بارلىبەكتانۋعا قالاي كەلدىم؟

مەن، الماتى وبلىسىنىڭ اقسۋ اۋدانىنا قاراستى اراسان دەگەن ەلدىمەكەندە دۇنيەگە كەلىپپىن. بۇل ءوڭىر – رەسپۋبليكا جۇرتشىلىعىنا، الىس-جاقىن شەت ەلدەرگە ءوزىنىڭ شيپالى دا ەمدىك قاسيەتى زور سۋىمەن تانىمال ەدى. «قاپال –اراسان» دەپ اتالاتىن شيپاجايى بار. سول وڭىردەگى بارلىبەك سىرتتانوۆ اتىنداعى ورتا مەكتەپتى ءتامامداپ، «قازاق ءتىلى مەن ادەبيەتى» ماماندىعىنىڭ قىر-سىرىن جەتىك مەڭگەرىپ، ماماندانۋ ءۇشىن رەسپۋبليكالىق گرانت جولداماسى ارقىلى تورعاي وڭىرىندەگى ىبىراي ءالتىنساريننىڭ ەسىمىن يەلەنگەن ارقالىق مەملەكەتتىك پەدينستيتۋتىندا وقىدىم. ستۋدەنتتىك جىلدارى ۇستازىم ءارى عىلىمي جەتەكشىم ايبەك قاليەۆتىڭ تىكەلەي تاپسىرماسىمەن الاش ادەبيەتىن ديپلوم جۇمىسىنا تاقىرىپ رەتىندە بەكىتىپ، وسى سالاداعى كەيبىر ماسەلەلەردى زەرتتەي باستادىم. مىنە، سودان بەرى وسى – الاشتانۋ سالاسىنا ماماندانىپ كەلەمىز.

6 سىنىپتا وقىپ جۇرگەنىمدە، ياعني، 2006 جىلى ءبىزدىڭ مەكتەپتە بارلىبەك سىرتتانۇلىنىڭ  140 جىلدىق مەرەيتويى قارساڭىندا  عىلىمي كونفەرەنتسيا وتكەن-ءدى. سىنىپ جەتەكشىم، عىلىم سالاسىنا باۋلىعان العاشقى ۇستازىم – قارلىعاش نۇرمۇحانقىزى وقۋشى تىلىنە لايىقتاپ،  «بارلىبەك سىرتتانوۆ جانە ونىڭ ۇزەڭگىلەس دوستارى» دەپ اتالاتىن بايانداما جازىپ بەردى. مەن وسى باياندامانى وقۋشىلار كونفەرەنتسياسىندا وقىپ، قايراتكەر بارلىبەك تۋرالى العاش رەت كولەمدى مالىمەت الىپ ەم... كەيىن ستۋدەنتتىك جىلدارى «قازاقستان تاريحى» پانىنەن ب.سىرتتانۇلىنىڭ قوعامدىق-ساياسي قىزمەتىنە بايلانىستى رەفەرات جازعانىم جانە بار. زادىندا، بارلىبەك تۋرالى جازىلعان زەرتتەۋ ەڭبەكتەرى مەن ەستەلىكتەر سانى – وتە از. وسى كۇنى جۇرتتىڭ ءبارى بۇل تۇلعا تۋرالى مالىمەتتى پروفەسسور، زاڭگەر-عالىم مارقۇم ساكەن وزبەكۇلىنىڭ ەڭبەكتەرىنەن ءبىلىپ ءجۇر. ساكەن وزبەكۇلى – بارلىبەكتەي تۇلعانىڭ باعىن اشىپ، حالقىمەن قايتا قاۋىشتىرعان عالىم!

2016 جىلى – بارلىبەك سىرتتانۇلىنىڭ تۋعانىنا 150 جىل تولعان-دى. الايدا، ونىڭ تويى ەلەنبەي، تاسادا قالىپ قالدى. تەك تۋعان ولكەسى اقسۋ اۋدانىندا جەرگىلىكتى حالىقتىڭ ۇيىمداستىرۋىمەن شاعىن توي ۇيىمداستىرىلعانى بولماسا، باسقا ەشتەڭە جۇزەگە اسىرىلمادى. ال، بيىل – «الاش!» ۇراندى حالىقتىڭ اتوي سالىپ، ۇران تاستاپ، ساۋىن ايتاتىن جىلى. الاش پارتياسى مەن الاش وردا ۇكىمەتىنىڭ قۇرىلعانىنا تۇپ-تۋرا ءجۇز جىل ۋاقىت ءوتىپتى. ءبىزدىڭ بارلىبەك – العاشقى قازاق وقىعاندارىنىڭ ءبىرى. سانكت-پەتەربورداعى يمپەراتورلىق ۋنيۆەرسيتەتتىڭ شىعىستانۋ فاكۋلتەتىن كۇمىس مەدالمەن تامامداعان نەكەن-ساياق قازاقتىڭ بىرەگەيى. الاشتىڭ ۇلكەن وقىمىستىسى 1911 جىلى ۇزەڭگىلەسى ءارى ءتول قۇرداسى ءاليحان بوكەيحاننىڭ تاپسىرماسىمەن «قازاق ەلىنىڭ ۋستاۆى» دەپ اتالاتىن قازاقتىڭ العاشقى كونستيتۋتسيالىق ەڭبەگىن جازىپ شىقتى. ءاليحان، احمەت، مىرجاقىپتارمەن قاتارلاسا ءجۇرىپ، الاش قوزعالىسىنىڭ تەوريالىق نەگىزىن سالدى. مۇراتتاس، مۇددەلەس باۋىرلارىمەن بىرگە: «جاساسىن، الاش، جاساسىن!» دەيتىن زامانعا بار ىنتا-جىگەرىمەن نىق قادام باسىپ ەدى، امال نەشىك، كەۋدەگە تۇسكەن قۇرت اۋرۋى دەندەپ، القىمنان الىپ، قان تۇكىرىپ، اقىرى 1914 جىلدىڭ 26 قاراشاسىندا عۇمىر-جاپىراعى ءۇزىلدى. 48 جاستاعى بارلىبەك ءفاني عۇمىردان باقيعا اتتانعاندا، «قوش، قاراعىم، باكە!» دەپ جۇرەگى قارس ايرىلىپ ءاليحان قالدى اڭىراپ، «قايران، باكە!» دەپ شاكىرتى مۇحامەدجان تىنىشبايۇلى قالىپ ەدى  بوزداپ. ء(ا.بوكەيحان، «بارلىبەكتى ۇمىتپاسقا»، «قازاق» گازەتى، 1914, № 90. 16 دەكابر; م.تىنىشبايۇلى، «بارلىبەك سىرتانوۆ»، «قازاق» گازەتى، «قازاق»،1915, №95,96). ۇلتى ءۇشىن «جۇرەك مايىن شام قىلعان» الاش قايراتكەرى بارلىق قازاقتىڭ جيىلىپ، «الاش تۋى استىندا...» بولعان زامانىنا جەتپەدى. ەگەر بەكزات بارلىبەكتىڭ عۇمىر-داۋرەنى ەرتە اياقتالماعاندا، زامانداسى اليحانمەن قاتار ءجۇرىپ، «الاش وردا» ۇلتتىق-تەرريتوريالىق مەملەكەتىن قۇرىسار ەدى; قازاقتىڭ كونستيتۋتسيالىق قۇقىعىن قورعايتىن تاعى دا باسقا زاڭ جوبالارىن جازار ەدى; كەلەشەك جاستارى ءۇشىن وقۋ قۇرالىن دايارلاپ، ءوزىنىڭ جولداستارىمەن بىرگە قازاق عىلىمىنىڭ ىرگەتاسىن قالار ەدى. ءيا، وسىلاي ىستەيتىن ەدى. سودان سوڭ ول دا... ستاليندىك رەپرەسسياعا ۇشىراپ، تۇرمەلى قۋعىن، سىرگەلى سۇرگىندى كورىپ، اتۋ جازاسىنا كەسىلەتىن ەدى...

سونىمەن، نە كەرەك، الاشتىڭ 100 جىلدىعى اياسىندا بارلىبەك سىرتتانۇلىنىڭ عىلىمي-شىعارماشىلىق عۇمىرناماسىنا شولۋ جاساپ، تۇلعانىڭ ونەگەلى ىستەرىن ۇرپاققا ناسيحاتتاۋدى قولعا الدىق. كۇننەن-كۇنگە ءار جەردەن تىرنەكتەپ ىزدەگەن رۋحاني قازىنانى جۇرەك تۇبىنەن جالعاننىڭ جارىعىنا شىعارۋعا مۇمكىندىگىمىز ارتتى. مۇمكىندىك ارتقاننان كەيىن، قولىمىزدى شىدەرلەمەدىك...  وسى جىلدىڭ 23 قاڭتارىندا بەلگىلى قوعام قايراتكەرى، عالىم، قازاقتىڭ قايراتكەر قىزى گۇلشا تاڭىربەرگەنقىزىمەن كەزدەسىپ، ءمان-جايدى بايانداپ، ول كىسىدەن بىرقاتار تاريحي قۇجاتتاردى العان ەدىك. قولعا تۇسكەن تاريحي قۇجاتتار – گۇلشا اپايدىڭ اكەسى، بەلگىلى قالامگەر، ولكەتانۋشى تاڭىربەرگەن قاليلاحانوۆ ەسىمدى اقساقالعا تيەسىلى. كەزىندە تاڭىربەرگەن اقساقال الاش قايراتكەرىنىڭ ۇرپاقتارىمەن جاقىن ارالاسىپ، باكەڭ جايلى عىلىمي-ىزدەنىس جۇمىسىن جۇرگىزىپتى. بۇنى – ءبىزدىڭ قولىمىزعا تۇسكەن قۇجاتتار ايعاقتايدى. تاڭىربەرگەن اتامىزدىڭ جەكە مۇراعاتىنداعى قۇجاتتىڭ ءبىرى – كاكە (ابدۋلقادىر) بارلىبەكۇلىنىڭ ءومىربايان ۇلگىسىندە جازىلعان كۇندەلىك-داپتەرى. بۇل كۇندەلىك – وسى ۋاقىتقا دەيىن ەش جەردە جاريالانباعان جانە عىلىمي اينالىمعا تۇسكەن ەمەس. كۇندەلىك وسى تۇرعىدان العاندا ماڭىزدى ءھام سالماقتى بولىپ وتىر.  بۇل كۇندەلىكتىڭ تاريحي ماڭىزى – بارلىبەكتەي ارىستىڭ تۋعان جەرى، وسكەن ورتاسى، اتا-اناسى، جان-جارى جانە ۇرپاقتارى تۋرالى جازىلعان دەرەكتەردىڭ شىنايىلىعىندا.  Abai.kz اقپاراتتىق پورتالىنىڭ وقىرماندارىنا وسىدان 50 جىل بۇرىن جازىلعان كۇندەلىكتى سول قالپىندا، ەش وزگەرىسسىز ۇسىنىپ وتىرمىن. قابىل الىڭىزدار!ەلدوس توقتارباي،

ادەبيەتتانۋشى

***

كاكەنىڭ كۇندەلگى

ءومىربايان

مەن، ءابدىل-قادىر (كاكە) بارلىبەكۇلى سىرتانوۆ 1898 جىلى 21 يۋندە الماتى قالاسى باريباەۆ كوشەسى №5 (وڭتۇستىك جاعى) يۋننىح-كومۋنار كوشەسى №11 ۇيدە، ورتاشا اۋقاتتى سەميادا تۋدىم.

شەشەمىز ساۋاتسىز – ەركەجان اتالىققىزى. توركىنى – قاپال-اراسان ماڭىنداعى تۇرعىننان، تورە-تولەڭگىت ەلى. شەشەمىزدىڭ اكەسى اتالىق ەڭبەكشى كەدەي ادام بولعان. اراسانداعى قازاق-ورىستاردىڭ سيىرىن باعاتىن. شەشەسى قىرمىزى شەبەر، ون ساۋسىعىنان بال تاماعان. شەشەمىز 1942 جىلى مارت ايىندا قازا تاپتى. (سول جانسۇگىروۆ پوسەلكاسىندا تۇراتىن راحيما كىسى جۇماباەۆا نەمەرە ءسىڭلىسى، قاسىموۆ بايعالي بىلەدى).

اكەم بارلىبەك سىرتانۇلى سىرتانوۆ اقسۋ اۋدانى قازىرگى شوقان ءۋاليحانوۆ اتىنداعى سوۆحوزدىڭ №2 سۇتتىگەن فەرماسى ورنالاسقان جەردە 1866 جىلى تۋعان. 1914 جىلى 1 / XI دە سۇتتىگەن-بولەك، بۇرعان دەگەن جەردە 48 جاسىندا قازا بولدى.

بارلىبەك، تۇرلىبەكتەردىڭ اكەسى سىرتان وقۋعا الماتىعا اتتاندىرادى. ەكەۋى گيمنازيادا وقيدى. گيمنازياعا تۇسۋىنە، وقۋىنا قاپال ۋەزىنىڭ ناچالنيگىنىڭ ءتىلماشى جانعازى دەگەن ادام سەبەپ بولادى. (جانعازى – اراساننىڭ سۋىقسايىن مەكەندەگەن كەدەي شارۋا سەمياسىنان ۋچيليششە بىتىرگەن ادام ەكەن. رۋى – باقى).

بارلىبەك سىرتانوۆ الماتى ( ول كەزدە ۆەرنىي گيمنازياسىن التىن مەدالمەن ءبىتىرىپ، لەنينگراد (سانكت-پەتەربۋرگ) قالاسىنداعى ۋنيۆەرسيتەتتىڭ اراپ ءتىلى فاكۋلتەتىنە ەمتيحانسىز ءتۇسىپ، ونى كۇمىس مەدالمەن بىتىرەدى. سودان تاشكەنتتەگى سرەدنە-ازياتسكي ۋپراۆلەنيادا قىزمەتتە بولىپ، 1894-1895 ج. الماتىدا- ۆەرنىيدە وبلوستنوي ۋپراۆلەنيادا چينوۆنيك-پەرەۆودچيك قىزمەتىندە بولىپ، 1908-1909 جىلدار قىزمەتىنەن بوسانىپ، 42-43 جاسىندا سۇتتىگەن-بۇرعان بويىنا كوشىپ بارادى. قىزمەتىنەن بوساۋ سەبەبى 1-ءشى ول كەزدە اۋىرۋ بولادى، 2-ءشى ساياسي كوزقاراسى سەنىمسىز دەپ تابادى. ۇيتكەنى 1905-1906 جىلداردا پاكاتيلوۆ دەگەن جاندارال الدىندا (ۆەرنىيدا) ءتىلماش بولا ءجۇرىپ، قوعامدىق جۇمىستارمەن شۇعىلدانادى:

1) 1905-6 ج.ج. پانفيلوۆ پەن يۋننىح-كومۋناروۆ كوشەسىنىڭ تۇيىسكەن جەرىندەگى ۇيدە (قازىردە دەتبولنيتسا) ءبىرىنشى مۇسىلماندار كىتاپحاناسىنىڭ اشىلۋىنا كومەك بەرەدى;

2) جەتىسۋ گۋبەرنياسىنا قاراستى قازاق، قىرعىزدارعا قىستاق سالىڭدار، جەردى مەكەندەپ، تۇرعىن ەل بولىڭدار، مەكتەپ اشىڭدار، مەكتەپ سالىڭدار دەگەن ىسكە كىرىسەدى. (بۇل تۋرالى قولدا دەرەكتەر، دالەلدەر بار).

3) پاتشا ۇكمەتىنىڭ ساياساتىن سىن كوزبەن قاراعان قازاق، تاتار وقىعاندارىمەن سىبايلاس بولادى;

قازاقتىڭ اتاقتى وقىمىستىسى – قاراتاەۆ باقىتجان سياقتى ادامدارمەن بىرگە وقىپ، بىرگە بولعان.

مىسالى، بالىقتى تاۋىنىڭ ۇستىندەگى اقتاستى قوڭىرسكي دەگەن ەكى قىستاقتى سالدىرۋدا زور قاتناسى بار. جانە قاراعاشتاعى مامان-تۇرىسپەك مەكتەبتىڭ سالىنۋىنادا كومەگى بولعان.

4) سول كەزدەگى تاسبەگەت-اباكۋم كازاك ورىستارى اقسۋدىڭ سۋىن قاراپايىم قازاقتارعا ۋاعىندا بەرمەي زورلىق جاساعان ۋاقيعالارىنا بارلىبەك ارالاسادى. ايتا بەرسە، بارلىبەكتىڭ ادىلدىك-مومىندىق تۋرالى كوپ ەڭبەگى بار ەكەن.

بارلىبەكتە 2000 مىڭداي ساياسي جانە باسقا ءتۇرلى كىتاپتاردا بولعان (مەن دە سپيسوگى بار). ول كىتاپتاردى يلياس جانسۇگىروۆ مۇعالىم بولىپ جۇرگەندە پايدالانىپ، كەرەكتىسىن الىپ-ساقتاپتى بەرىپ جۇرگەن.

بارلىبەك سىرتانوۆ سول زامانداعى پوليتسانىڭ باقىلاۋىندا بولۋ كەرەك. مىسالى، 1912-1913 جىلدار قاپال ۋەزدنىي ناچ-كتىڭ پوموششنيگى، سول كەزدەگى اراسان ەلىنىڭ ۆولوستنوي ۋپراۆيتەلىمەن 4 رەت كەلىپ ءۇيدى ءتىنتىپ كىتاپتاردى ويىستىرعان، سوندا مەن اۋىلدامىن.

5) قازاق، قىرعىز بالالارىنىڭ تالاپتىلارىن وقۋعا تۇسىرۋگە كومەك بەرەدى. مىسالى توقاش بوكين، وراز جاندوسوۆ، جۇبانىش بورىباەۆ ت.ب. بۇدان باسقادا كوپتەگەن كوپ الەۋمەتتىك جۇمىستارى تولىپ جاتىر. ونىڭ ءبارىن ايتىپ جەتكىزۋگە نەگىزگى دەرەكتەردى ۋاقىت كوپ كەرەك.

مەن، سىرتانوۆ (كاكە) ءابدىل-قادىر (قادىر) بارلىبەكۇلى التى جارىم جاسىمنان وقىپ، حات تاني باستادىم. الماتىدا مۇسىلمانشا يلحام باي مەكتەبىندە ەكى جىل، وزات گيمنازيادا التى جىل وقىپ، 1912 جىلى ءتۇرلى سەبەپتەردەن گيمنازيا بىتىرە المادىم. 1918 جىلى يۋن، يۋل ايلارىندا اقسۋ اۋدانىنا سوۆەت ۇكىمەتى ۋاقىتشا ورنادى. ول كەزدە مەن اۋىلدا مال باعاتىنمىن. مەن، 1920 جىلدان باستاپ 1958 جىلعا دەيىن قىزمەت اتقارىپ، قازىر پەنسيونەرمىن. 1920 جىلى اقسۋ بولىسىنا بەيسەمباەۆ ەسمۋرات بولىس رەۆكوم باستىعى بولىپ كەلگەندە، مەن ءۇشىنشى اۋىلدا اۋىلرەۆكومىنىڭ مۇشەسى جانە قاتشىسى بولىپ قىزمەت اتقاردىم. 1921 جىلى فەۆرال ايىندا مەنى اقسۋداعى ۆولرەۆكوم قاراماعىنا الدى. وندا جوعارىدان كەلگەن قاعازداردى كوشىرىپ، اۋىل-اۋىلدارعا تاراتىپ، ۇگىت-ناسيعاتشى تاراتۋشى بولدىم.

سول جىلدارى وبكومنان كەلگەن .... ورازالين جولداستىڭ ۇسىنىسىمەن اقسۋدا قازاق-تاتار كوركەم ونەرپازدار ۇيىرمەسىسىن ۇيىمداستىرىپ، ونىڭ رەپەرتۋارىن جەتىلدىرىپ جانە سپەكتاكىلدى قويۋدى ۇيىمداستىردىم.  سول جىلى ياعني 1921 ج. اپرەل ايىندا مەنى ارمياعا الدى. لەپسى جاقتاعى كوتەرىلگەن اقتاردىڭ باندىلارىمەن كۇرەسۋ جۇمىسىنا اقسۋ رەۆكوم ۆكپ (ب) پارتياسىمەن ۆوپرەۆكوم جىبەردى. لەپسى ۋەزى، ءۇش-ارال، الاكول اۋداندارىندا ەكى اي ءجۇرىپ، تاپسىرىلعان قىزمەتتى اتقارىپ قايتا ورالدىم. 1922 ج. يانۆار ايىنان 1922 ج. دەكابىرىنە دەيىن قاپالدا ۆوليسپولكوم پرەدسەداتەلى قىزمەتىن اتقاردىم.

1923 جىلى يانۆار ايىنان يۋل ايىنا دەيىن اقسۋداعى ۆوليسپولكوم پرەدسەداتەلى بولىپ قىزمەت ىستەدىم.1923 جىلى سەنتيابر ايىنا دەيىن اقسۋ ۆولكوم پارتياسى مەن ۆوليسپولكومنىڭ تاپسىرۋىمەن 3-ءشى اۋىل سۇتتىگەندە ءتورت كلاستىق مەكتەپ سالۋ جۇمىسىمەن شۇعىلداندىم. اۋل اكتيۆتەرىنىڭ كومەگىمەن مەكتەپ سالىنىپ، بالالار وقي باستادى. ج. جەتەكباەۆ قاسىمباي سول مەكتەپتە مۇعالىم بولدى.

1923 جىلى سەنتيابر ايىنان باستاپ قاپالدا حالىق سوت قىزمەتىن اتقاردىم. 1924 جىلى تالدى-قورعاندا ۋپولنوچەننىي گۋبەرنسكوگو سۋدا بولىپ ىستەدىم. 1925 جىلى الماتىداعى گۋبەرنالىق سوتتىڭ القا مۇشەسى قىزمەتىندە بولدىم. 1926 جىل – 1928 جىل اپرەل ايىنا دەيىن جاركەنت، قازىرگى پانفيلوۆ قالاسىندا گۋبەرنالىق سوتتىڭ ۋپولنوموچەننىي بولىپ جانە جاركەنت ۋەزىندە سۋديا قىزمەتىن اتقاردىم.

1928 ج. اپرەل ايىنان دەكابر ايىنا دەيىن الماتىدا گۋبەرنالىق سوتتىڭ زامپرەدى قىزمەتىندە بولدىم. (پرەد گۋبەردا سىرگابەكوۆ نىعمەت بولىپ ەدى). التى جىل سوت جۇمىسىنداعى دوكۋمەنتتەر مەندە قىزمەتتى جاقسى اتقارعانىم ءۇشىن قۇرمەتتى قاعازدار مەندە. 1928 جىلى دەكابردە سوت جۇمىسىنان بوساپ، ىلە وزەنى ستانسيسى ناچالنيگىنىڭ 2-ءشى ورىنباسارى بولىپ ىستەپ، 1930 ج. اۆگۋست ايىندا ول قىزمەتتەن بوسادىم.

وسى ۋاقىتتان باستاپ اقسۋدىڭ 3-ءشى اۋىلى «سۇتتىگەن» تاعى باسقا 3-ءشى اۋىل قاراماعىنداعى ەلدى ارالاپ، كولحوز ۇيىمداستىرۋدا بەلسەنە جۇمىس اتقاردىم. 1930 ج. وكتيابر ايىنا دەيىن (سپراۆكا بار). 1930 ج وكتيابر ايىندا الماتى كەلىپ، قالالىق اۆتوترانسپورت ۇيىمىنىڭ قىزمەتىنە كىرىپ، قازاقستاندا ءبىرىنشى اشىلعان 6 ايلىق كۋرسىنى ءبىتىرىپ، سول اۆتوترانسپورت باسقارماسىندا شوفەر-ۆۋلكانيزاتور بولىپ سول جىلى اۆتوتەحنيكۋمدا وقىدىم.

1933 جىلى يۋل ايىنان اۆتوشكولدا اۆتوموبيلدەن جانە قالاداعى كوشە قوزعالىسىنان ساباق ۇزدىكسىز قىزمەت اتقارىپ، 1958 جىلى 10 يۋلدەن پەنسيونەرمىن.

بىرنەشە ونداعان جىلدار بويى ۇزدىكسىز جۇمىس ىستەگەنىمدى قۇرمەتتەپ، اۆتوشكولا كوللەكتيۆى دەمالىسقا شىعارىپ سالدى. قازىر اۆتوكوللەكتيۆ بەرگەن ۇيدە تۇرامىن. الماتى قالاسى شەۆچەنكو كوشەسى №174 د، كۆ 3, تەەفون 4-42-37.

1920 جىلدارى پارتيالىق قىزمەتكە كىرىپ، 1924 جىلى پارتيا مۇشەسىنە كىردىم. 1930 جىلى ءتۇرلى سەبەپتەردەن پارتيا قاتارىنان شىعىپ قالدىم. ارينە، وتكەن ۋاقىت پەن قازىرگى ۋاقىت بىردەي ەمەس قوي. مەن ۇزاق ۋاقىت تەرگەۋدە جانە باقىلاۋدا ءجۇرىپپىن. باقىلاۋ 1956 جىلى ءسىز باقىلاۋدان بوسسىز دەگەندە عانا بىراق ءبىلدىم. مىنە، وسىنداي اقتى قارا دەپ، شاش ال دەسە باسا العان زامان ەدى عوي ول ۋاقىت. ورتا دەرەجەلى ءبىلىم بولدى.

ومىرلىك جولداسىم – ورازبەكقىزى سىرتانوۆا گۇلىش قازىر 66 جاستا. قازىر ءۇش ۇل، ءۇش قىزىمىز بار. ءبىر ۇلىمىز بايان سىرتانوۆ 1941 جىلعى وتان سوعىسىنىڭ، كوپ .... ىشىندە كەتتى.

ۇلكەن قىزىم قاراعاندىداعى گلازنوي ينستيتۋت ۆراچ جانە مەدينستيتۋتتا مۇعالىم، پارتيا مۇشەسى;

ورتانشى قىزىم كەگەن اۋدانىندا ۆراچ- ۆلكسم;

كىشى قىزىم – ۆلكسم، الماتى مەدينستيتۋتىنىڭ سوڭعى كۋرسىندا وقىپ ءجۇر.

ۇلكەن ۇلىم سوۆەت مينستىردە;

ورتانشىم اۆتوشكولدا – مۇعالىم – ينسترۋكتور;

كىشى ۇلىم، زام.مينستەرستۆا اۆتوترانس سوڭعى قىزىمنان باسقالاردىڭ ءبارى دە سەميا قۇرعان. نەمەرەلەرىم ءوسىپ جاتىر. الدى ينستيتۋتتىڭ 5 كۋرسسىندە. كىشىلەرى دەت.ساد، بەسىكتە.

ىستەگەن قىزىمەتتەرىمە بايلانىستى العان سىيلىقتارىم تومەندەگىشە:

1. ءبىرىنشى بەس جىلدىقتىڭ ورىندالۋىنا بايلانىستى «1932 گودا زاۆەرشايۋششەگو پياتيلەتكۋ وردەن-زناك 1917 سسسر. 1932.
2. مەدال زا دوبلەستنىي ترۋد ۆەليكوي وتەچەست.ۆوينە 1941-1945 گ.گ.
3. زناك وتليچنيك سوتسياليستيچەسكوگو سورەۆنوۆانيا مينيستەرتۆو اۆتوترانسپورتا كازسسر.
4. راديوپريەمنيك «اكتاۆا» زا حوروشۋيۋ ي بەزۋپرەچنيۋيۋ رابوتۋ.
5. تەلەۆيزور «ستارت 2» س ۋحودوم نا پەنسيۋ.
6. دەلوۆوي وتزىۆ ي بلوگادارنوست وت پريزيديۋما دجارگەنتسكوگو ۋەزنوگو يسپولنيتەلنوگو كوميتەتا نىنە پانفيلوۆسكي ر-ن، دجەتىسۋيسكوي وبل. وت 11 – گو مارتا 1928 گ زا №38/0/10.
7. جەتى دانا گراموتالار، ونىڭ بەسەۋى قۇرمەتتى – ناگرادتالدىم.

ونى اۆتوترانسپورت كوللەكتيۆى جانە پروفسويۋزدىق رەسپۋبليكالىق كوميتەتەتى ناگرادتاعان بولاتىن.

كوپتەگەن العىستار مەن زاتتاي سىيلىقتار الدىم.

مىنە مەنىڭ تىرشىلىگىمدەگى قىسقاشا ءومىر تاريحىم مەن ىستەگەن جۇمىستارىم.

19  IV 1967 جىل، كاكە سىرتانوۆ

كاكە اتامىز جازعان كۇندەلىكتىڭ  بىرىنشى بەتى

بارلىبەك سىرتانۇلى

كاكە (ابدۋلقادىر) بارلىبەكۇلى

كاكەنىڭ وتباسى. فوتوسۋرەت – قاراعاندى قالاسىندا تۇراتىن كاكەنىڭ قىزى 96 جاستاعى مۇگىلسىم اجەنىڭ جەكە مۇراعاتىنان الىندى.

Abai.kz