شەتەلدە تەولوگيالىق ءبىلىم الۋ ماسەلەسىن رەتتەۋ قاجەت
جىل سايىن جۇزدەگەن ازاماتتارىمىز شەتەلدەرگە ءبىلىم الۋ ءۇشىن كەتىپ جاتادى. «بولاشاق» پرەزيدەنتتىك ستيپەنديا باعدارلاماسىن ءبارىمىز بىلەمىز. سول باعدارلاما ارقىلى ماماندار شەتەلدىڭ جەتەكشى جوعارى وقۋ ورىندارىندا ەلىمىزدىڭ ەكونوميكاسىنىڭ باسىم سەكتورلارىنا قاجەتتى بىلىمدەردى يگەرۋدە. سونداي ۋنيۆەرسيتەتتەردە ءبىلىم الىپ كەلگەن جاس قازاقستاندىقتار ەلىمىزگە قايتا ورالىپ، ورتالىق جانە مەملەكەتتىك ورگانداردا، ۇلتتىق كومپانيالاردا لاۋازىمدارعا تاعايىندالادى، ەلىمىزدىڭ ەكونوميكاسى مەن قوعامدىق ءومىرىنىڭ دامۋىنا ۇلەس قوسا وتىرىپ، ءوز بيزنەستەرىن دە اشادى.
ينجەنەردىڭ نەمەسە قارجىگەردىڭ وقۋىن بىتىرگەن سوڭ العان ءبىلىمىن وتاندىق ونەركاسىپ مەكەمەلەرىندە نەمەسە ۇلتتىق بانكتە قولدانۋ بولەك ءبىر ماسەلە. ال، ءدىني ءبىلىم بولسا ەلىمىزدىڭ كەلەشەك رۋحاني ليدەرلەرىن، ءدىندار ازاماتتارعا باعدار بەرەتىن، ولاردىڭ دۇنيەتانىمىنا، مورالىنە، ادامگەرشىلىك قۇندىلىقتارىنا اسەر ەتەتىن ادامداردى دايىندايدى.
ەگەر شەتەلدەردە ءبىلىم الۋ پروتسەسى زاڭنمەن رەتتەلمەيتىن بولسا شە؟ وندا نە بولماق؟ شەتەلدە بەرىلىپ جاتقان ءدىني بىلىمدەگى رۋحاني قۇندىلىقتاردىڭ ءبىزدىڭ قازاقستاندىق قۇندىلىقتارعا سايكەس كەلەتىندىگىنە كەپىلدىك قايدا؟ سونىمەن قوسا ولار دەسترۋكتيۆتى راديكالدى سيپاتتا بولسا شە؟
كوپتەگەن ساراپشىلاردىڭ پىكىرىنشە شەتەلدەردە ءبىلىم الۋ ءبىزدىڭ قوعامعا راديكالدى اعىمداردىڭ كەلۋىنە اكەپ سوعادى. سونداي-اق شەتەلدە رۋحاني ءبىلىم العان ازاماتتار بوگدە مادەنيەتتەر نەگىزىندە وقىعان جانە ءوز ەلىندەگى ءدىندار ادامداردىڭ ماسەلەلەرىن شەشە الماۋى مۇمكىن.
بۇل ماسەلەنى شەشۋدىڭ قانداي ادىستەرى بار؟ تاڭدالعان جوعارى وقۋ ورنىن ءتيىستى ءدىني بىرلەستىكپەن كەلىسىپ العان ءجون بولار ەدى. وسىلايشا تاڭدالعان وقۋ ورنىنا بارابار باعا الۋعا بولادى. ياعني، وسى لوگيكامەن جۇرەتىن بولساق، شەتەلدىك وقۋ ورىندارىنا يمامنىڭ وقۋىنا تۇسكىسى كەلەتىندەر قمبد-دەن جولداما نەمەسە كەلىسىم الاتىن بولادى.
بۇل ماسەلەنى شەشۋدىڭ باسقا ءبىر ءادىسى – ەگەر كانديدات قازاقستاندا رۋحاني ءبىلىم الىپ، سەنىم نەگىزدەرىن قالىپتاستىرعان بولسا، وعان شەتەلدە ءدىني ءبىلىم الۋعا رۇقسات بەرۋ. سوندا ولار جات يدەولوگيالار مەن راديكالدى ءدىني اعىمدارعا بەرىلە قويمايتىن بولادى.
سوندىقتان دا ءدىن ىستەرى جانە ازاماتتىق قوعام مينيسترلىگىنىڭ مۇفتياتپەن بىرلەسە وتىرىپ، وسى پروتسەستى زاڭنامالىق تۇرعىدان رەتتەۋدى قولداۋى ۋاقىتىلى بولار ەدى. سەبەبى، ەڭ باستىسى جاستارىمىزدى ءارتۇرلى راديكالدى ءدىني اعىمداردىڭ دەسترۋكتيۆتى اسەرىنەن قورعاۋ بولىپ تابىلادى.
ب.ءا. ەسماحان، قر دىاقم دىك يسلامدىق ءدىني بىرلەستىكتەرمەن بايلانىستار باسقارماسىنىڭ باسشىسى
Abai.kz
