىن.

«ومبىدا ەڭ قىمبات دۇنيەلەردى ساقتايتىن مەملەكەتتىك قورعاۋ قىزمەتى جۇمىس ىستەيدى. كەنەسارى حاننىڭ باسى سول جەردە بولۋى مۇمكىن دەگەن بولجام بار. سوندىقتان، كەنەسارى حاننىڭ باسىن باتىس سىبىردەن، ومبىدان ىزدەۋ كەرەك دەگەن تاعى ءبىر بايلامعا كەلىپ وتىرمىز»، - دەدى عالىم بۇگىن استانادا وتكەن بريفينگتە.

بۇعان دەيىن اتالعان ينستيتۋتتىڭ عىلىمي ەكسپەديتسيالارى ماسكەۋ، سانكت-پەتەربۋرگ قالالارىنىڭ تاريحي جادىگەرلەر ساقتالاتىن مۇراجايلارىندا ىزدەستىرۋ جۇمىستارىن جۇرگىزگەن بولاتىن. «دەرەك بار، بىراق باس سۇيەك جوق. اتاپ ايتقاندا بيىل دا، جالپى الداعى ۋاقىتتا دا ىزدەۋ جۇمىستارى اياقتالمايدى» دەدى حانگەلدى ءابجانوۆ. 

اباي.kz