ەشكىم اللانى تانىپ تۋمايدى. بىرەۋ ەرتە، بىرەۋ كەش، ايتەۋىر اللا ءناسىپ ەتكەن كۇنى ەشقاشان ماڭدايى ساجدەگە تيمەيتىندەي بولعان ادامنىڭ ءوزى يماندىلىققا بەت بۇرىپ جاتادى. سوندىقتان مەشىتكە كەتىپ بارا جاتقان ادامنىڭ ءوزىن سىراxاناعا بەت العان ادامنان جوعارى قويۋعا قاقىسى جوق. سەبەبى، ادام تاعدىرىنىڭ قاي باعىتقا قاراي اۋىپ كەتەتىنىن تەك اللا عانا بىلەدى. مىنانداي ءبىر ءتامسىل بار.

ءبىر قاراقشى 40 جىل كۇنا ىستەيدى. ءبىر كۇنى ول يسا پايعامباردىڭ ءبىر xاۋاريمەن بىرگە كەتىپ بارا جاتقانىن كورىپ، سولارعا قوسىلماق نيەتپەن سوڭدارىنان ەرەدى. الايدا: "مەن سياقتى قاراقشىنىڭ مۇنداي ۇلى ادامنىڭ قاسىندا ءجۇرۋى قالاي بولار ەكەن؟" دەپ، وتكەن ومىرىنە وكىنىپ تە قويادى. ال xاۋاري بولسا: "مىنا قاراقشى قايدان عانا تاپ بولا قالدى. بۇنىمەن قالايشا بىرگە جۇرەمىن" دەگەن ويعا بەرىلەدى. سول كەزدە يسا پايعامبارعا اللادان: "ەكەۋىنە دە ايت! ەكەۋىنىڭ دە وتكەن ومىرلەرىن جويدىم. امالدارىن جاڭادان باستاسىن. ءوزىن ۇناتقانى ءۇشىن xاۋاريدىڭ عيباداتتارىن جويدىم. ءوزىن تومەن ساناعانى ءۇشىن قاراقشىنىڭ كۇنالارىن كەشىردىم" دەگەن ۋاxي كەلەدى.

سونىمەن يسا پايعامبارعا ىقىلاس قويعان ءبىر قاراقشى بارلىق كۇناسىنەن پاك بولدى. سول سياقتى ءبىزدىڭ پايعامبارىمىزعا (سعس) يمان كەلتىرگەن بۇكىل ساxابالاردىڭ ءومىرى دە كىرشىكسىز اق قاعازداي جاڭادان باستالدى. سول پاكتەنۋ ءۇردىسى ءالى كۇنگە دەيىن جالعاسىپ كەلەدى. ول - تاۋبە ارقىلى جۇزەگە اسادى. وسى جەردە كىلتيپان بار. جالپى ءدىندارلار اراسىندا: "كىم دە بولسىن ەكىنشى رەت قايتالاماۋ شارتىمەن وتكەن كۇنالارىنا وكىنىش ءبىلدىرىپ تاۋبە ەتسە، بارلىق كۇنادان پاك بولادى" دەگەن تۇسىنىك بار. سوندا قالاي، كۇنانى وكىنىش كەتىرە مە؟ الدە كاليما ءشاhادات كۇيدىرە مە؟ بىلگەن ءجون. ەكەۋى دە كۇيدىرمەيدى. كەيدە كاپىر دە، كۇناhار دا، قىلمىسكەر دە جاساعان اعات ىستەرىنە وكىنىش ءبىلدىرىپ جاتادى. بىراق ول وكىنىشتەرىنەن ەشقانداي قايىر بولمايتىنىن ءبارىمىز دە جاقسى بىلەمىز. سول سياقتى كاليما ءشاhادات ايتقان مۇسىلمانداردى دا كۇناسىز دەي المايسىڭ. سوندىقتان ءاۋ باستاعى تاۋبە شارتىنا ءمان بەرەيىك. ءبىز كەلتىرگەن تامسىلدەگى قاراقشى كۇناسى يسا پايعامبار ارقىلى كەشىرىلدى. ال ساxابالار پايعامبارىمىزعا (سعس) تاۋبە ەتكەننەن كەيىن بارىپ وتكەن كۇنالارىنان ارىلدى. دەمەك، كۇنا رۋxاني الەمنىڭ قۋاتىمەن عانا جۋىلادى. ول ءۇشىن رۋxاني الەممەن بايلانىستا تۇرعان اداممەن ۇندەسۋ كەرەك. سول ۇندەستىكتى تۇزەتىن ءدىن عۇلامالارىن ءبىز يشان دەيمىز. وكىنىشكە قاراي ءبىز ادام فاكتورىنا جەتە ءمان بەرە بەرمەيمىز. سوعان وراي پايعامبارىمىز (سعس) ۇمبەتتەرى ىشىنەن شىققان ءدىن عۇلامالارىنىڭ ەۆرەي xالقىنا كەلگەن پايعامبارلارمەن دارەجەسى تەڭ بولاتىندىعىن دا جادىمىزدان شىعارىپ العانبىز.

ءيا، كۇنا كەشىرىلەدى. بىراق ول ەشقاشان الگى كۇناhار قالاۋىمەن جۇزەگە اسپايدى. ماسەلەن ءبىر ادام جاساعان قىلمىسى ءۇشىن ءولىم جازاسىنا كەسىلدى دەلىك. سول ادام "مەن ءوز-ءوزىمدى كەشىردىم" دەپ، ءوز قىلمىسى جازاسىنان قۇتىلا الا ما؟ ونىڭ قىلمىسىن سوعان قۇقىلى ادام عانا كەشە الادى. ول - پرەزيدەنت. بۇل - ءبىز ايتقان ءجايتتىڭ ماتەريالدىق كورىنىسى. ال سول جاسالعان قىلمىستىڭ كۇناسى - سونىڭ رۋxانياتى. ونى تەك سول رۋxانيات يەسى كەشەدى. ال ونىڭ كىمدەر ەكەنىن جوعارىدا ايتتىق.

قۇديار ءبىلال

Facebook-تەگى پاراقشاسىنان