جاقىندا "Abai.kz" اقپاراتتىق پورتالىنا جامبىلدىق ءبورىباي تۇرسىن ەسىمدى جىگىت حابارلاسىپ, جاعدايىن ايتقان ەدى. "Abai.kz" ارقىلى قۇزىرىلى ورگاندارعا ارزۋ-ارمانىن جەتكىزگەن ءبورىبايدىڭ كوڭىلىن كۇپتى ەتكەن ماسەلە شەشىمىن تاۋىپ قالاتىن سياقتى.

ءبورىبايدىڭ بىزگە ايتقان جايى سوندا مىناۋ بولاتىن: ءبورىبايدىڭ وتاۋ قۇرماققا سەرتتەسكەن قىزىن قۇزىرلى ورگاندار اكىمشىلىك قۇقىقتى بۇزۋشىلىق كودەكسىنىڭ 517 - بابى بويىنشا ءتارتىپ بۇزدى دەپ، ەلدەن دەپورتتاتسيالاپ جىبەرىپتى. وقيعا 2016 جىلى بولعان. ءسويتىپ، بەس جىل قازاقستانعا كىرۋىنە شەكتەۋ العان جازيرا ەسىمدى قىز قازىر قىتايدا تۇرىپ جاتقان كورىنەدى. ۋاعدالاسقان نەكە قازاقستان ۇكىمەتى كەسكەن بەس جىلدىق ۇكىمدى كۇتىپ، ول تۇر.

وسىنى ايتىپ، اراشا سۇراعان ءبورىباي تۇرسىن قر ىشكى ىستەر ءمينيسترى قالمۇحامبەت قاسىموۆقا ءبىز ارقىلى ۇندەۋ جولاپ، ءوزىنىڭ تويىنا شاقىرعان بولاتىن.

"Abai.kz" اقپاراتتىق پورتالى كوتەرگەن بۇل ماسەلەنى وزگە دە بۇقارالىق اقپارات قۇرالدارى ءىلىپ اكەتىپ، بىرىنەن كەيىن ءبىرى جۇرتقا جاريا ەتىپ جاتتى.

بۇگىن ءبورىباي تۇرسىن رەداكتسيامىزعا حابارلاسىپ، ماسەلەسىنىڭ ءتۇيىنى شەشىلۋگە جاقىن ەكەنىن ايتىپ ءبارىمىزدى ءبىر قۋانتىپ تاستادى.

"سىزدەرگە كوپ راقمەت! سايتتارىڭىزدا ماقالا جاريا بولعاننان كەيىن استاناداعى "نۇر وتان" پارتياسىنان، رەسپۋبليكالىق كوشى-قون پوليتسياسىنان، سوسىن جامبىل وبلىستىق كوشى-قون پوليتسياسىنان حابارلاسىپ، مەنىڭ ماسەلەمدى شەشىپ بەرەتىندىكتەرىن ايتتى. بۇگىن وبلىستىق پروكۋراتۋراعا كەلدىم. ءوتىنىش جازامىن", - دەيدى ءبورىباي تۇرسىن.

قۇزىرلى ورگانداردىڭ قۇلاعىنا جەتكەن ءبورىبايدىڭ بازىناسى قوعامدىق ورتادا قىزۋ تالقىعا ءتۇستى. اراعا اپتا سالىپ، ماسەلە نازارعا ىلىككەن ەكەن. ايتكەنمەن، ءبىزدىڭ سۇراپ بىلۋىمىزشە، تەلەفون ارقىلى حابارلاسقان ورگان وكىلدەرى بورىبايعا اۋىزشا ۋادە بەرىپ قانا وتىرعان كورىنەدى. 

قوس اسىقتىڭ، شاڭىراق كوتەرىپ، وتاۋ قۇرساق دەگەن ەكى جاستىڭ جايى ءبىزدىڭ نازاردا. باس قۇراۋعا سەرت ەتكەن ەكى جاستى ەكى ايىرىپ جىبەرگەن قر زاڭىنىڭ قۇزىرلى ورگاندار تاراپىنان شەشىمىن تابۋىنا قاتىستى كەز كەلگەن اقپاردى "Abai.kz" اقپاراتتىق پورتالىنان وقي الاسىزدار. ماسەلەنىڭ ءتۇيىنى وڭىنان شەشىلەتىن بولسا، ءبورىباي مىرزا مينيستر ىشكى ىستەر ءمينيسترى قالمۇحامبەت قاسىموۆتى ۇيلەنۋ تويىنا قالدىرماي شاقىراتىن شىعار دەپ ويلايمىز.

Abai.kz