جاپون حالقىنىڭ بۇگىنگى جەتىستىكتەرىنىڭ باستى سەبەپكەرى ەلدىڭ ليبەرالدى-دەموكراتيالىق پارتياسى جارتى عاسىردان استام ۋاقىتتان بەرى بيلىك تىزگىنىن ەشكىمگە بەرمەي، نىق سەنىممەن ۇستاپ كەلەدى. وسى ۋاقىت ارالىعىندا جاپونيانى الەمنىڭ الپاۋىت مەملەكەتىنە اينالدىردى.

سوعان وراي «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەد جاپونياعا ارنايى بارىپ، پارتياارالىق ىنتىماقتاستىقتى نىعايتۋعا نيەتتى ەكەنىن ءبىلدىردى.

ساپار بارىسىندا «نۇر وتان» پارتياسى توراعاسىنىڭ ءبىرىنشى ورىنباسارى جاپونيانىڭ پرەمەر-ءمينيسترى سيندزو ابەمەن، ەلدەگى باستى ساياسي كۇش سانالاتىن بيلەۋشى ليبەرالدى-دەموكراتيالىق پارتيانىڭ باس حاتشىسى توسيحيرو نيكايمەن، جاپونيا پارلامەنتىندەگى قازاقستانمەن دوستىق ليگاسىنىڭ توراعاسى تاكەو كاۆامۋرامەن كەزدەستى.

سونىمەن قاتار مۇحتار قۇل-مۇحاممەد اقپاراتتىق-كوممۋنيكاتسيالىق تەحنولوگيا سالاسىنداعى جاپونياداعى الدىڭعى قاتارلى كومپانيالاردىڭ ءبىرى «NEC» كورپوراتسياسىنىڭ جۇمىسىمەن تانىسىپ، قازاقستاننىڭ ءۇشىنشى جاڭعىرۋىن جۇزەگە اسىرۋدا يننوۆاتسيانىڭ بەرەرى مول ەكەنىن ايتتى.

ەكى ەلدىڭ ارىپتەستىك بايلانىسىنىڭ نىعايۋىنا قازاقستان پرەزيدەنتى مەن جاپونيا پرەمەر-ءمينيسترى س.ابەنىڭ ىقپالى زور ەكەنىنە توقتالعان «نۇر وتان» پارتياسى توراعاسىنىڭ ءبىرىنشى ورىنباسارى: «تاۋەلسىزدىك جىلدارى قازاقستان مەن جاپونيا اراسىندا ءوزارا سىيلاستىق پەن ىنتىماقتاستىققا نەگىزدەلگەن دوستىق قارىم-قاتىناس ورنادى. وسى جىلدار ىشىندە ەلباسىمىز ءتورت رەت رەسمي ساپارمەن جاپونياعا كەلىپ، بۇل ەلدىڭ ساياسي جانە ىسكەر قاۋىمداستىعى اراسىندا اسا زور بەدەل مەن قۇرمەتكە يە بولدى. ەكى ەل اراسىنداعى «ستراتەگيالىق ىنتىماقتاستىقتى نىعايتۋ جانە كەڭەيتۋ» تۋرالى تاريحي شارتقا قول قويىلعان. ءبىزدىڭ ساپارىمىزدىڭ ماقساتى دا «نۇر وتان» پارتياسى مەن وسى ەلدىڭ پرەمەر-ءمينيسترى توراعالىق ەتەتىن جاپونيانىڭ ليبەرالدى-دەموكراتيالىق پارتياسى اراسىنداعى ىنتىماقتاستىقتى ودان ءارى كۇشەيتىپ، اياسىن كەڭەيتۋ»، – دەدى.

جاپونيانىڭ از عانا ۋاقىت ىشىندە ەل ەكونوميكاسى مەن ساياسي جۇيەسىن ۇلتتىق ەرەكشەلىكتەردى ساقتاي وتىرىپ، تابىستى رەفورمالاۋىنىڭ سىرىن بۇدان ءبىر عاسىر بۇرىن الاش قايراتكەرلەرى تامسانا جازعان. ۇلتىمىزدىڭ ۇلى جازۋشىسى مۇحتار اۋەزوۆ «ياپونيا» اتتى ماقالا جازىپ، «اباي» جۋرنالىنا جاريالاعان.

قانداي ىستە بولماسىن ۇلتتىق قۇندىلىقتارعا ارقا سۇيەيتىن جاپوندىقتاردان جاڭا عاسىردا دا ۇيرەنەتىن، ۇلگى الاتىن جەتىستىكتەر از ەمەس. ەندەشە نۇروتاندىقتاردىڭ كۇنشىعىسقا قاراپ بوي تۇزەۋى ابدەن قۇپتارلىق باستاما.

Abai.kz