(سوڭى. باسى مىنا سىلتەمەدە)

رۋحاني جاڭعىرۋىمىزدى جانداندىرۋعا ءتيىس ۇلكەن ەكى سالا - ءبىلىم-عىلىم، مادەنيەت مينيسترلىكتەرىمىز تۋرالى نە ايتۋعا بولادى؟ مىسالى، ءوز باسىم ريزالىقپەن «بارەكەلدى!» دەي المايمىن. قىسقارتىپ ايتسام: ساحنالارىمىز بەن تەلەارنالارىمىزدى تالعامسىزدىق جايلاپ الدى. وزگەلەردىڭ 3-4 انىنەن جىرىمداپ «ءان» شىعاراتىن «سازگەر»، ۇيقاسى بار، ۇيىتارى جوق ولەڭسىماق شىعاراتىن «اقىن»، حالىق سازگەرلەرىنىڭ اسەم اندەرىن قيقالاپ ايتاتىن «ءانشى» كوبەيدى. بۇرىندا مادەنيەت مينيسترلىگىندە جاڭا ءان مەن كۇيدى، ءبيدى تالعام تارازىسىنا سالاتىن ارناۋلى ءبولىم بولعان، ال بۇگىندە ول نە جوق، نە جولتاپقىشتاردىڭ جەتەگىندە.

سونداي-اق، ساحنا مەن تەلەەكراندا (قالالارىمىزدىڭ كوشەلەرىندە دە!) قولاڭشاش قازاق قىز-كەلىنشەكتەر ازايدى. ادەتتە ايەلدىڭ جاسى ۇلعايا باستاعانى قارا شاشىن اق شالعاننان بايقالۋشى ەدى، ال قازىردە جاسى جيىرمانىڭ و جاعى مەن بۇ جاعىنداعى ءانشى-ءبيشى قازاق قىز-كەلىنشەك اتاۋلىنىڭ شاشى سارعايا باستايتىن بولدى،   تىپتى كەيبىرەۋىنىڭ شاشى سارىدان گورى  قۇلا تۇسكە ۇقسايدى. كوپ ۇزاماي بۋرىل، جاسىل، قىزىل دا بولار. بەت الپەتىندە كوز بەن مۇرىننىڭ، اۋىزدىڭ ىشىنەن باسقا جەرلەرى الەم-جالەم بوياۋلى. تەلەەكراننان بادىرايتىپ كورسەتىلە قالعانىندا ۇيرەنشىكتى جۇقالتاڭ قىزىل بوياۋ ورنىنا جاڭا عانا قويۋ قان جاعىلعانداي بىتتي ەرىندەرىنەن ەرىكسىز سەسكەنەمىن. سول قىز-كەلىنشەكتەردىڭ شاشىن شاشىپ تاستاپ، ومىراۋى مەن بەلىن اشىپ تاستاپ، جارعاق شالبارمەن بىرتيىپ-تىرتيىپ شىعا كەلەتىندەرى  دە تىم ىڭعايسىز ەكەنىن ايتىپ، بىلتىر ناۋرىز ايىندا مادەنيەت ءمينيسترى ا. مۇحامەديۇلىنا «جاس الاش» گازەتى  ارقىلى اشىق حات جازدىم، بىراق ول ءلام دەمەدى. ەكى ايدان كەيىن قۇرمەتتى بيبىگۇل تولەگەنوۆاعا اشىق حات جولدادىم، تەگى بيبىكەڭ ءىلتيپات جاساپ، ءتيىستى جەردە سالماقتى ءسوزىن ايتقان بولار، اشىق بەل مەن سىمپي شالبار جوعالدى، جاراسىمدى ۇزىن ەتەك كويلەك كورىنە باستادى، بىراق  شاشىلعان سوياۋ-سوياۋ شاش جينالار ەمەس، جارتىسى اشىق ويىق ومىراۋ قىمتالار ەمەس. ءبىر جەڭىن شەشىپ، يىعىن جالاڭاشتاپ شىعا كەلەتىندەر ءالى بار.

حالىقارالىق ءارتۇرلى دەڭگەيدەگى «ارۋ بايقاۋىنا» قاتىسىپ جۇرگەن قىزدارىمىز قازاقتان بۇرىن جارتىلاي جالاڭاش ەۋروپالىق بيكەشتەرگە ۇقسايدى.

ءبىزدىڭ قازاقتىق، شەتەلدىك تەلەارنالاردىڭ قايسىبىرىندە قىز-جىگىتتەردىڭ كادىمگى قۇتىرىق ءبيى كوبەيىپ بارادى. القام-سالقام كيىنىپ، ءمانسىز، ءسانسىز سەكىرىپ،  شورشىپ، شالقايىپ، تالتايىپ، ەڭكەيىپ، توڭقايىپ الاسۇرا باستايدى. «و، الباستىلار!» دەپ، ارنانى دەرەۋ جاۋىپ قۇتىلاتىن بولدىق. بىرەر ارنادا كەيدە بايىرعى ليريكالىق اندەر كونتسەرتى باستالادى، بىراق («پالەنىڭ» ءبارى وسى «بىراقتان» شىعادى عوي) ساحناداعى ءانشىنىڭ تۋسىرتىنداعى كەڭىستىكتە: ءورتتىڭ قاۋلاعانى، وزەننىڭ تاسىعانى، تاۋدىڭ قۇلاعانى، جەلدىڭ سويقانى، بۇلتتىڭ جوڭكىلگەنى، ەلەكتر شامداردىڭ (پروجەكتورلاردىڭ) سايىسى...  سياقتى الاساپىران پايدا بولادى. باراباننىڭ ما، باسقانىڭ  با، ايتەۋىر، ءبىر اسپاپتىڭ جۇيكەڭدى تۇيگىشتەگەن دۇڭك-دۇڭك دابىسى قوسارلانادى. «قۇلاقتان كىرىپ بويدى الار اسەم ءان مەن ءتاتتى كۇي» جايىنا قالادى.

پرەزيدەنتتىڭ رۋحاني جاڭعىرۋ جايىنداعى ماقالاسى جاريالانعالى ءۇش ايداي ۋاقىت وتسە دە، ساحنا مەن تەلەارنا بەرى قاراعان جوق. ال ارى قاراپ بارا جاتقانى مينيسترلىكتىڭ  باسشىلارىنا وتە ۇناعان بولسا كەرەك.

ءبىلىم  دەسەك، مينيستر قۇتايمايتىن بۇل سالاعا  دا جۇرتشىلىق نارازى. نە ءۇشىن؟ ۇشپاققا شىعارمايتىن «ءۇش تۇعىرلى ءتىل باعدارلاماسىن» مەكتەپتىڭ 1-سىنىبىنان باستاپ تىقپالاعانى ءۇشىن. راس، جاس ۇرپاعىمىز زاماننىڭ بەتالىسىنا قاراي شەت ەلدەر ءتىلىن بىلۋگە ءتيىس، بىراق  ءۇش ءتىلدى قاتار ەمىزۋ – قاي ۇلتتىڭ بولسىن بالاسىن انا ءتىلىنىڭ ۋىزىنا قاندىرماۋ. شەت ەل تىلدەرىن، ايتالىق، 8-سىنىپتاپ باستاپ وقىتساق، كامەلەتتىك اتتەستات پەن ديپلوم الىپ شىعار 7 جىل شاكىرت-ستۋدەنتتىڭ اعىلشىن تىلىنە قوسا حالىقارالىق باسقا دا تىلدەردى  مەڭگەرىپ شىعۋلارىنا ەركىن جەتەر ۋاقىت ەمەس پە؟ الدە، قازاق بالاسى بيزنەستىڭ جاعىن ايىرۋى ءۇشىن اعىلشىن ءتىلىن 1-سىنىپتان وقىماي وڭبايتىنىنا مينيستر ە.ساعاديەۆتىڭ كوزى جەتىپ پە؟ بيزنەستىڭ كوكەسىن كورسەتىپ وتىرعان، اعىلشىن ءتىلىنىڭ پايداسىن جەتە بىلەتىن قىتاي، مىسالى، بىزشە  ولەرمەندىككە بەرىلگەن جوق.

مينيسترلىكتەر كوپشىلىكتىڭ سىنىنا ەڭ كوپ ۇشىراعاندار بولسا دا، قىڭق ەتپەيدى. پرەزيدەنتتىڭ ەركە-سەركەلەرى دەرسىڭ!

سوڭعىسى بار-اۋ، مەكتەپتە نەگىزگى پاندەردى اعىلشىن تىلىندە وقىتۋ كەرەك» دەپ تە جاھاندىق «جاڭالىق» اشىپ ءجۇر. ولار قاي پاندەر؟ ءسىرا، قازاقتىڭ ءتىلى مەن ادەبيەتى، تاريحى مەن جاعرافياسى نەگىزگى پاندەر تىزىمىنەن سىزىلىپ تاستالعان شىعار، ەگەر ولاي بولماسا، ولاردى دا اعىلشىن تىلىندە وقىتپاقشى ما؟ و، زامان: «ۇيدە  ءبىر قىزىم بار، ول بۇدان دا سوراقى».

ءوزى مەن وزىنىكىن جارىلقاۋدان جالىقپايتىن، بۇقارانىڭ كۇبىرىن دە، جانايقايىن دا تىڭدامايتىن بيلىككە بۇل جايتتەر ءاۋ باستا-اق ايتىلعان، جازىلعان. تاۋەلسىز ءباسپاسوزدىڭ بەتىندە قات-قابات بولىپ جاتىر. ولاردا ارقاشان اشىق تا باتىل، ءادىل سويلەيتىندەرگە بيلىكتىڭ نەندەي «جاۋاپ» بەرگەندەرى جايىندا مالۇماتتار دا بار:

«...مىسالى، «بەلگىسىز بىرەۋلەر» بىردە:

بەلگىلى ساياساتكەرلەر: ءامىرجان قوسانوۆتىڭ، سەيداحمەت قۇتتىقادامنىڭ، نۇربولات ماسانوۆتىڭ  پاتەرلەرىنىڭ سىرتقى ەسىگىن تسەمەنتپەن شەگەندەپ، ىشتەگىلەر شىعا المايتىن ەتىپ كەتتى.

ءامىرجاندى سوققىعا جىقتى.

ەرمۇرات باپيدى سوتتادى.

اكەجان قاجىگەلديندى وڭدى-سولدى قارالاپ، قۋعىنداپ، شەت ەلدى پانالاۋعا ءماجبۇر ەتتى (كەيبىر اۋەيىلەر: "ول پارانى الىپ-الىپ، ادەيى قاشىپ كەتتى!" دەپ  ساسىقاۋىزدانىپ ءجۇر. بايعۇستار-اي!).

عالىمجان جاقيانوۆقا جالا جاۋىپ، جەتى جىل تۇرمەگە كەستى.

ليرا بايسەيىتوۆانىڭ ءارى شىعارا باستاعان تاۋەلسىز گازەتىن جاۋىپ تاستاپ، ءارى ءوزىن قايعىعا دۋشار ەتتى.

"دات" گازەتىن دە جاۋىپ تىندى.

"تاڭ" تەلەارناسىن اتقىلادى، جاۋىپ تاستادى.

"سولدات" گازەتى رەداكتسياسىنىڭ قىزمەتكەرلەرىن ساباپ، مۇلىكتەرىن توناپ كەتتى. گازەتتىڭ تارالىمىن سان رەت تاركىلەدى، گازەتتى ەرىكتى ساتۋشىلاردى قۋدالادى.

"رەسپۋبليكا" گازەتىن جاپتى، كەڭسەسىن ورتەدى، كەڭسەسىنە  يت ولىگىن اپارىپ تاستاپ، ول ءيتتىڭ باسىن رەداكتوردىڭ ءۇيىنىڭ سىرتقى ەسىگىنە ءىلىپ كەتتى.

"قازاقستان" گازەتىن قاقپاقىلعا اينالدىردى.

سەرگەي دۋۆانوۆقا قىلماقشىنى قىلىپ جاتقاندارى اناۋ...».

«قايدا كەتىپ بارامىز، قىرىپ-جويىپ؟» دەگەن ماقالامدا («جۇما تايمس» گازەتى، 2003-جىلى) وسىلاي دەگەنمىن. ءۇزىندىسى. سودان بەرى 14 جىل ءوتتى، ال مەن سول ءسوزىمدى بۇگىن دە قايتالاي الامىن. بىلايشا:

بيلىكتىڭ باۋىرىندا ءوسىپ، تالاي-تالاي كەرەگىنە جاراپ ءجۇرىپ، اقىرىندا بيلىكتىڭ الدامشى ەكەنىنە كوزى جەتىپ، كورىپ-بىلگەن قيامپۇرىستىقتى ءتىزىپ ايتا پرەزيدەنت ن.نازارباەۆقا اشىق حات جازىپ، وپپوزيتسياعا بەت العان زامانبەك نۇرقادىلەۆپەن 2004-جىلى 24-شىلدەدە سۇحباتتاسقان بەلگىلى جۋرنالشى اسحات ءشارىپجانوۆتى سول كۇنى ىڭىردە ءاۋتوماشىن قاعىپ مەرت قىلدى. مەرت قىلعانى ەرەكشە: مارقۇمنىڭ دەنەسىندە قاراعۇسى ويىلعاننان باسقا بىردە-ءبىر سىزات جوق! ادامنىڭ تەك باسىن قاعىپ وتەتىن ءاۋتوماشىن بولعانى ما؟!

«ءوزىن ءوزى ءۇش رەت اتقان»  زامانبەكتىڭ ولىگى ءوز ۇيىنەن تابىلدى. 2005-جىلى، قاراشانىڭ 25-ءى كۇنى. «اتقاندا» قانداي؟!. ەكى رەت كەۋدەسىنە اتقان، وعان بولماعان سوڭ تورگە كىلەمشە توسەپ، سوعان ءتۇزۋ جاتىپ، كورپەشەسىن دىزە جاعىنا جاۋىپ، سودان كەيىن باسىنا اتقان، - زاڭ ورىندارى ايتاتىن «كونترولنىي ۆىسترەل». ادامنىڭ ءوزىن ءوزى ءۇش رەت اتۋى ارعى-بەرگى تاريحتا قازاقستاندا عانا بولعان شىعار. ول سۇمدىقتى تەلەديدار ارقىلى حابارلاعان ىشكى ىستەر ءمينيسترى ب.مۇحامەتجانوۆتىڭ بەتى بۇلك ەتپەگەنى سوندىقتان-اۋ!..

ارادا ءۇش اي وتە بەرە الماتىنىڭ بۇتالى ءبىر شەتىندە التىنبەك سارسەنبايۇلىنىڭ  ولىگى تابىلدى. جالعىز ەمەس، وققاعارى مەن شوفەرى ۇشەۋىن اتىپ تاستاعان.

التىنبەك تە بيلىكتىڭ بىرەگەي قىزمەتكەرى بولىپ، مينيستر دەڭگەيىنە جەتتى. الايدا ول دا  بيلىكتىڭ پاتۋاسىزدىگىنە شىداي الماي، وپپوزيتسياعا ويىستى. دەموكراتيالىق پارتيا قۇرىپ، وپپوزيتسيانىڭ جەتەكشىسى بولدى. اشىنىپ سويلەپ، اقيقاتتى باتىل جازىپ ءجۇردى. سول ءۇشىن، ءيا، سول ءۇشىن قۇرباندىققا شالىندى. «الاي ەكەن، بىلاي ەكەن» دەگەن الىپقاشتى ءسوز ادەيى تاراتىلسا دا، جاساندى دالەلدەر جۇرتتى يلاندىرا المادى.

وزبىر بيلىكتىڭ جالاسىمەن تۇرمەدە 7 جىل وتىرىپ شىققان عالىمجان جاقيانوۆ ومىرىنە قايتادان قاۋىپ تونگەن سوڭ شەت ەلگە قونىس اۋداردى.

باتىل ساياساتشى، جۋرنالشى-جازۋشىلار باتىرحان دارىمبەتوۆ پەن ءنۇري ءمۇفتاح  تا «ءاۋتوماشىننىڭ استىنا ءتۇسىپ» كوز جۇمدى.

الماتىنىڭ ىرگەسىندەگى «شاڭىراق» اتتى قازاق اۋىلىندا «زاڭسىز سالىنعان» ۇيلەردى تاڭعى ساعات 4-تە (؟!) بۋلدوزەرمەن ءسۇرىپ تاستاۋعا بارعان پوليتسيا توبىنا باتىل قارسى شىققان قايسار اقىن ارون اتابەككە جانە ءتورت  جىگىتكە «پوليتسەيدى ءولتىردى» دەگەن جۇمباق جالا جابىلىپ، دەرەكسىز «كەرەك دەرەكپەن»  جاۋاپقا تارتىلدى. 2007-جىلى قازان ايىندا. 18 جىلعا سوتتالعان ارون  سودان بەرى جەتى تۇرمەگە اۋىستىرىلىپ، بارىندە دە بىركىسىلىك  كامەرادا ۇستالۋدا.

جاڭاوزەندە بيلىكتىڭ قياستىعىنان قاندى وقيعا بولدى.

الماتى وبلىسىندا «شەكارا شاتاعى» شىقتى.

مۇناي مەن گازىمىزعا يە بولىپ العان شەتەلدىك پايداكۇنەم كومپانيالاردىڭ وزبىرلىقتارىنا اشىنىپ قارسىلىق جاساعان جەرگىلىكتى قازاق جۇمىسشىلاردىڭ بىرنەشەۋى سوتتالدى.

جەرىمىزدىڭ جات ەلدىكتەرگە جالعا بەرىلۋىنە، ساتىلۋىنا باتىل نارازىلىق تانىتقان  ازاماتتارىمىز تۇرمەگە جابىلدى.

بيلىكتىڭ بەتپەردەسىن سىپىرا سويلەگەن رەجيسسەر بولات اتاباەۆ قۋعىن كورىپ، شەت ەلگە كەتۋگە ءماجبۇر بولدى.

«قازىنانىڭ قارجىسىن ۇرلاپ-جىرلاپ قويعاندارى ءۇشىن» اكەلى-بالالى جۋرنالشى ماتاەۆتار سوتتالىپ، تۇرمەدە وتىر.

«قاشقىن ميللياردەر م.ابىلازوۆپەن سىبايلاس» جۋرنالشى ج.ماماي ەكى اي بويى قاماقتا، تەرگەۋدە.

سوڭعى 4-5 جىلدا: «ءىشىپ قويدى، جەپ قويدى»، «ءىرى كولەمدى پارا الدى» دەپ سوتتالعان قازاق جيىرما شاقتى. سولاردىڭ ءبارىنىڭ «ۇرلىق، پارا» دەلىنگەن اقشالارىن قوسىپ ەسەپتەسەك، ۆ.ني دەگەننىڭ ءبىر جولعى «تابىسىنىڭ» جارتىسىنا دا جەتپەيدى. ني 1 ميلليون دوللار پارا الىپ تۇرعانىندا تۇتقىندالدى دا، زاڭ ورىندارى وكىلدەرىنىڭ: «ولاي ەمەس ەكەن، بىلاي ەكەن» دەپ جانتالاسا اقتاۋىمەن امان-ساۋ بوساتىلىپ، اقمونشادان شىققانداي بولىپ، تايراڭداپ كەتە باردى. ال ونىڭ «ءبىرىنشى رەت» (؟!) سونشا پارا العاندىعى «تاجىريبەسىزدىگى» بولىپ، قامقورشىلارى سونىسىن مۇقيات ەسكەرگەن شىعار.

جالپى ءبىزدىڭ بۇگىنگى بيلىك ەلىمىزدەگى ميلليونەر-ميللياردەرلەرگە راقىمدى. بۇدان ءبىر اي شاماسى بۇرىن  «دات-وپ» گازەتى پاش ەتكەندەي، قازاقستاندىق   اسا باي بيزنەسشىلەردىڭ سانى 50 ەكەن. سولاردىڭ قايسىسى ادال ەڭبەگىمەن  «العا شىققانى»، مىسالى، ماعان بەيمالىم، ال سىرتتاي بولسا دا  انىق بىلەتىندەرىم – «نەۆادا-سەمەي» اكتسيونەرلىك قوعامىنىڭ ارناۋلى قورىنا سەمەي اتوم پوليگونىنان زارداپ شەككەندەرگە جاردەم بەرۋگە جينالعان ميللياردتاعان دوللاردى «توكپەي-شاشپاي» ءوزارا بولىسكە سالىپ، ميللياردەر بولىپ، ميىعىنان كۇلىپ جۇرگەندەر: ماشكەۆيچ، شوديەۆ، يبراگيموۆ  جانە «كورەيكا». بيلىك ول بەتپاقتاردىڭ بىردە-بىرەۋىنە:  «ءاي، سەن سەمەيلىكتكەردى الداپ، ارامدىقپەن بايىدىڭ! العانىڭدى، كانە، قايتار!» دەپ داۋىس كوتەرگەن جوق، كەرىسىنشە:  دوس-جولداس، امپەي-جامپەي.

سونىمەن، «...بىزدەردە  مىناداي بار، مىناداي بار» (سۇلتانماحمۇت تورايعىروۆ): بيلىكتىڭ ىرقىنداعى تاۋەلدى ءباسپاسوزدىڭ باعدارلاماسى – پرەزيدەنت ن.ءا.نازارباەۆتى ماقتاي بەرۋ، ماقتاتا بەرۋ. ۇيىمداستىرۋىندا سەلكەۋ جوق. ەگەر مەملەكەت باسشىسىن ماداقتاۋدىڭ، وزدەرى مەنشىكتەگەن  سوزبەن ايتقاندا، «الەمدىك» جارىسى وتكىزىلسە، چەمپيون بولار-اق ەدى، نە كەرەك، وتكىزىلەر ەمەس. وۋ، «الەمدى تامساندىرىپ وتىرعان قازاقستان» ءوزى ۇسىنىس جاساپ، استانادا نەگە وتكىزبەسكە؟ ەكسپو-17-ءنى وتكىزگەننەن قيىن، قىمبات بولا قويماس.

ال پرەزيدەنت وزىنە اشىق تا شەكسىز تابىنۋشىلاردىڭ سوزدەرىن ەستي مە، جازعاندارىن وقي ما؟ تىڭداسا، وقىسا، -  ۇناتىپ ءجۇر مە، الدە «قويىڭدار!» دەۋگە ءداتى جەتپەي مە؟..

ماقتاۋدىڭ اتى – ماقتاۋ. ورىندى-ورىنسىز بولسا دا. سىن ەمەس. تاۋەلسىز گازەتتەردەگىدەي... ە، ولار ازايىپ تا قالدى، ازايتقان سوڭ. ارقا تۇتاتىن وپپوزيتسياسى جوق، ەندى بولا دا قويماس.

ءيا، تاۋەلدى ءباسپاسوزدىڭ قاشاندا مىندەتى ايقىن، جولى اشىق. وكىمەت پەن ۇكىمەتتى  ۇكىلەپ، بولماعان جەتىستىكتى «بولدى» دەپ، تاردى «كەڭ» دەپ، قيسىقتى «ءتۇزۋ» دەپ، «كەمشىلىك، ولقىلىق» دەگەن سوزدەردى ءوزى دە ۇمىتىپ، وزگەلەرگە دە ۇمىتتىرىپ وتىر. بىزدە ادام  قۇقىن سيلاۋ دەگەننىڭ  بار-جوعىن ويلاپ باس قاتىرۋى كەرەك ەمەس، شەتەلدىڭ ەرىككەن  دەموكراتتار-اق ءبىز ءۇشىن ويلاپ قارىق بولا بەرسىن. وي ەركىندىگىنە قوسا ءسوز بوستاندىعىن دا سولارعا بەردىك.

بىزدە شەشىلمەي جاتقان، شيەلەنىسكەن ماسەلە جوق.

ساحنا مەن تەلەارنا قالىبىندا: الاس-كۇلەس «كونتسەرتتەرى»، كەيبىر باعدارلامالارى - باتىستىق،  رەسەيلىك اعا-اپاتايلارىنان كورىپ-بىلۋلەرى، «ۇقساتپاي» كوشىرىپ قايتالاۋلارى.

ءبىلىم-عىلىم بيىگىندە: مەكتەپتەر اشىق، سىنىپتارى جارىق، بيىل  جاپپاي ون ەكىجىلدىق وقۋ جۇيەسىنە كوشىرىلەدى. اعىلشىن ءتىلىن ۇيرەتۋ بالاباقشادان باستالۋى مۇمكىن. عىلىم اكادەميامىز ورنىندا  بولماسا دا، عىلىمىمىزدىڭ ويى-قىرى گۇلدەپ تۇر، جاقىندا عانا «اسا كورنەكتى» 69 ادامعا اكادەميك اتاعى بەرىلدى. ءيا، جوق اكادەميا بار جازۋشىلار وداعىنان كەم بە ەكەن؟! جازۋشىلار وداعى اناۋ جىلى حالىقارالىق ادەبي «الاش» سىيلىعىن ءبىر كۇندە 42 كىسىسىنە بەرگەن بولسا، «اكادەميا»...  تاك شتو...

پاراقورلىق، جەمقورلىق دەگەنمەن الىساتىن كوميسسيا، كوميتەت قۇرىپ اۋرە بولۋدىڭ قاجەتى نە؟ قايسىسى بولسىن تويعان سوڭ توقتايدى، قايتا ولاردىڭ  قولىن قاقپاۋ كەرەك، نەعۇرلىم تەز تويسا، سوعۇرلىم تەز توقتايدى، تاك شتو

قىسقاسى: اۋىل ورنىندا، قالا تىنىش. اناۋ-مىناۋ سوزدەر تيىلسىن! سودان سوڭ: قازاقستان الەمگە كەشە-بۇگىن عانا تانىلعان جوق، 1991-جىلدان باستالعان «جاڭا تاريحىمىزدى» جاقسى ءبىلۋ كەرەك قوي، ءبىز 2002-جىلى قوعامدىق «قازاقستاننىڭ دەموكراتيالىق تاڭداۋى» قوزعالىسىن توكپەشتەپ تاستاۋىمىزبەن، ودان سوڭ «قازاقگەيتىمىزبەن»، «راحات اليەۆتىڭ ىسىمەن» تانىلىپ ۇلگىرگەنبىز، تاك شتو...

عابباس قابىشۇلى

Abai.kz