وتىز كۇن ورازا ۇستاپ، ەندى ايتتايىن دەپ وتىرعانىمىزدا، سۇلىكتەي قارا «دجيپتەر» تۋرا ءبىزدىڭ مىج-تىج شاپكى سياقتى جاپىرەيگەن ءۇيىمىزدىڭ الدىنا توقتاي قالىستى. اۋزىمىزعا ايۋ كىرىپ كەتەيىن دەپ تۇرعانىمىزدا، ماسساعان، ءوزىمىزدىڭ پرەزيدەنت كەلە جاتىر! قاسىندا وزبەكستان، تۇرىكمەنستان، ازەربايجان، گرۋزيا، ءتىپتى كورشى رەسەي پرەزيدەنتى...

– تۇگىجوق سورلىبايوۆتىڭ ءۇيى وسى ما؟ – دەپ سۇرادى ءوزىمىزدىڭ پرەزيدەنت.

– ي-يا... – دەدىم مەن مىڭگىرلەپ.

– ءبىز ايتتاپ كەلىپ تۇرمىز!

– ۇيگە كىرىڭىزدەر، جوعارىلاتىڭىزدار! – دەپ ايەلىم قالبالاقتاي جۇگىرىپ، ۇيگە كىرىپ كەتتى. ءسۇرىنىپ، قابىنىپ ءجۇرىپ، تورگە جىرتىق-جاماۋ كورپە جايدى. داستارحان جايىپ، قۇرت شاشتى، باۋىرساقتان ءۇيدى. تىسىڭە جابىسىپ قالاتىن ارزان كامپيتتەردەن قويدى. نە كەرەك، تابان استىندا تىرناعىمىزعا دەيىن دىرىلدەپ، ابىگەرگە تۇستىك. ەندى قايتەيىك، ۇيىمىزگە شاقىرساڭ دا، شاتىناساڭ دا كەلتىرە المايتىن پرەزيدەنتتەر كەلىپ وتىر عوي! كورشىلەرىمىز پرەزيدەنتتەردى كورگىسى كەلىپ، «ايتتاي» قالعىسى كەلىپ ەدى، وققاعارلار ءبىر ادىم جولاتپادى.

– كەشىرىڭىز، قاراپايىم حالىقتىڭ ۇيلەرىنە ايتتاپ كەلگىمىز كەلدى. جاعدايلارىڭىزدى بىلگىمىز كەلدى... – دەدى ءوزىمىزدىڭ پرەزيدەنت.

– جاعداي وسى. كۇنىمىز قاراڭ، پەنسياعا كەلگەندە ۇكىمەت ساراڭ... – دەپ كەلە جاتىر ەدىم، ايەلىم سانىمنان وڭدىرماي شىمشىپ الدى... سوسىن مەن ىرجالاقتاپ:

– دەي سالعىم كەلمەيدى... – دەدىم.

– كاك دەلا، تۋگيجوق برات... – دەدى رەسەي پرەزيدەنتى ءشاي ءىشىپ جاتىپ.

– نەشاۋا، نەشاۋا ... – دەي بەردىم مەن. سوسىن:

– سوعىستان كوز اشپاعان سيرياعا قازاقستان مەن قىرعىزستان ساربازدارىن جىبەرۋ يدەياسى سىزدەن بە؟ – دەپ سۇرادىم.

ايەلىم سانىمنان تاعى شىمشىپ قالدى. وبلىس اكىمى كوزىن الارتتى.

– ا، ءيا، قۇرت سورىپ وتىرىڭىزدار... قارا كوجەگە ەت تابا الماي، ۇياتتى بولىپ وتىرمىز.. سويا سالاتىن تەنتەك تەكەمىز دە جوق...

– قازاقستان قىزدارى قارا قىتايعا بايعا تيۋگە نەگە قۇمار وسى؟ – دەپ سۇرادى تۇرىكمەنستان پرەزيدەنتى جانتايىپ جاتىپ.

– ساياساتىمىز سولقىلداق... – دەپ قالدىم مەن. ايەلىم سانىمنان وڭدىرماي شىمشىعانى. جىم بولدىم.

– مەنى ماقتاعاندارعا ايىپپۇل سالامىن، قاتالمىن... ال، مىنا تۇرىكمەنستاندا... – دەپ ماقتاندى وزبەكستان پرەزيدەنتى تابا نانعا سارى ماي جاعىپ، اسىقپاي جەپ جاتىپ. تۇرىكمەنستان پرەزيدەنتى ۇيالىپ، ايران سىمىرە سالدى.

سودان نە كەرەك، پرەزيدەنتتەر ءشاي ءىشىپ، رەسەي پرەزيدەنتى جاس تا بولسا، باتا بەرىپ، ورىندارىنان تۇرىپ كەتتى. تۋ، زەينەتاقى العان كۇنى كەلمەي، تۋرا ايت كۇنى كەلگەندەرىن قاراشى؟ قۇداي مەنى ءوستىپ ۇرىپ كەتتى! داستارحانىم قاراپايىم بولىپ، ۇيالىپ قالدىق... «قارا حالىق قانداي ەكەن؟» دەگەن ۇرانمەن ارتىنشا پرەمەر-مينيستر مەن مينيسترلەر ايتتاپ كەلدى. كوڭىلىم كوككە جەتە جازدادى. ەندى مىنا تۇرعان قىرعىزستان پرەزيدەنتىن كۇتىپ وتىرمىن، ايتتاپ كەلەتىن شىعار؟ بىراق وعان بەرسەك دە جاقپايمىز عوي، بىردەڭەگە وكپەلەپ جۇرگەن شىعار ءا؟

مۇحتار شەرىم

Facebook-تەگى پاراقشاسىنان