قاڭتاردىڭ 9-ى كۇنى عالامتوردا ەكس-پرەمەر ءھام ەكس-مينيستر سەرىك احمەتوۆ تۋرالى جامانات حابار تاراپ كەتكەن ەدى. الگى سۋىق حاباردا مىرزاقاماقتاعى احمەتوۆ وزىنە ءوزى قول جۇمساپ ءولىپتى دەپ ايتىلعان بولاتىن.

الايدا بۇل ءسوزدى قاراعاندى وبلىسىنداعى مەملەكەتتىك قىزمەت جانە كوررۋپتسياعا قارسى كۇرەس اگەنتتىگىنىڭ دەپارتامەنتى سول كۇننىڭ ەرتەڭىندە جوققا شىعاردى. جوققا شىعارا وتىرىپ قاۋەسەتتى تاراتۋشىعا ىزدەۋ جاريالاناتىنى، الەۋمەتتىك جەلىلەر ارقىلى ءدۇيىم جۇرتتى دۇرلىكتىرگەن وتىرىكشىنىڭ جازالاناتى جايىندا ايتقان. سودان بەرى ەكى جۇما وتە احمەتوۆتى اي مەن كۇننىڭ امانىندا «و دۇنيەگە اتتاندىرىپ جىبەرگەن» ادام ۇستالدى. ونىڭ تۇتقىندالعانى تۋرالى جامبىل وبلىسى ىشىكى ىستەر باسقارماسىنىڭ ءباسپاسوز قىزمەتى راستاپ وتىر. ول – 1990 جىلى تۋعان «كوگەرشىن» اۋىلىنىڭ تۇرعىنى بايشەمىروۆ دەگەن ازامات بولىپ شىقتى. «ۆ كونتاكتە» الەۋمەتتىك جەلىسىنە «رۋسلان ماەكەەۆ» دەگەن جالعان اتپەن فەيس-اككۋانت اشقان بايشەمىروۆ ەكس-پرەمەر وزىنە ءوزى قول جۇمساپ ءولدى دەگەن قاۋەسەت تاراتقانىن مويىنداپ قويعان كورىنەدى.

ەستەرىڭىزگە سالا كەتەيىك، بۇرىنعى ۇكىمەت باسشىسى، كەيىن قورعانىس ءمينيسترى قىزمەتىن اتقارعان سەرىك احمەتوۆ 2014 جىلى 22 قازاندا وتستاۆكاعا كەتكەن ەدى. مەملەكەتتىك دەڭگەيدەگى لاۋازىم يەسى وتستاۆكاعا جاي كەتە سالعان جوق، قوعامدى ەكىۇداي ويعا قالدىرعان اڭگىمەلەردى ارقالاپ كەتتى. سول اڭگىمەلەردىڭ ءبىر پاراسى احمەتوۆ قورعانىس ءمينيسترى بولىپ تۇرعان كەزىندە قىزمەت بابىن پايدالانىپ، اسا ءىرى كولەمدە بيۋدجەت قاراجاتىن قىمقىرىپتى دەگەنگە سايادى. قازىر ول مىرزاقاماقتا (ەرىكسىز ءۇي تۇتقىنى). قاراعاندىداعى ۇيىندە. تەرگەۋشىنىڭ رۇقساتىنسىز ەشكىممەن تىلدەسە المايدى.

وسىنداي حالدەگى ەكس-شەنەۋنىكتى ولدىگە ەسەپ قىلعان بايشەمىروۆ قىلىمىستىق جاۋاپكەرشىلىككە تارتىلۋى ىقتيمال.

Abai.kz