ورىس يمپەرياسىنىڭ سوعىس تاجىريبەسى ۋكراينادا قولدانىلىپ جاتىر.
جالپى ورىس يمپەرياسى ۋادەلەر مەن كەلىسىم-شارتتاردى الداندىرا تۇرۋدىڭ قۇرالى ەتىپ كەلگەنى بەلگىلى. ءبىز قازاقتاردى دا سول سەنگىشتىگىمىزدەن پايدالانىپ، حالقىمىزدى قىرىپ، جەرىمىزدەن ايىردى. ەندى ۋكراينانى دا مينسك كەلىسىمى ارقىلى الداي تۇرىپ، گۋمانيتارلىق كومەك دەگەن اتپەن وق-ءدارى، قارۋ-جاراقتى تاسىدى. ەندى ء"بىزدىڭ اسكەر ۋكراينادا جوق" دەپ بەتپاقتانا وتىرىپ، اسكەرىن كىرگىزىپ جاتىر. تىپتەن قىرعىن سوعىسقا سالۋدا. جۇمىسسىز قالعان جاستار مەن تۇرمەدەگى بانديتتەردىڭ ءبارىن جالاقى بەرىپ، پسيحولوگيالىق دايىندىقتان وتكىزىپ، سوعىسقا دايىنداپ، ۋكرايناعا اتتاندىردى. ايتپەسە، سەپاراتيستەردىڭ قارۋى وسىنداي وزىق بولماس تا ەدى جانە ولار بۇل قارۋلاردى پايدالانا بىلمەيدى عوي. 
جالپى رەسەيدىڭ ابحازيا مەن وسەتيا ءۇشىن گرۋزيانى، تاۋلى قاراباق ءۇشىن ازەربايجاندى قۇرباندىققا شالعانى بەلگىلى. ەندى سول ءتاسىلدى ۋكرايناعا قولدانباق. الايدا ۋكراينا وڭاي الدىرار قارسىلاس ەمەس. بۇل - باتىس پەن رەسەيدىڭ ساياسي مۇددەسىنىڭ تۇيىسكەن جەرى. 
ەندى بالتىق ەلدەرى جانتالاسا شىرىلداپ جاتىر. ەۋروپا نە ارى ەمەس، نە بەرى ەمەس، ەكى ورتادا ءجۇر. اقش سوعىس دايىندىعىنا كوشتى. ولار ۋكراينانى قارجىمەن، قارۋ-جاراقپەن قامداپ وتىر. وسىلايشا عالامدىق سوعىستىڭ جاڭا وشاعى پايدا بولۋ قاۋپى بار. 
رەسەيدىڭ كۇشەيۋى دە، تىم السىرەپ كۇيرەۋى دە قازاقستانعا ءتيىمسىز. ۇيرەنگەن جاۋدى پايدالانا وتىرعان ابزال شىعار. 

بەيسەن احمەتۇلى.

اباي.kz