وڭتۇستىك-قوراسان (يران) اۋىل شارۋاشىلىعى ۇيىمى قازاقستاننان 10 مىڭ گەكتار اۋىلشارۋاشىلىق جەرلەرىن جالعا الۋدى جوسپارلاپ وتىرعانىن مالىمدەدى، - دەپ حابارلايدى "اگروبيزنەس" پورتالى.

يراننىڭ سولتۇستىك-باتىسىندا قۇرعاقشىلىق، سۋ تاپشى. سوندىقتان دا، ولار اۋىلشارۋاشىلىعى داقىلدارىن ءوندىرۋ ءۇشىن قازاقستاننان اگرو-اۋتسورسينگكە جەر الۋدى جوسپارلاعان. اگرو-اۋتسورسينگ دەگەنىمىز باسقا ەلدە اۋىلشارۋاشىلىق ونىمدەردى ءوسىرۋ ءۇشىن ساتىپ الۋ, ليزينگ نەمەسە جالعا الۋدى مەڭزەيدى. كۇز كەلىپ، ءونىم جينالعان سوڭ ءونىم يرانعا "يمپورتتالادى".

يران مەن قازاقستان "شەكارا سىرتىنداعى فەرمەرلىك" دەگەن باعدارلاما اياسىندا جۇزەگە اسىرعان بۇل كەلىسىمگە وتكەن جىلدىڭ ماۋسىم ايىندا قول قويىلىپتى.

بىلتىرعى كوكتەم مەن جازدىڭ باسىندا، ياعني مامىر ايلارىندا بۇكىل قازاق "شەتەلدىكتەرگە جەر بەرمەيمىز" دەپ الاڭعا شىقتى. ماۋسىم ايىنان باستاپ كۇزگە دەيىن جەر كوميسسياسىنىڭ جيىندارى ءوتىپ، قازاق تاباندىلىقپەن كۇرەسىپ جاتقان سياقتى ەدى. ەل دۇربەلەڭگە ءتۇسىپ جاتقاندا بيلىك يرانعا 10 مىڭ گەكتار جەر بەرۋگە كەلىسىم جاساپ تاستاپتى.

بۇل نە؟ قازاقتى قورلاۋ ما؟ اتىراۋ مەن التايدىڭ اراسى تولقىپ تۇرعاندا قورىقپاي مۇنداي كەلىسىم جاساۋ - حالىقتى كوزگە ىلمەۋ ەمەس پە؟

ءشارىپحان قايسار

Abai.kz