وتكەن اپتادا «ۆوستوك - اكۆاكۋلتۋرا» بەكىرە زاۋىتى جشس-ءى مىڭنان اسا ءسىبىر بەكىرەسىنىڭ مايشاباعىن ەرتىس وزەنىنە جىبەردى. ءبىر جىلدىق ءسىبىر بەكىرەلەرىنىڭ سالماعى 650 گرامدى قۇرايدى. ەرتىستىڭ پاۆلودار ءوڭىرى تاريحىندا العاش رەت ۇيىمداستىرىلىپ وتىرعان اتالمىش اكتسياعا وبلىستىق اۋىلشارۋاشىلىعى باسقارماسىنىڭ باستىعى باۋىرجان قاسەنوۆ، «ۆوستوك - اكۆاكۋلتۋرا» جشس ديرەكتورى قانات سىزدىقوۆ جانە قازاقستان رەسپۋبليكاسى اۋىل شارۋاشىلىعى مينيسترلىگى «زايسان-ەرتىس» وبلىسارالىق بالىق ونەركاسىبى ينسپەكتسياسىنىڭ باستىعى ماۋلەن قاناتباەۆ قاتىستى.

وتكەن اپتادا «ۆوستوك - اكۆاكۋلتۋرا» بەكىرە زاۋىتى جشس-ءى مىڭنان اسا ءسىبىر بەكىرەسىنىڭ مايشاباعىن ەرتىس وزەنىنە جىبەردى. ءبىر جىلدىق ءسىبىر بەكىرەلەرىنىڭ سالماعى 650 گرامدى قۇرايدى. ەرتىستىڭ پاۆلودار ءوڭىرى تاريحىندا العاش رەت ۇيىمداستىرىلىپ وتىرعان اتالمىش اكتسياعا وبلىستىق اۋىلشارۋاشىلىعى باسقارماسىنىڭ باستىعى باۋىرجان قاسەنوۆ، «ۆوستوك - اكۆاكۋلتۋرا» جشس ديرەكتورى قانات سىزدىقوۆ جانە قازاقستان رەسپۋبليكاسى اۋىل شارۋاشىلىعى مينيسترلىگى «زايسان-ەرتىس» وبلىسارالىق بالىق ونەركاسىبى ينسپەكتسياسىنىڭ باستىعى ماۋلەن قاناتباەۆ قاتىستى.

- بەكىرە زاۋىتى 2008 جىلدان بەرى بالىق ونەركاسىبىن العا قويىپ، ونىڭ كوپتەگەن تۇرلەرىن شەت ەلدەردەن اكەلىپ ۇرىقتاندىرادى. باستى ماقساتىمىز - جەرگىلىكتى وزەن-كولدەردەگى بالىق تۇرلەرىن كوبەيتۋ. الداعى ۋاقىتتا سۋ جاندىگىنىڭ باسقا دا تۇرلەرىن ىرىلەندىرۋ جۇمىسىن باستى نازارعا قويىپ وتىرمىز. ەرتىس وزەنىنە جىبەرگەن ءسىبىر بەكىرەسىنىڭ تۇقىمىن ماسكەۋ قالاسىنىڭ جانىنداعى كاناكوۆسكي زاۋىتىنان ارنايى الدىرىپ وسىردىك. ەندى ناتيجەسىن الداعى ۋاقىتتاردا كورەتىن بولامىز. جالپى مىڭنان اسا ءسىبىر بەكىرەسى مايشاباعىن ساتىپ الۋعا 3 ميلليون تەڭگە قاراجات كەتتى،- دەيدى «ۆوستوك - اكۆاكۋلتۋرا» جشس ديرەكتورى قانات تۇرلىبەكۇلى. ەرتىستىڭ پاۆلودار ءوڭىرىنىڭ تاريحىنا ۇڭىلەر بولساق، ءسىبىر بەكىرەسىن اۋلاۋعا وسىدان وتىز جىل بۇرىن تىيىم سالىنعان ەكەن. ەگەردە ولاردىڭ وسۋىنە ەشكىم كەدەرگى جاساماسا، ءسىبىر بەكىرەلەرىنىڭ ۇزىندىعى ەكى مەترگە دەيىن جەتىپ، سالماعى 200 كيلوگرامدى قۇراۋى مۇمكىن. اسىرەسە، جينالعانداردىڭ باسىم بولىگىن «وزەنگە جىبەرىلگەن مايشاباقتار سۋ تولقىنىمەن بىرگە وزگە ايماقتارعا ءجۇزىپ كەتپەي مە؟» دەگەن سۇراق مازالادى. بۇل تاقىرىپتا كوپتەگەن زەرتتەۋ جۇمىستارىن جاساپ جۇرگەن س.تورايعىروۆ اتىنداعى پاۆلودار مەملەكەتتىك ۋنيۆەرسيتەتى مونيتورينگ ورتالىعىنىڭ عىلىمي قىزمەتكەرى الەكساندر بوسكيننىڭ ايتۋىنا قاراعاندا، ءسىبىر بەكىرەلەرى تەك قانا ءبىر ايماقتا ءومىر سۇرەدى. «ءبىز ءسىبىر بەكىرەسىنىڭ ءومىر ءسۇرۋى تۋرالى بيولوگيالىق زەرتتەۋ جۇمىسىن جۇرگىزدىك. جالپى، جەرگىلىكتى مەكەندەرگە ۇيرەنىپ العان ءسىبىر بەكىرەلەرى ەشقايدا كەتپەيدى. تەك قانا سول ايماقتا تىرشىلىك ەتەدى. ءسىبىر بەكىرەلەرىن وزەنگە كۇزگى ۋاقىتتا جىبەرۋ كەرەك. سەبەبى، ءدال وسى ۋاقىتتاعى سۋ قىسىمى بالىقتارعا جايلى بولادى»،- دەيدى ا.بوسكين.

مۇنداي اكتسيانى ۇيىمداستىرۋعا رەسپۋبليكالىق بيۋدجەتتەن ەشقانداي قاراجات بولىنبەگەن. بالىق ونەركاسىبىن العا قويعان «ۆوستوك-اكۆاكۋلتۋرا» جشس ءسىبىر بەكىرەلەرىن «ەرتىس» وزەنىندە كوبەيتۋگە ارنالاعان اكتسيانى ءوز قارجىلارىنا ۇيىمداستىرعان. اكتسياعا ارنايى كەلىپ قاتىسقان قازاقستان رەسپۋبليكاسى اۋىل شارۋاشىلىعى مينيسترلىگى «زايسان-ەرتىس» وبلىسارالىق بالىق ونەركاسىبى ينسپەكتسياسىنىڭ باستىعى ماۋلەن قاناتباەۆ: «مۇنداي شارالار الداعى ۋاقىتتا ەلىمىزدىڭ بارلىق ايماقتارىندا وتكىزىلىپ تۇرسا، بالىق ونەركاسىبى العا باسىپ، جەتىلە تۇسەدى. ەندىگى كەزەكتە وسىناۋ كاسىپتى جاڭداندىرۋشىلارعا قولىمىزدان كەلگەن كومەكتى ايامايمىز»،- دەپ اعىنان جارىلدى.

تۋعان جەردىڭ تىلسىم تابيعاتى ءۇشىن وزگەگە ۇلگى بولارلىقتاي ءىس تىڭدىرعان زاۋىت اكتسيانى ءداستۇرلى تۇردە ۇيىمداستىرىپ تۇرۋعا ءسوز بەردى. «ءسىبىر بەكىرەلەرى ەرتىس وزەنىنىڭ قىتاي ەلى اۋماعىنداعى بولىگىندە كوپتەپ كەزدەسەدى ەكەن. ال قازاقستاندا تەك قانا ورتا جانە جوعارعى ەرتىستە ءومىر سۇرەدى. بۇگىنگى تاڭدا ەرتىس وزەنىندە بالىقتىڭ بۇل ءتۇرى جويىلىپ كەتۋدىڭ الدىندا تۇر. قاۋىپتىڭ الدىن الۋ ءۇشىن وسىنداي يگى شارالاردى ءاردايىم ۇيىمداستىرىپ وتىرۋ كەرەك» ەكەندىگىن اتاپ ءوتتى وبلىستىق اۋىلشارۋاشىلىعى باسقارماسىنىڭ باستىعى باۋىرجان قاسەنوۆ.

فارحات امىرەنوۆ.