قر ۇلتتىق قاۋىپسىزدىك كوميتەتى سانكت-پەتەربۋرگتەگى تەرراكتىگە قاتىستى بۇقارالىق اقپارات قۇرالدارىندا تاراپ جۇرگەن اقپاراتقا تۇسىنىكتەمە بەردى، دەپ xابارلايدى قازاقپارات ءتىلشىسى.

"تەرروريستىك اكت تۋرالى اقپارات تۇسكەن بويدا ءبىز بىردەن ورتاق جۇمىسقا كىرىستىك. بۇگىن رەسەيدىڭ فەدەرالدى قاۋىپسىزدىك قىزمەتىمەن ءبىر ازاماتتىڭ ول تەرراكتىگە قاتىسى بار-جوعىن تەكسەرىپ جاتىرمىز. ول - ورتالىق ازيانىڭ تۋماسى. بىراق قازاقستان ازاماتى ەمەس. بۇعان دەيىن "تەرروريستىك اكتىگە قازاقستاندىق ماكسيم ارىشەۆتىڭ قاتىسى بار بولۋى مۇمكىن" دەگەن اقپارات تاراعان بولاتىن. اتالعان اقپارات شىندىققا جاناسپايدى. ول كوميتەتتىڭ باقىلاۋىنا تۇسپەگەن، تىركەۋگە دە الىنباعان. رەسەيلىك ارىپتەستەرىمىز دە ونى تەرراكتىنى ۇيىمداستىرۋشىسى رەتىندە قاراستىرىپ جاتقان جوق. شاماسى، ول - تەرراكتىنىڭ قۇربانى. سەبەبى جارىلىستىڭ ءدال ورتاسىندا بولعان", - دەدى قر ۇلتتىق قاۋىپسىزدىك كوميتەتى توراعاسىنىڭ ورىنباسارى نۇرعالي بىلىسبەكوۆ ۇكىمەتتىڭ بۇگىنگى وتىرىسىندا.

ونىڭ ايتۋىنشا، جاقىن ارادا تەرراكتىنىڭ ۇيىمداستىرۋشىسى، سونداي-اق وعان قاتىسى بار ازاماتتار انىقتالۋى ءتيىس. سول كەزدە رەسمي اقپارات جاريالانادى.

ايتا كەتەيىك، بۇعان دەيىن «فونتانكا» ينتەرنەت-گازەتى 3 ءساۋىر كۇنى سانكت-پەتەربۋرگ مەتروسىندا بولعان جارىلىستى ۇيىمداستىرۋى مۇمكىن جانكەشتىنىڭ ەسىمىن اتاعان ەدى.

اباي-اقپارات